Masalimo 137 - Buku Lopatulika

Kudandaula kwa Ayuda ku Babiloni

¹ Ku mitsinje ya ku Babiloni, kumeneko tinakhala pansi, inde tinalira, pokumbukira Ziyoni.

² Pa msondodzi uli m'mwemo tinapachika mazeze athu.

³ Popeza pamenepo akutigwirawo anatifunsa nyimbo ndipo akutizunza anafuna tisekere, ndi kuti, Mutiimbire nyimbo imodzi ya ku Ziyoni.

⁴ Tidati, Tidzaimba bwanji nyimbo ya Yehova m'dziko lachilendo?

⁵ Ndikakuiwalani, Yerusalemu, dzanja lamanja langa liiwale luso lake.

⁶ Lilime langa limamatike kunsaya zanga, ndikapanda kukumbukira inu; ndikapanda kusankha Yerusalemu koposa chimwemwe changa chopambana.

⁷ Yehova, kumbukirani ana a Edomu tsiku la Yerusalemu; amene adati, Gamulani, gamulani, kufikira maziko ake.

⁸ Mwana wamkazi wa ku Babiloni, iwe amene udzapasulidwa; wodala iye amene adzakubwezera chilango monga umo unatichitira ife.

⁹ Wodala iye amene adzagwira makanda ako, ndi kuwaphwanya pathanthwe.