Nehemia 3 - Baiboly Katolika

Ireo nanolo-tena hanorina ny manda

¹ I Eliasiba mpisorona lehibe, mbamin’ireo mpisorona rahalahiny dia nanomboka nanorina ny vavahadin’ny Ondry, nanamasina azy izy, dia nandatsaka ny lela-vavahady; namboariny ny manda dia nohamasininy hatramin’ny tilikambon’i Meà, ka hatramin’ny tilikambon’i Hananeela.

² Ny mponina ao Jerosalema no nanorina teo anilany, ary i Zakora, zanak’i Amrì, nanorina teo anilany.

³ Ny taranak’i Senaà no nanao ny vavahadin’ny Hazandrano, nataony teo ny sakamandimby, dia nalatsany ny lela-vavahady, mbamin’ny karetsaka sy ny barany;

⁴ ary teo anilany dia i Merimota zanak’i Oria zanak’i Akôsa, no nanamboatra; ary teo anilany dia i Mosolama zanak’i Barakia zanak’i Mesezebela, no nanamboatra; ary teo anilany dia i Sadôka zanak’i Baanà no nanamboatra;

⁵ teo anilany dia ny Tekôita no nanamboatra, saingy tsy nilatsaka hanampy tamin’ny fanompoana ny tompony, ny lehibe tamin’izy ireo.

⁶ I Jôiadà zanak’i Faseà, sy i Mosolama zanak’i Besôdiasa, no nanamboatra ny Vavahady Goga, nataony teo ny sakamandimby dia nalatsany ny lela-vavahady, mbamin’ny karetsaka sy ny barany.

⁷ I Meltiasa Gabaônita, i Jadôna Merônatita, mbamin’ny mponina ao Gabaôna sy i Masfà no nanamboatra teo anilany, akaikin’ny fitsaran’ny governoran’ny any an-dafin’ny ony;

⁸ i Oziela zanak’i Araiasa lohan’ny mpanefy volamena, nanamboatra teo anilany; ary i Anania isan’ny fikambanan’ny mpanao zava-manitra no nanamboatra teo anilany; navelany i Jerosalema hatreo amin’ny manda malalaka.

⁹ Namboatra teo anilany, i Rafaiasa zanak’i Hora, lehiben’ny antsasaky ny faritanin’i Jerosalema.

¹⁰ Teo anilany dia i Jedaiasa zanak’i Haromafa no nanamboatra tandrifin’ny tranony; ary teo anilany dia i Hatosa zanak’i Haseboniasa no nanamboatra.

¹¹ Ny laniny sasany amin’ny manda sy ny tilikambon’ny fatana fandoroana kosa, namboarin’i Melkiasa zanak’i Herema sy i Hasoba zanak’i Fahata-Moaba.

¹² Teo anilany dia i Seloma zanak’i Alohesa, lehiben’ny antsasaky ny faritanin’i Jerosalema, no nanamboatra niaraka tamin’ny zanany vavy.

¹³ I Hanòna sy ny mponina ao Zanôe no nanamboatra ny vavahadin’ny Lohasaha; narafiny izy, dia nalatsany ny lela vavahady, mbamin’ny karetsaka sy ny barany; fanampin’izany koa dia nanao ny manda arivo hakiho, hatreo amin’ny vavahadin’ny Zezika izy.

¹⁴ I Melkiasa zanak’i Rekaba, lehiben’ny faritanin’i Betakarama no namboatra ny vavahadin’ny Zezika; narafiny izy, dia nalatsany ny lela vavahady, mbamin’ny karetsaka sy ny barany.

¹⁵ I Seloma zanak’i Kôlkôzà, lehiben’ny faritanin’i Masfà, no namboatra ny vavahadin’ny Loharano; narafiny sy notafoany izy, dia nalatsany ny lela vavahady, mbamin’ny karetsaka sy ny barany; fanampin’izany koa nanao ny mandan’ny farihin’i Siloe, anilan’ny zaridainan’ny Mpanjaka izy, hatreo amin’ny ambaratonga midina avy any an-tanànan’i Davida.

¹⁶ Nanaraka azy, i Nehemia zanak’i Azbôka, lehiben’ny antsasaky ny faritanin’i Betsora, namboatra hatreo amin’ny tandrifin’ireo fasan’i Davida, hatreo amin’ilay dobo voafaritra sy hatreo amin’ny tranon’ny Lehilahy mahery.

¹⁷ Nanamboatra nanaraka azy, ny Levita tarik’i Rehoma, zanak’i Benì. Nanamboatra teo anilany ho an’ny faritaniny, i Hasebiasa lehiben’ny antsasaky ny faritanin’i Keilà.

¹⁸ Nanamboatra nanarakaraka azy, ireo rahalahiny tarik’i Bavaì zanak’i Henadada, lehiben’ny antsasaky ny faritanin’i Keilà.

