အွန်လိုင်း သမ္မာကျမ်းစာ

ကြော်ငြာတွေ

သမ္မာကျမ်းစာတစ်အုပ်လုံး ဓမ္မဟောင်း ဓမ္မသစ်


တမန်တော်ဝတ္ထု 3 - ခေတ်သစ်​မြန်မာ သမ္မာကျမ်း ခေတ်သစ်​မြန်မာ သမ္မာကျမ်း
တမန်တော်ဝတ္ထု 3

ခြေမသန်စွမ်းသူ​ကို အကောင်းပကတိ​ဖြစ်စေခြင်း

1 တစ်နေ့​သောအခါ ဆုတောင်းရန်​မွန်းလွဲ​သုံးနာရီ​အချိန်​တွင် ပေတရု​နှင့် ယောဟန်​တို့​သည် ဗိမာန်တော်​သို့ သွားကြ၏။

2 ထိုအခါ လူတို့​သည် မွေးရာပါ ခြေမသန်သူ​တစ်ဦး​ကို သယ်ဆောင်လာကြ၏။ သူတို့​သည် “လှပသော​တံခါး” ဟု ခေါ်တွင်သည့် ဗိမာန်တော်​၏​တံခါး​အနီး​၌ ထို​သူ​ကို နေ့စဉ်​ထားလေ့ရှိ၏။ ဤသည်​မှာ ထို​သူ​သည် ဗိမာန်တော်​သို့ ဝင်သော​သူတို့​ထံမှ ငွေကြေး​တောင်းရမ်း​နိုင်ရန်​ဖြစ်၏။

3 ထို​သူ​သည် ဗိမာန်တော်​သို့ ဝင်လာသည့်​ပေတရု​နှင့် ယောဟန်​တို့​ကို မြင်​သောအခါ ငွေကြေး​စွန့်ကြဲ​ရန် တောင်းခံလေ၏။

4 ပေတရု​နှင့် ယောဟန်​တို့​သည် ထို​သူ​အား စိုက်ကြည့်ကြ၏။ ပေတရု​က “ငါတို့​ကို ကြည့်လော့” ဟု ပြော၏။

5 ထိုအခါ ထို​သူ​သည် တမန်တော်တို့​ထံမှ တစ်စုံတစ်ခု​ကို ရမည်​ဟု မျှော်လင့်​လျက် မျှော်ကြည့်လေ၏။

6 သို့ရာတွင် ပေတရု​က “ငါ့​ထံ၌ ရွှေ၊ ငွေ​မရှိ။ သို့သော်လည်း ငါ့​ထံ၌​ရှိသော​အရာ​ကို သင့်​အား​ပေးမည်။ နာဇရက်မြို့သား ယေရှု​ခရစ်တော်​၏​အမည်​နာမ​၌ ထ​၍ လမ်းလျှောက်လော့” ဟု ပြောလေ၏။

7 ထို့နောက် ပေတရု​သည် ထို​သူ​၏​လက်ယာလက်​ကို ဆွဲထူ​သဖြင့် သူ​၏​ခြေထောက်​နှင့် ခြေချင်းဝတ်တို့​သည် ချက်ချင်း​သန်မာလာ၏။

8 ထိုအခါ မတ်တတ်ရပ်​လျက် ခုန်ပေါက်ပြီး​လျှင် လမ်းလျှောက်လေ၏။ သူ​သည် လမ်းလျှောက်​လျက်၊ ခုန်​လျက်၊ ဘုရားသခင်​ကို ချီးမွမ်း​လျက် တမန်တော်တို့​နှင့်အတူ ဗိမာန်တော်​သို့ ဝင်လေ၏။

9 ထိုသို့ လမ်းလျှောက်​လျက် ဘုရားသခင်​အား ချီးမွမ်းသည်​ကို လူအပေါင်းတို့ မြင်​သော်

10 ထို​သူ​သည် ဗိမာန်တော်​၏ လှပသော​တံခါး​အနီး​၌ ထိုင်​၍ ငွေကြေး​တောင်းရမ်းသောသူ​ဖြစ်ကြောင်း သတိပြုမိကြ၏။ သူတို့​သည် ထို​သူ​၌ ဖြစ်ပျက်ခဲ့သည့်​အခြင်းအရာများ​ကို အလွန်​အံ့အားသင့်​၍ ရင်သပ်ရှုမော​လျက်​ရှိကြ၏။

