Masalimo 14 - Buku Lopatulika

Anthu oipadi

Kwa Mkulu wa Nyimbo. Salimo la Davide.

¹ Wauchitsiru amati mumtima mwake, Kulibe Mulungu. Achita zovunda, achita ntchito zonyansa; kulibe wakuchita bwino.

² Yehova mu Mwamba anaweramira pa ana a anthu, kuti aone ngati aliko wanzeru, wakufuna Mulungu.

³ Anapatuka onse; pamodzi anavunda mtima; palibe wakuchita bwino ndi mmodzi yense.

⁴ Kodi onse ochita zopanda pake sadziwa kanthu? Pakudya anthu anga monga akudya mkate, ndipo saitana pa Yehova.

⁵ Pamenepa anaopaopatu, pakuti Mulungu ali mu mbadwo wa wolungama.

⁶ Munyazitsa uphungu wa wozunzika, koma Yehova ndiye pothawira pake.

⁷ Mwenzi chipulumutso cha Israele chitachokera ku Ziyoni! Pakubweretsa Yehova anthu ake a m'nsinga, pamenepo adzakondwera Yakobo, nadzasekera Israele.