Josoa 21 - DIEM PROTESTANTA

Ny tanànan’ny Levita

¹ Ary ny filoham-pianakaviana tamin’ny fokon’i Levỳ dia nanatona an’i Elehazara mpisorona sy i Josoa zanakalahin’i Nona ary ny filoham-pianakaviana tamin’ny foko israelita;

² tao Silao, tao amin’ny tany Kanahàna, no nihaonana ka hoy ireo filoham-pianakaviana levita hoe: –Ny TOMPO efa nanome baiko tamin’ny alalan’i Mosesy mba homena tanàna maromaro honenanay izahay, ary koa homena ny kijàna manodidina azy avy ho an’ny biby fiompinay.

³ Dia samy tamin’ny zarataniny avy no nanomezan’ny Israelita ireto tanàna ireto mbamin’ny kijàna manodidina azy mba ho an’ny Levita, araka ny baikon’ny TOMPO.

⁴ Ny anjara voatendrin’ny antsapaka voalohany dia ho an’ireo tarika taranak’i Kehata; anisan’ny levita kehatita ny taranak’i Aharôna mpisorona ka ny azon’ireo tamin’ny antsapaka dia tanàna 13 avy tamin’ny fokon’i Joda sy fokon’i Simehôna ary fokon’i Benjamîna.

⁵ Ny azon’ny taranak’i Kehata sisa kosa tamin’ny antsapaka dia tanàna folo avy tamin’ny fokon’i Efraîma sy fokon’i Dana ary antsasa-pokon’i Manase any andrefana.

⁶ Ny azon’ny taranak’i Geresôna tamin’ny antsapaka dia tanàna 13 avy tamin’ny fokon’i Jisakara sy fokon’i Asera ary fokon’i Naftalỳ sy antsasa-pokon’i Manase any Basàna.

⁷ Ny azon’ny taranak’i Merarỳ kosa dia tanàna 12 avy tamin’ny fokon’i Reobena sy fokon’i Gada ary fokon’i Zebolòna.

⁸ Ireo tanàna ireo mbamin’ny kijàna manodidina azy avy dia tamin’ny antsapaka no nanomezan’ny Israelita azy ny Levita, araka izay efa nandidian’ny TOMPO tamin’ny alalan’i Mosesy.

⁹ Ireto no anaran’ireo tanàna avy tamin’ny fokon’i Joda sy fokon’i Simehôna,

¹⁰ tanàna izay nomena ny taranak’i Aharôna anisan’ny tarika levita kehatita satria ry zareo no nahazo ny antsapaka voalohany.

¹¹ Nomena azy i Kiriata-Arbà, na hoe tanànan’i Arbà araka ny anaran’ilay razamben’ny Hanakita. Io tanàna io ankehitriny dia atao hoe Hebrôna, any amin’ny faritra havoan’i Joda. Nomena miaraka aminy koa ny kijàna manodidina azy.

¹² Fa ny saha sy ireo tanàna kely miankina amin’i Hebrôna kosa dia efa natolotra an’i Kaleba zanakalahin’i Jefonè.

¹³ Miaraka amin’i Hebrôna, izay tanàna fialofan’ny mpamono olona tsy nahy, dia natolotra ny taranak’i Aharôna koa i Libnà,

¹⁴ i Jatira, i Estemôa,

¹⁵ i Hôlôna, i Debira,

¹⁶ i Hasàna, i Jotà, ary i Bety-Semesa: izany hoe, avy amin’ny fokon’i Joda sy fokon’i Simehôna, tanàna sivy mbamin’ny kijàna samy manodidina azy.

¹⁷ Avy tamin’ny fokon’i Benjamîna koa ny nomena ny taranak’i Aharôna dia i Gibehôna, i Geba,

¹⁸ i Hanatôta, ary i Halemeta: izany hoe tanàna efatra mbamin’ny kijàna samy manodidina azy.

¹⁹ Ny tanàna rehetra nomena ny mpisorona taranak’i Aharôna dia tanàna 13 mbamin’ny kijàna samy manodidina azy.

²⁰ Ary ireo tarika sisa tamin’ny levita taranak’i Kehata kosa dia ireto tanàna ireto no azony tamin’ny antsapaka.