11 သူ​သည် ပေတရု​နှင့် ယောဟန်​တို့​ကို ဖက်တွယ်ထား​လျက်​နေ​စဉ် လူအပေါင်းတို့​သည် အလွန်​အံ့အားသင့်​လျက် သူတို့​ရှိရာ “ရှောလမုန်​ဆင်ဝင်” ဟု ခေါ်သော ဆင်ဝင်​သို့ ပြေးလာကြ၏။

ဗိမာန်တော်​၌ ပေတရု တရားဟောခြင်း

12 ပေတရု​သည် ထို​အရာ​ကို မြင်​သောအခါ သူတို့​အား “အို အစ္စရေးလူမျိုးတို့… သင်တို့​သည် အဘယ်ကြောင့် ဤ​အဖြစ်အပျက်​ကို အံ့သြကြသနည်း။ ငါတို့​သည် ကိုယ့်​တန်ခိုး၊ ကိုယ့်​အကျင့်သီလ​ဖြင့် ဤ​သူ​အား​လမ်းလျှောက်​စေနိုင်သည့်​အလား အဘယ်ကြောင့် ငါတို့​အား ငေးမောကြည့်ကြသနည်း။

13 အာဗြဟံ​၏​ဘုရား၊ ဣဇာက်​၏​ဘုရား၊ ယာကုပ်​၏​ဘုရား​ဖြစ်သော ငါတို့​ဘိုးဘေးများ​၏​ဘုရားသခင်​သည် မိမိ​၏​အစေခံ​ယေရှု​အား ဘုန်းကြီးစေတော်မူပြီ။ ထို​ယေရှု​မှာ ပိလတ်မင်း​လက်​သို့ သင်တို့​အပ်နှံ​၍ ပိလတ်မင်း​က လွတ်ငြိမ်းချမ်းသာခွင့်​ပေး​ရန် ဆုံးဖြတ်​သော်လည်း သင်တို့​ငြင်းပယ်ကြသော​သူ​ပင်​ဖြစ်၏။

14 သင်တို့​သည် သန့်ရှင်း​ဖြောင့်မတ်သော​သူ​ကို ငြင်းပယ်​၍ လူသတ်သမား​တစ်ဦး​ကို လွှတ်ပေး​ရန် တောင်းဆိုကြ၏။

15 သင်တို့​သည် အသက်​၏​အရှင်သခင်​ကို သတ်​၍ ဘုရားသခင်​သည် ထို​သခင်​ကို သေခြင်း​မှ ရှင်ပြန်​ထမြောက်စေတော်မူ၏။ ထိုသို့ ထမြောက်စေတော်မူသည်​ကို ငါတို့​သည် ကိုယ်တိုင်​မြင်တွေ့ကြ၏။

16 ထို​သခင်​ကို ယုံကြည်ခြင်း​အားဖြင့် ထို​သခင်​၏ နာမတော်​သည် ဤ​လူ​ကို သန်စွမ်းစေတော်မူ၏။ ယခင်​က ဤ​လူ​သည် ခြေမသန်စွမ်းသူ​ဖြစ်ကြောင်း သင်တို့​သိမြင်ကြ၏။ ထို​သခင်​အားဖြင့် ရရှိသော ယုံကြည်ခြင်း​သည်လည်း ဤ​ခြေမသန်စွမ်းသူ​အား သင်တို့​အားလုံး​ရှေ့​၌ အကောင်း​ပကတိ​အတိုင်း ဖြစ်စေပြီ။

17 ညီအစ်ကိုတို့… သင်တို့​၏​အာဏာပိုင်များ ပြုခဲ့ကြသည့်​နည်းတူ သင်တို့​သည် မသိ​နားမလည်ဘဲ​ပြုကြသည်​ကို ကျွန်ုပ်​သိပါ၏။

