João 2 - Kaxinawá Bíblia (BR)

Unãmati dami wakĩ ha dukũ Jesusũ taewanikiaki, na hãtxarã

¹ Jesusũ ha dukũ dami wakĩ taewani matu yuinũ nĩkakãwẽ. Ana ushaxini Caná mae Galiléia anu aĩyaĩ nawaibu anu hatu merabewai Jesusũ ewa hukẽ

² nũ Jesusũ tsumabu Jesusbe nukuri iabu

³ uva vinho akĩ netsuaibũ hawẽ ewã ha dukũtũ unãkĩ Jesus yuikĩ: —Kukaã, vinho ma netsuabuki. Ana hatu bena washũwẽ— aka Jesusũ yuikĩ:

⁴ —Ewaã, mia inũ eãnã haskas nũ xinãmaki. Deusũ ea hatu unãmashanairã, iriamaki— ibiaya

⁵ hawẽ ewã ha habũ hatu pimai yuikĩ: —Matu yunuayarã, ashũkãwẽ— hatu wa

⁶ Deus peshuni piriama judeubu haki mepanumisbuwẽ taea dĩtu betsa anu mixki xumuwã 50 kasmai 70 litro ũpash mata wati tiubus seis xumuwã shaka serea

⁷ Jesusũ uĩkĩ hatu yuikĩ: —Ha seis mixki xumuwã tibiki ũpash manekĩ mata wakãwẽ— hatu wa xumuwã tibi mata wakĩ bupakemaibũ:

^8-9 Jesusũ ana hatu yunukĩ: —Natianã, kẽtxawẽ beaixtabaĩ ha hatũ hatu besimai shanẽ ibu anu bushũtãkãwẽ, hau menunã— hatu wa ma damia unãkĩ ha dayakapabu betsã beatã bushuãbu haskatã ũpash damishu unãma ha hatũ hatu besimai shanẽ ibũ metã hania bekãshu unãma ha shanẽ ibũ huni aĩyaĩ kenashũ

¹⁰ yuikĩ: —Nawai taekĩ habu dukũ vinho pepa hatu ama netsui betxãtu bestia benimaibũ ana pe beshmas hatu amamisbuki. Hakia mianã, pepahaira arushũ ikis mĩ hatu tashnimashunaii— aka hatu inãbaunaibũ

¹¹ haska wakĩ Caná Galiléia anushũ dami atimaska taewakĩ Jesusũ hawẽ kuxipa nuku uĩmakĩ taewaya hawẽ tsumabũ eskarabes ikũwãkĩ nũ taewaniki.

¹² Hanushũ hatu haska washũtã Cafarnaum anu hawẽ ewa inũ hawẽ betsabube Jesusbe nũ bai kaxiã hiweyuabũ

Templo hemaĩtĩ anushũ yumetsui inãnãnaĩbu Jesusũ betxitã hatu nitxĩnikiaki, na hãtxarã

¹³ hanua Páscoatiã hanu nai tsumã detekĩ debu wanikatũ nukũ shenipabu dũkebaini xinaĩ besinũ ika judeubu mae tibi anua ma bea kemaibũ Jerusalém anu Jesusbetã nũ uĩ ka

¹⁴ hanushũ Templo hemaĩtĩ anushũ ina awa inũ, txashuwã inũ, deiwãwẽ Deus kẽwãkĩ menu keyuti huni betsabu inãnãnaĩbu inũ pei biananaĩ tsauwabu Jesusũ betxituxitã

^15-16 haska waibu hatu uĩkĩ abuama bitxi kapikũkĩ mayatã habu inayabu hatu kuxa kuxa atãkĩ Templo hemaĩtĩ anuari hatu nitxĩ keyukĩ hanua pei biananaĩburi hatũ tapu narabekĩ pei heshe hatu sa akãkĩ deiwã inãnãnaĩbu yuikĩ: —Matũ inabu inũ matũ mabu dasibiya nenua tashniribaĩkãwẽ. Ẽ Epa Deusũ hiwerã, hanua ana hamapai inãnanãyamakãwẽ— hatu wa datei kaiĩ sharakabaĩbainaibũ

¹⁷ Jesusũ haska wai uĩkĩ haska nukũ shenipabu Davĩ Jesuskiri yuikĩ: “Deus kẽwãti hiwewẽ taea hawa dateama nashukui sinatakĩ ẽ yauxishanaii”, akĩ keneni atimas nũ xinãyã

¹⁸ judeu shanẽ ibubu beshũ Jesus yukakĩ: —Mĩ haska washurã, pemẽ? Ha kuxipawẽ mĩ hatu akairã, hawẽ nũ mia unãti wanũ hawara dami atimaska wakĩ nuku ashũwẽ— akabu

¹⁹ hunea hãtxawẽ hatu yuikĩ: —Na mixki hiwe mã tekekĩ keyuarã, shaba dabe inũ besti kaya ana ẽ benishanaii— hatu wa

²⁰ haska hãtxaiwẽ taeshũ mixki hiwe xinãkĩ shanẽ ibubũ Jesus ha akĩ yuikĩ: —46 ano dayakũkaĩkĩ na Templo meneriabumaki. Haska watã shaba dabe inũ besti mĩ ana benikĩ bena watirumẽ?— akabu

²¹ hakia hawẽ yura hiwe keskakiri Jesusũ xinãniki.

²² Hanua Jesus mawa ana bestẽxĩkẽ: “Shaba dabe inũ besti kaya ana ẽ benishanaii”, hatu wani nũ xinaĩwẽ taeshũ hakiri haska tibi kenenibu inũ Jesusũ nuku yusĩniri xinãkĩ nũ ikũwãniki.

²³ Hanua Jerusalém anu habias Páscoatiã dami atimaska wakĩ hawẽ kuxipa Jesusũ hatu unãmaiwẽ taeshũ yura itxapabũ uĩkĩ ikũwãkĩ taewaibũ

^24-25 hakia haska yurabũ hakiri xinãkĩ hawara akaiwẽ besti benimaibu Jesusũ hawa hatu unãmayuama yurabũ xinã mestẽ hayabuma dasibi hatu unaĩwẽ taea: “Ẽ Messias Cristoki”, ikĩ bebũkiri shabakabi Jesusũ hatu unãmayuama iniki.