1 ထိုအခါ အဂြိပ္ပမင်းကြီးက ပေါလုအား “သင့်အကြောင်းကို သင်ကိုယ်တိုင် လျှောက်ထားနိုင်သည်” ဟု ဆို၏။ ပေါလုသည် လက်ကိုဆန့်၍ ချေပလျှောက်ထားသည်မှာ 2 “အရှင်အဂြိပ္ပမင်းကြီး… အကျွန်ုပ်အား ဂျူးတို့ စွပ်စွဲထားသောအမှုများနှင့်ပတ်သက်၍ အရှင်၏ရှေ့တော်တွင် ယနေ့လျှောက်လဲချေပပြောဆိုရခြင်းသည် အခွင့်အရေးကောင်းတစ်ခုဖြစ်သည်ဟု အကျွန်ုပ်ထင်မြင်မိပါ၏။ 3 အထူးသဖြင့် အရှင်မင်းကြီးသည် ဂျူးတို့၏ထုံးတမ်းစဉ်လာနှင့် အငြင်းပွားစရာကိစ္စများကို အကျွမ်းတဝင်ရှိသောသူ ဖြစ်ပါ၏။ သို့ဖြစ်၍ အကျွန်ုပ်၏လျှောက်လဲချက်ကို စိတ်ရှည်သည်းခံလျက် နားထောင်ပေးပါရန် တောင်းပန်အပ်ပါ၏။ 4 အကျွန်ုပ်သည် ဦးစွာမိမိ၏မွေးရပ်မြေတွင်လည်းကောင်း၊ ထို့နောက် ဂျေရုဆလင်မြို့တွင်လည်းကောင်း ငယ်ရွယ်စဉ်မှစ၍ မည်သို့ပြုမူနေထိုင်ခဲ့သည်ကို ဂျူးလူမျိုးအားလုံးသိကြပါ၏။ 5 အကျွန်ုပ်သည် အကျွန်ုပ်တို့၏ဘာသာတွင် စည်းကမ်းအတင်းကျပ်ဆုံးသောဂိုဏ်းဖြစ်သည့် ဖာရိရှဲဂိုဏ်းဝင်တစ်ဦးအဖြစ် နေထိုင်ခဲ့ကြောင်း ထိုသူတို့သိထားကြသည်မှာ ကြာပြီဖြစ်၏။ သူတို့သည် ဆန္ဒရှိလျှင် ထိုအကြောင်းကို သက်သေခံနိုင်ပါ၏။ 6 အကျွန်ုပ်တို့၏ဘိုးဘေးတို့အား ဘုရားသခင်ပေးတော်မူသောကတိတော်ကို စောင့်မျှော်နေခြင်းကြောင့် ယခုအကျွန်ုပ်သည် စစ်ဆေးခံနေရပါ၏။ 7 အကျွန်ုပ်တို့၏မျိုးနွယ်စုဆယ့်နှစ်မျိုးတို့သည် ဘုရားသခင်ကို နေ့ရောညပါဝတ်ပြုကိုးကွယ်လျက် ထိုကတိတော်အတိုင်းခံစားရရန် စောင့်မျှော်နေကြ၏။ အရှင်မင်းကြီး… အကျွန်ုပ်သည် ဤသို့စောင့်မျှော်နေသည့်အတွက်ကြောင့် ဂျူးတို့၏စွပ်စွဲခြင်းခံနေရပါ၏။ 8 သေလွန်သောသူတို့အား ဘုရားသခင် ရှင်ပြန်ထမြောက်စေတော်မူသည်ကို ယုံဖွယ်မရှိဟု အရှင်တို့အဘယ်ကြောင့်ထင်မြင်ကြသနည်း။ 9 အမှန်စင်စစ် အကျွန်ုပ်ကိုယ်တိုင်သည်လည်း နာဇရက်မြို့သားယေရှု၏အမည်နာမကို တတ်နိုင်သမျှ ဆန့်ကျင်ရမည်ဟု ထင်ခဲ့ပါ၏။ 10 ထို့ကြောင့် ဂျေရုဆလင်မြို့၌လည်း ထိုအတိုင်းပြုခဲ့ပါ၏။ အကျွန်ုပ်သည် ယဇ်ပုရောဟိတ်မင်းအကြီးအကဲတို့ထံမှရသော အခွင့်အာဏာဖြင့် ယုံကြည်သူများစွာကို ထောင်ချရုံသာမက သူတို့သေဒဏ်ချမှတ်ခံရသောအခါ၌လည်း ထောက်ခံခဲ့ပါ၏။ 11 ဂျူးဝတ်ပြုဆောင်အားလုံးတွင်လည်း သူတို့ကိုမကြာခဏအပြစ်ပေး၍ အယူဝါဒကိုစွန့်လွှတ်ရန် အတင်းအကျပ်စေခိုင်းခဲ့ပါ၏။ ထို့ပြင် သူတို့အပေါ် အလွန်စိတ်ဆိုးမုန်းတီးကာ နိုင်ငံရပ်ခြားမြို့များသို့ပင်လျှင်သွား၍ သူတို့ကို လိုက်လံညှဉ်းဆဲခဲ့ပါ၏။ 12 ဤသို့ဖြင့် ကျွန်ုပ်သည် ယဇ်ပုရောဟိတ်ခေါင်းဆောင်များ၏အခွင့်အာဏာနှင့် ခွင့်ပြုချက်တို့ကို ကိုင်ဆောင်လျက် ဒမတ်စကပ်မြို့သို့ သွား၏။ 13 ထိုသို့ သွားနေစဉ် မွန်းတည့်ချိန်၌ လမ်းတွင် ကောင်းကင်မှနေထက်တောက်ပသောအလင်းရောင်သည် အကျွန်ုပ်အပါအဝင် အကျွန်ုပ်နှင့်အတူ ပါလာသောသူတို့၏ဘေးပတ်လည်၌ တောက်ပထွန်းလင်းလာသည်ကို တွေ့မြင်ရပါသည် အရှင်မင်းကြီး။ 14 အကျွန်ုပ်တို့အားလုံးသည် မြေပေါ်သို့လဲကျသွားသောအခါ ဟေဗြဲဘာသာစကားဖြင့် ‘ရှောလု… ရှောလု… ငါ့ကို အဘယ်ကြောင့် ညှဉ်းပန်းနှိပ်စက်သနည်း။ တုတ်ချွန်ကို ကန်လျှင် သင်သာလျှင် နာကျင်လိမ့်မည်’ ဟု ပြောသောအသံကို အကျွန်ုပ်ကြားရ၏။ 15 ထိုအခါ အကျွန်ုပ်က ‘သခင်… ကိုယ်တော်သည် မည်သူဖြစ်ပါသနည်း’ ဟု မေးလျှောက်ပါ၏။ သခင်ဘုရားက ‘ငါသည် သင်ညှဉ်းပန်းနှိပ်စက်နေသောယေရှုဖြစ်၏။ 16 သင်သည်ထ၍ မတ်တတ်ရပ်လော့။ ငါသည် သင့်ရှေ့၌ပေါ်လာရသည်မှာ သင့်ကို ငါ၏အမှုဆောင်အဖြစ်ခန့်ထားရန် ဖြစ်၏။ ထို့အတူ သင်မြင်ခဲ့ရသည့်အရာနှင့် သင့်အားငါဖော်ပြမည့်အကြောင်းအရာတို့ကို သူတစ်ပါးတို့အား သက်သေခံရမည်။ 17 ငါသည် ဂျူးတို့၏လက်မှလည်းကောင်း၊ လူမျိုးခြားတို့၏လက်မှလည်းကောင်း၊ သင့်ကိုကယ်တင်မည်။ သင့်ကိုလူမျိုးခြားများထံသို့ ငါစေလွှတ်မည်။ 18 သူတို့အားအမှောင်မှ အလင်းသို့လည်းကောင်း၊ စာတန်မာရ်နတ်၏လက်အောက်မှ ဘုရားသခင်ထံသို့လည်းကောင်း ပြောင်းလဲလာစေရန် သင်သည် ထိုသူတို့၏မျက်စိများကို ဖွင့်ပေးရမည်။ သို့မှသာ သူတို့သည် အပြစ်များအတွက်ခွင့်လွှတ်ခြင်းကို ခံစားရမည်။ ထို့ပြင် ငါ့ကိုယုံကြည်ကြသဖြင့် ဘုရားသခင်သန့်ရှင်းစေတော်မူသောလူစုထဲတွင် ပါဝင်ရလိမ့်မည်’ ဟု မိန့်တော်မူ၏။ 19 ထို့ကြောင့် အရှင်အဂြိပ္ပမင်းကြီး… အကျွန်ုပ်သည် ကောင်းကင်မှ ရသောထိုရူပါရုံကို မနာခံဘဲမနေပါ။ 20 ဦးစွာ ဒမတ်စကပ်မြို့သူမြို့သားများ၊ ထို့နောက် ဂျေရုဆလင်မြို့သူမြို့သားများ၊ ယုဒပြည်သူပြည်သားများနှင့် လူမျိုးခြားများအား ‘သင်တို့သည် နောင်တရ၍ ဘုရားသခင်ထံ ပြောင်းလဲကြရမည်။ နောင်တနှင့် လျော်ကန်သည့်အကျင့်ကို ကျင့်ကြရမည်’ ဟု ဟောပြောခဲ့၏။ 21 ထိုသို့ ဟောပြောသည့်အတွက် ဂျူးတို့သည် အကျွန်ုပ်ကို ဗိမာန်တော်ထဲ၌ ဖမ်းဆီး၍ သတ်ရန်ကြိုးစားကြ၏။ 22 သို့ရာတွင် အကျွန်ုပ်သည် ဘုရားသခင်၏ ကူညီမစတော်မူခြင်းကို