18 သို့ရာတွင် ခရစ်တော်​သည် ဆင်းရဲဒုက္ခခံစားရမည်​ဟု ပရောဖက်​အပေါင်းတို့​၏​နှုတ်​အားဖြင့် ဘုရားသခင်​ကြိုတင်​မှာကြားခဲ့သော​အမှုများ​ကို ဤ​သို့​ဖြစ်လာ​စေတော်မူခဲ့၏။

19 ထို့ကြောင့် သင်တို့​၏​အပြစ်များ​ကို ဘုရားသခင် ဖြေလွှတ်တော်မူ​စေရန် နောင်တရ​၍ ပြောင်းလဲကြလော့။

20 ထာဝရဘုရား​ထံတော်​မှ သင်တို့​အတွက် လန်းဆန်းအားပြည့်​ချိန် ကျရောက်လာ​လိမ့်မည်။ ထိုအခါ သင်တို့​အတွက် ခန့်အပ်ထားတော်မူသည့် ခရစ်တော်​တည်းဟူသော ယေရှု​ကို ဘုရားသခင်​သည် သင်တို့​ထံ စေလွှတ်တော်မူ​လိမ့်မည်။

21 ရှေးအခါ​ကပင် သန့်ရှင်းသော​ပရောဖက်များ​အားဖြင့် ဘုရားသခင်​မိန့်တော်မူခဲ့သည့် အရာခပ်သိမ်းတို့​ကို ပြန်လည်​အသစ်​ပြုပြင်မည့်​အချိန်​အထိ ထို​အရှင်​သည် ကောင်းကင်ဘုံ​တွင် ရှိတော်မူမည်။

22 မောရှေ​က ‘သင်တို့​၏​ဘုရားသခင် ထာဝရဘုရား​သည် သင်တို့​၏​အမျိုး​ထဲမှ ငါ​ကဲ့သို့သော ပရောဖက်​တစ်ပါး​ကို သင်တို့​အတွက် ပေါ်ထွန်းစေတော်မူ​လိမ့်မည်။ ထို​ပရောဖက်​ပြောသမျှ​ကို သင်တို့​သည် နားထောင်ကြ​ရမည်။

23 ထို​ပရောဖက်​၏​စကား​ကို နားမထောင်သော​သူ​ရှိသမျှတို့​သည် လူမျိုး​ထဲမှ လုံးလုံး​ဖယ်ရှားခြင်း​ကို ခံရလိမ့်မည်’ ဟု ဟော၏။

24 ပရောဖက်​ရှမွေလ​မှစ၍ သူ​၏​နောက်​၌ ပေါ်ထွန်းသော ပရောဖက်​ရှိသမျှတို့​သည်လည်း ဤ​နေ့ရက်များ​ကို ဟောပြောခဲ့ပြီ။

25 သင်တို့​သည် ပရောဖက်တို့​၏​သားသမီးများ​ဖြစ်ကြ​၍ ဘုရားသခင်​နှင့် ဘိုးဘေးတို့​အကြား ဖွဲ့သည့် ပဋိညာဉ်တရားတော်​နှင့်​ဆိုင်သော မျိုးဆက်များ​လည်း ဖြစ်ကြ၏။ ဘုရားသခင်​သည် အာဗြဟံ​အား ‘သင်​၏​အမျိုးအနွယ်​အားဖြင့် မြေကြီး​ပေါ်​၌ လူမျိုးစု​ရှိသမျှတို့​သည် ကောင်းချီးမင်္ဂလာ​ကို ခံရ​လိမ့်မည်’ ဟူ၍ မိန့်တော်မူ၏။

26 သင်တို့​တစ်ဦးချင်းစီ​တိုင်း​သည် အပြစ်ဒုစရိုက်​လမ်းများ​မှ ပြန်လှည့်လာခြင်း​ဖြင့် ဘုရားသခင်​သည် သင်တို့​အား ကောင်းချီး​ပေး​ရန် မိမိ​အစေခံ​အား ပေါ်ထွန်းစေတော်မူ​၍ သင်တို့​ထံသို့ ဦးစွာ​စေလွှတ်တော်မူသည်” ဟု ပြောလေ၏။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.