Marka 7 - DIEM PROTESTANTA

Fanaon-drazana jiosy

¹ Dia tafavory teo amin’i Jesoa ny Farisianina sy ny sasantsasany tamin’ireo mpahay lalàna avy any Jerosalema,

² ary nahatsikaritra fa ny sasany tamin’ny mpianatr’i Jesoa dia nihinan-kanina tamin’ny tanana maloto, izany hoe tsy voasasa araka ny fombam-pivavahana.

³ Fa ny Farisianina ary koa ny Jiosy rehetra dia tsy mihinan-kanina raha tsy avy misasa tanana amin’ny fomba manokana, satria nifikitra tamin’ny fanao nampitain’ny razany.

⁴ Ary rehefa avy any an-tsena ry zareo, dia tsy mihinan-kanina raha tsy avy midio tsara araka ny fombam-pivavahana. Maro koa ny fanao hafa nolovany ka nifikirany, toy ny manasa ny zinga fisotroana, ny siny, ny fanaka varahina ary ny farafara fisakafoana.

⁵ Dia nanontany an’i Jesoa ny Farisianina sy ny mpahay lalàna nanao hoe: –Nahoana ireto mpianatrao no tsy manaraka ny fanao nampitain’ny razantsika, fa tanana maloto izao no ihinanany hanina?

⁶ Fa hoy i Jesoa taminy: –Marina tokoa ny naminanian’i Isaià anareo mpihatsaravelatsihy, araka ny voalazan’ny Soratra Masina hoe:

⁷ «Ity vahoaka ity, hoy Andriamanitra, tendro-molotra no anajany Ahy fa ny fony kosa lavitra Ahy mihitsy; ka poaka àty ny fivavahana ataony amiko, satria didin’olombelona no ambarany ho fampianarako.»

⁸ Ny didin’Andriamanitra avelanareo, fa ny fomba amam-panao nampitain’olombelona kosa tananareo.

⁹ Ary hoy koa i Jesoa taminy: –Dia arianareo tsotra izao ny didin’Andriamanitra, mba hitandremanareo ny fomba amam-panaonareo.

¹⁰ Fa hoy i Mosesy: «Hajao ny rainao sy ny reninao», ary koa: «Izay miteny ratsy ny rainy na ny reniny dia hatao maty tokoa.»

¹¹ Fa ianareo kosa manambara fa raha misy olona milaza amin’ny rainy na ny reniny hoe: «Efa nataoko kôrbana, izany hoe fanatitra ho an’Andriamanitra, ny zavatra tokony hanasoavako anao»,

¹² dia tsy avelanareo hanao na inona na inona intsony amin’ny rainy na amin’ny reniny izy.

¹³ Koa ny fomba amam-panao ifandovanareo no anafoananareo ny tenin’Andriamanitra; ary mbola maro koa ny zavatra tahatahaka izany ataonareo.

Ny zavatra tena mahaloto ny olona

¹⁴ Dia nantsoin’i Jesoa hankeo aminy indray ny vahoaka sady nilazany hoe: –Mihainoa Ahy ianareo rehetra ka mahafantara.

¹⁵ Tsy misy zavatra avy etỳ ivelany miditra ao anatin’ny olona ka mahaloto azy, fa izay mipoitra avy ao anatin’ny olona no mahaloto azy. [

¹⁶ Izay manan-tsofina hihainoana, aoka hihaino!]

¹⁷ Ary rehefa niala teo amin’ny vahoaka i Jesoa ka niditra tao an-trano, dia nanontany Azy momba io fanoharana io ny mpianany;

¹⁸ ka hoy i Jesoa taminy: –Hay ve ianareo koa mba tsy mahafantatra? Tsy takatrareo ve fa izay rehetra avy etỳ ivelany ka miditra ao amin’ny olona dia tsy mahaloto azy,

¹⁹ satria tsy miditra ao am-pony fa ao an-kibony ihany, ka alefa any amin’ny fanariana azy. (Izany no nentin’i Jesoa nanambara fa madio avokoa ny hanina rehetra).

²⁰ Dia hoy koa i Jesoa: –Ny zavatra mipoitra avy ao amin’ny olona, izany no mahaloto ny olona;

²¹ satria avy ao anaty, avy ao am-pon’ny olona no ipoiran’ny sain-dratsy mahatonga azy hijangajanga, hangalatra, hamono olona,

²² haka vadin’olona, ho tia harena, hasiaka, hanambaka, haloto fitondrantena, hialona, hanao vava ratsy, hiavonavona, ho adala toetra.

²³ Ireo zava-dratsy rehetra ireo no mipoitra avy ao anatin’ny olona ka mahaloto azy.

Ilay vehivavy sirôfenisianina manam-pinoana

²⁴ Dia niala teo i Jesoa ary lasa nankany amin’ny faritany akaikin’ny tanàna atao hoe Tiro; ary niditra tao an-trano anankiray Izy fa tsy te ho fantatry ny olona, kanefa tsy afa-niafina.

²⁵ Dia nisy vehivavy anankiray izay, nanan-janaka vavy azon’ny fanahy maloto; vao nandre momba an’i Jesoa ravehivavy, dia lasa nankao aminy ka niankohoka teo an-tongony.

²⁶ Miteny grika ravehivavy sady Sirôfenisianina firazanana; ary niangavy an’i Jesoa izy handroaka ny demony hiala tao amin-janany.

²⁷ Fa hoy i Jesoa taminy: –Avelao aloha ho voky ny zanaka nateraka, fa tsy tsara raha ny mofon-janaka no alaina ka atsipy ho an’ny amboa kely.

²⁸ Dia namaly ravehivavy ka nanao hoe: –Nefa, Tompoko, na ny amboakely ao ambany latabatra aza, dia mba mihinana ny sombintsombiny avy amin’ny mofon’ny ankizy ihany.

²⁹ Dia hoy i Jesoa taminy: –Izany no teninao, ka dia modia fa efa niala tamin’ny zanakao ny demony.

³⁰ Ary rehefa niala teo ravehivavy ka tonga tany an-tranony, dia nahita ny zanany matory tsara eo am-pandriana, efa nialan’ny demony.

Sitranin’i Jesoa ilay marenina sady raiki-dela

³¹ Dia niala tao amin’ny faritanin’i Tiro i Jesoa ka nandalo tany Sidôna ary niverina teo amin’ny farihin’i Galilea, rehefa avy namakivaky ny faritany atao hoe Dekapôly.

³² Dia nisy lehilahy sady marenina no raiki-dela, nentin’ny olona ho eo aminy ary niangaviany Azy hametrahany tanana.

³³ Dia nentin’i Jesoa nihataka irery lavitra ny vahoaka ralehilahy ka noharoniny tamin’ny rantsan-tanana ny sofiny, ary nokasihiny sady nasiany rora ny lelany.

³⁴ Dia niandrandra ny lanitra i Jesoa sady nisento ary niteny tamin-dralehilahy hoe: –Efatà! (izany hoe: «misokafa!»).

³⁵ Ary niaraka tamin’izay dia nisokatra ny sofin-dralehilahy ary nivaha ny fatoran’ny lelany, ka afaka niteny tsara izy.

³⁶ Dia namepetra ny olona teo i Jesoa tsy hitantara na amin’iza na amin’iza; kanefa arakaraka ny nameperan’i Jesoa azy no vao mainka koa nampielezany izany.

³⁷ Ary dia talanjona izaitsizy ny olona ka vaky vava hoe: –Tsara avokoa no nanaovany ny zavatra rehetra, fa sady nampalady ny marenina Izy no nampiteny ny moana.