Masalimo 98 - Buku Lopatulika

Alemekeze Mulungu pa chifundo ndi choonadi chao

Salimo.

¹ Muimbireni Yehova nyimbo yatsopano; popeza anachita zodabwitsa: Dzanja lake lamanja, mkono wake woyera, zinamchitira chipulumutso.

² Yehova anawadziwitsira chipulumutso chake; anaonetsera chilungamo chake pamaso pa amitundu.

³ Anakumbukira chifundo chake ndi chikhulupiriko chake kunyumba ya Israele; malekezero onse a dziko lapansi anaona chipulumutso cha Mulungu wathu.

⁴ Fuulirani kwa Yehova, inu, dziko lonse lapansi; kuwitsani ndi kufuulira mokondwera; inde, imbirani zomlemekeza.

⁵ Muimbireni Yehova zomlemekeza ndi zeze; ndi zeze ndi mau a salimo.

⁶ Fuulani pamaso pa Mfumu Yehova, ndi mbetete ndi liu la lipenga.

⁷ Nyanja ifuule ndi kudzala kwake; dziko lokhalamo anthu ndi iwo okhalamo;

⁸ mitsinje iombe m'manja; mapiri afuule pamodzi mokondwera.

⁹ Pamaso pa Yehova, popeza akudza kudzaweruza dziko lapansi; adzaweruza dziko lokhalamo anthu ndi chilungamo, ndipo mitundu ya anthu molunjika.