Masalimo 67 - Buku Lopatulika

Amitundu alemekeze Mulungu

Kwa Mkulu wa Nyimbo, pa Neginoto. Salimo. Nyimbo.

¹ Atichitire chifundo Mulungu, ndi kutidalitsa, atiwalitsire nkhope yake;

² kuti njira yanu idziwike padziko lapansi, chipulumutso chanu mwa amitundu onse.

³ Anthu akuyamikeni, Mulungu; anthu onse akuyamikeni.

⁴ Anthu akondwere, nafuule mokondwera; pakuti mudzaweruza anthu molunjika, ndipo mudzalangiza anthu padziko lapansi.

⁵ Anthu akuyamikeni, Mulungu; anthu onse akuyamikeni.

⁶ Dziko lapansi lapereka zipatso zake, Mulungu, Mulungu wathu adzatidalitsa.

⁷ Mulungu adzatidalitsa; ndipo malekezero onse a dziko lapansi adzamuopa Iye.