Masalimo 110 - Buku Lopatulika Buku Lopatulika
Masalimo 110

¹ Yehova ananena kwa Ambuye wanga, Khalani padzanja lamanja langa, kufikira nditaika adani anu chopondapo mapazi anu.

² Yehova adzatumiza ndodo ya mphamvu yanu kuchokera ku Ziyoni; chitani ufumu pakati pa adani anu.

³ Anthu anu adzadzipereka eni ake tsiku la chamuna chanu: M'moyera mokometsetsa, mobadwira matanda kucha, muli nao mame a ubwana wanu.

⁴ Yehova walumbira, ndipo sadzasintha, Inu ndinu wansembe kosatha monga mwa chilongosoko cha Melkizedeki.

⁵ Ambuye padzanja lamanja lako adzaphwanya mafumu tsiku la mkwiyo wake.

⁶ Adzaweruza mwa amitundu, adzadzaza dziko ndi mitembo; adzaphwanya mitu m'maiko ambiri.

⁷ Adzamwa kumtsinje wa panjira; chifukwa chake adzaweramutsa mutu wake.