¹⁹ Teo anilany dia i Azera zanak’i Jôsoe, lehiben’i Masfà, no nanamboatra ny ilan’ny manda, teo an-tandrifin’ny fiakaran’ny fitahirizam-piadiana, eo amin’ny zoro.

²⁰ Nanarakaraka azy dia i Baròka zanak’i Zakaì, no nanamboatra tamin-kavitrihana ny ilany anankiray, hatreo amin’ny zoro ka hatreo amin’ny varavaran’ny tranon’i Eliasiba, mpisorona lehibe.

²¹ Nanarakaraka azy dia i Merimota zanak’i Oria zanak’i Akôsa no nanamboatra ny ilany anankiray hatreo amin’ny varavaran’ny tranon’i Eliasiba, ka hatrarỳ amin’ny faran’ny tranon’i Eliasiba.

²² Ny nanarakaraka azy dia ireo mpisorona, lehilahin’ny tany lemak’i Jordany.

²³ Manarakaraka ireo, dia i Benjamina sy i Hasoba nanamboatra teo an-tandrifin’ny tranony. Manarakaraka ireo, i Azariasa zanak’i Maasiasa zanak’i Anania, nanamboatra teo akaikin’ny tranony.

²⁴ Manarakaraka azy, i Benoy zanak’i Henadada, namboatra ny laniny iray, hatreo amin’ny tranon’i Azariasa ka hatreo amin’ny zorony sy hatreo amin’ny fiolahana.

²⁵ I Falefa zanak’i Ozỳ, nanamboatra teo an-tandrifin’ny zorony sy ny tilikambo avo izay mibohitra eo alohan’ny tranon’ny mpanjaka, akaikin’ny tokonan’ny tranomaizina. Manarakaraka io dia i Fadaiasa zanak’i Farosa.

²⁶ Ary ny Natineanina dia nonina teo amin’ny Ofela, hatreo an-tandrifin’ny vavahadin’ny Rano, any atsinanana, sy ny tilikambo mandroso.

²⁷ Manarakaraka azy, ny Tekôita namboatra ny laniny iray, tandrifin’ny tilikambo lehibe mibohitra, ka hatreo amin’ny mandan’i Ofela.

²⁸ Teo ambonin’ny vavahadin’ny Soavaly dia ny mpisorona no samy namboatra ny tandrifin’ny tranony avy.

²⁹ Manarakaraka azy, i Sadôka zanak’i Emera nanamboatra ny teo anoloan’ny tranony; manarakaraka azy, nanamboatra i Semeiàsa zanak’i Sikemiasa mpiandry ny vavahady atsinanana amin’ny tempoly.

³⁰ Manarakaraka azy, i Hananiasa zanak’i Selemiasa sy i Hanòna fahenin’ny zanak’i Selefa, namboatra ny laniny iray hafa. Manarakaraka azy i Mosolama, zanak’i Barakia, nanamboatra ny teo anoloan’ny tranony.

³¹ Manarakaraka azy, i Melkiasa isan’ny fikambanan’ny mpanefy volamena, nanamboatra hatreo amin’ny tranon’ny Natineanina sy ny mpivarotra, teo anoloan’ny vavahadin’i Mifkada ka hatreo amin’ny trano ambony eo an-jorony.

³² Ary ny mpanefy volamena sy ny mpivarotra namboatra ny eo anelanelan’ny trano ambony eo an-jorony sy ny vavahadin’ny Ondry.

Fanoheran’ireo fahavalon’ny Jody

³³ Tezitra ary nisafoaka mafy i Sanabalata, nony nandre fa hoe: mandrafitra ny manda indray izahay. Dia naneso ny Jody izy.

³⁴ Dia niteny teo anatrehan’ireo rahalahiny sy ireo miaramilan’i Samaria izy nanao hoe: «Asa inona no ndeha hataon’ireo Jody tsy mahefa? Dia havelan’ny olona hanao eo ve ireo? Hahatitra sorona eo va ireo? Hahavita amin’ny indray andro va ireo? Hahatsangana ny vato voalevina any ambany vovo-tany miavosa sy levon’ny afo va ireo?»

³⁵ Hoy koa i Tobia Amônita, teo anilany: «Avelao ihany hamboatra eo ireo, fa na fosa iray aza hiantoraka eo dia haharava ny manda vaton’ireo!»

³⁶ «Mihainoa, ry Andriamanitray ô, fa voaeso izahay. Atsingereno amin’ny lohany ny famingavingana nataony, ary atolory ho remby eny amin’ny tany hamaboana azy izy!

³⁷ Aza avela ny helony, ary aza vonoina tsy ho eo anatrehanao ny fahotany, fa efa nanao fanafintohinana teo anatrehan’ireto mandrafitra izy.»

³⁸ Dia narafitray ny manda, ka voatsangana indray avokoa ny manda manodidina hatreo amin’ny antsasaky ny haavony, fa niasa an-jotom-po ny vahoaka.