ခံရသောကြောင့် ယနေ့တိုင်အောင်ရပ်တည်လျက် လူတန်းစားအနိမ့်အမြင့်မရွေးဘဲ လူအပေါင်းတို့အား ဟောပြောပါ၏။ ထိုသို့ဟောပြောရာတွင်လည်း ပရောဖက်များနှင့် မောရှေတို့ဟောပြောခဲ့သည့် နောင်အနာဂတ်တွင် ဖြစ်ပျက်မည့်အရာများကိုသာ ဟောပြောပါ၏။ 23 သူတို့ဟောပြောခဲ့သည့်အတိုင်း ခရစ်တော်သည် ဒုက္ခဝေဒနာကို ခံစားရမည်။ ထို့ပြင် သေသောသူတို့ထဲမှ အဦးဆုံးရှင်ပြန်ထမြောက်တော်မူခြင်းအားဖြင့် ဂျူးလူမျိုးနှင့် လူမျိုးခြားတို့ထံသို့ အလင်းတရားကို ကြေညာဟောပြောတော်မူမည်ဟု အကျွန်ုပ်ဟောပြောပါ၏” ဟူ၍ ဖြစ်၏။ 24 ထိုသို့ ပေါလုချေပလျှောက်ထားနေစဉ် ဖေတ္တုမင်းက “ပေါလု… သင်ရူးနေပြီ။ အတတ်ကြူး၍ အရူးဖြစ်ပြီ” ဟု ကျယ်လောင်စွာ ပြောဆိုလေ၏။ 25 သို့ရာတွင် ပေါလုက “မြတ်သောအရှင်ဖေတ္တုမင်း… အကျွန်ုပ်မရူးပါ။ မှန်ကန်၍ သင့်လျော်သောသစ္စာစကားကိုသာ လျှောက်တင်ပါ၏။ 26 ဤအကြောင်းအရာများကို အဂြိပ္ပမင်းကြီးသိရှိသောကြောင့် ထိုမင်းရှေ့၌ အကျွန်ုပ်သည်လည်း ရဲဝံ့စွာလျှောက်ထားခြင်းဖြစ်ပါ၏။ ထိုအကြောင်းအရာတို့သည် ဆိတ်ကွယ်ရာတွင် ဖြစ်ပျက်ခဲ့သည့်ကိစ္စများမဟုတ်သောကြောင့် အရှင်မင်းကြီးမသိဘဲမနေပါဟု အကျွန်ုပ်ယုံကြည်ပါ၏။ 27 အရှင်အဂြိပ္ပမင်းကြီး… ပရောဖက်ကျမ်းများကို ယုံကြည်တော်မူပါသလော။ အရှင်ယုံကြည်တော်မူသည်ကို အကျွန်ုပ်သိပါသည်” ဟု လျှောက်လေ၏။ 28 ထိုအခါ အဂြိပ္ပမင်းကြီးက “သင်သည် အချိန်တိုအတွင်း၌ ငါ့အားခရစ်ယာန်တစ်ဦးဖြစ်လာရန် သွေးဆောင်နိုင်မည်ဟု ထင်မှတ်ပါသလော” ဟူ၍ ပေါလုအားဆိုလေ၏။ 29 ပေါလုကလည်း “အချိန်တိုသည်ဖြစ်စေ၊ ကြာသည်ဖြစ်စေ အရှင်မင်းကြီးသာမက ယနေ့အကျွန်ုပ်၏စကားကို နားထောင်သောသူအားလုံးတို့သည် ဤအချုပ်နှောင်ခံခြင်းမှလွဲ၍ အကျွန်ုပ်ကဲ့သို့ပင် ဖြစ်လာကြစေရန် ဘုရားသခင်ထံသို့ အကျွန်ုပ်ဆုတောင်းပါသည်” ဟု လျှောက်လေ၏။ 30 ထိုအခါ မင်းကြီးသည်ထ၍ သူနှင့်အတူ ထိုင်သော ဘုရင်ခံ၊ ဗေရနိတ်နှင့် အခြားပုဂ္ဂိုလ်အားလုံးတို့သည်လည်း ထကြ၏။ 31 ထိုသူတို့အားလုံး ထွက်ခွာသွားပြီးနောက် “ဤသူသည် သေဒဏ်၊ သို့မဟုတ် ထောင်ဒဏ်ခံထိုက်သော ပြစ်မှု တစ်စုံတစ်ခုကိုမျှ မကျူးလွန်ခဲ့ပါ” ဟူ၍ အချင်းချင်းပြောဆိုကြ၏။ 32 အဂြိပ္ပမင်းကြီးကလည်း ဖေတ္တုမင်းအား “ဤသူသည်ဆီဇာဘုရင်ထံ အယူခံဝင်ခြင်းမပြုခဲ့ပါလျှင် လွှတ်ပေးနိုင်သည်” ဟု ဆိုလေ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.