²¹ Avy tamin’i fokon’i Efraîma dia i Sekema, izay tanàna fialofana ao anatin’ny faritra havoan’i Efraîma, i Gezera,

²² i Kibetsaîma, ary i Bety-Hôrôna: izany hoe tanàna efatra mbamin’ireo kijàna samy manodidina azy.

²³ Avy tamin’ny fokon’i Dana dia i Eltekè, i Gibetôna,

²⁴ i Aialôna, ary i Gata-Rimôna: izany hoe tanàna efatra mbamin’ny kijàna samy manodidina azy.

²⁵ Avy tamin’ny antsasa-pokon’i Manase tany ampita andrefan’i Jôrdàna dia i Tahenàka sy i Jiblehama: izany hoe tanàna roa mbamin’ny kijàna samy manodidina azy.

²⁶ Ny tanàna rehetra azon’ireo tarika sisa taranak’i Kehata dia tanàna folo mbamin’ny kijàna samy manodidina azy.

²⁷ Ireo tarika tamin’ny levita taranak’i Geresôna kosa dia ireto tanàna ireto no azony. Avy tamin’ny antsasa-pokon’i Manase teny atsinanana dia i Gôlàna any Basàna, izay tanàna fialofana, sy i Behestèra: izany hoe tanàna roa mbamin’ny kijàna samy manodidina azy.

²⁸ Avy tamin’ny fokon’i Jisakara dia i Kisiôna, i Daberata,

²⁹ i Jarmota, ary i Haîna-Genima: izany hoe tanàna efatra mbamin’ny kijàna samy manodidina azy.

³⁰ Avy tamin’ny fokon’i Asera dia i Misala, i Habdôna,

³¹ i Helkata, ary i Rehôba: izany hoe tanàna efatra mbamin’ny kijàna samy manodidina azy.

³² Avy tamin’ny fokon’i Naftalỳ dia i Kedesa any Galilea, izay tanàna fialofana, i Hamôta-Dôra ary i Kartàna: izany hoe tanàna telo mbamin’ny kijàna samy manodidina azy.

³³ Ny tanàna rehetra azon’ny Geresônita ho an’ireo tarika tao anatiny dia tanàna 13 mbamin’ny kijàna samy manodidina azy.

³⁴ Ireo Levita hafa sisa dia ny tarika taranak’i Merarỳ, ka ireto tanàna ireto no azony. Avy tamin’ny fokon’i Zebolòna dia i Jôknehama, i Kartà,

³⁵ i Dimnà, ary i Nahalala: izany hoe tanàna efatra mbamin’ny kijàna samy manodidina azy.

³⁶ Avy tamin’ny fokon’i Reobena any atsinanan’i Jôrdàna, dia i Betsera izay tanàna fialofana, i Jahatsà,

³⁷ i Kedemôta, ary i Mefahata: izany hoe tanàna efatra mbamin’ny kijàna samy manodidina azy.

³⁸ Avy tamin’ny fokon’i Gada dia i Ramôta any Gilehada, izay tanàna fialofana, i Mahanaîma,

³⁹ i Hesbôna, ary i Jahezera: izany hoe tanàna efatra mbamin’ny kijàna samy manodidina azy.

⁴⁰ Koa 12 ny tanàna rehetra azon’ny taranak’i Merarỳ antsapaka ho an’ireo tarika ao anatiny, dia ireo hafa sisa anisan’ny tarika levita.

⁴¹ Ny tanàna rehetra azon’ny Levita teo anivon’ny tanin’ny Israelita hafa dia 48 no isany.

⁴² Ireo tanàna rehetra ireo dia samy manana ny kijàna manodidina azy avy.

⁴³ Nomen’ny TOMPO ho an’ny Israelita ny tany manontolo, izay efa nianianany homena ny razambeny: dia azony ho fananany tokoa izany ka nonenany.

⁴⁴ Nampisy fandriam-pahalemana ho azy koa ny TOMPO tamin’ny sisin-tany manodidina azy, araka ny fianianana rehetra efa nataony tamin’ny razambeny. Nampandresen’ny TOMPO ireo fahavalony rehetra izy ka tsy nisy nahatohitra azy mihitsy ireny na iray aza.

⁴⁵ Tanteraka avokoa ny zava-tsoa rehetra nambaran’ny TOMPO tamin’ny Israelita fa tsy nisy latsaka.