Mpitsara 5 - Baiboly Katolika

TONONKIRAN’I DEBORA SY I BARAKA

¹ Tamin’izany andro izany dia nihira i Debôrà sy i Baràka zanak’i Abinôema nanao hoe:

² «Nitsangana hitarika ny lehibe ao amin’i Israely; ny vahoaka nanolo-tena an-tsitrapo hiady; ka misaora an’i Iaveh amin’izany ianareo!

³ Mihainoa, ry mpanjaka, mampandria sofina, ry mpanjaka: fa izaho dia izaho no hidera an’i Iaveh amin’ny hira, hilaza hira ho an’i Iaveh Andriamanitr’i Israely aho.

⁴ Iaveh ô, fony ianao nivoaka avy any Seira, nony nandroso avy any an-tsahan’i Edôma, nihorohoro ny tany, ny lanitra aza nitsonika, ary nitsonika ho rano ny rahona.

⁵ Nihozongozona teo anatrehan’i Iaveh ny tendrombohitra, dia io Sinaia io teo anatrehan’i Iaveh Andriamanitr’i Israely.

⁶ Tamin’ny andron’i Simagara, zanak’i Amata, tamin’ny andron’i Jahela ny lalam-be tsy nodiavina, fa ny sakeli-dalana mihodivitra no nomban’ny mpandeha.

⁷ Lao ny tany an-tsahan’i Israely, mandra-pitsangako, izaho Debôrà, mandra-pitsangako izaho reny teo amin’i Israely.

⁸ Fa nifidy andriamani-baovao ny olona, ka nitsidika eo am-bavahady ny ady, ary ny ampinga aman-defona tsy nisy hita, teo amin’ny olona efatra alina, amin’i Israely.

⁹ Miantoraka amin’ny mpitondra an’i Israely ny foko sy amin’ny vahoaka anisan’ny nanolo-tena: Misaora an’i Iaveh!

¹⁰ Ianareo izay mitaingina ampondravavy fotsy, ianareo izay mipetraka amin’ny karipetra, ary ianareo izay mizotra eny an-dalana, mihirà ianareo.

¹¹ Aoka ny mpandefa zana-tsipîka eo akaikin’ny rano fisotroam-biby, hankalaza amin’ny feony ny fahamarinan’i Iaveh, dia ny fahamarinana nataony tamin’ny taniny, ao amin’i Israely! Tamin’izay ny vahoakan’i Iaveh nidina ho eny am-bavahadiny.

¹² Mifohaza, mifohaza, ry Debôrà, mifohaza, mifohaza ka manaova hira anankiray! mitsangàna, ry Baràka, sambory izay ho babonao, ry zanak’i Abineômo.

¹³ Midìna amin’izay ny sisan’ny andriana amin’ny vahoaka! Midìna ho atỳ amiko, Iaveh, eo amin’ireo olo-mahery!

¹⁴ Avy any amin’i Efraima ny olona izay mandatsa-paka amin’i Amaleka; nikambana tamin’ny antokonao i Benjamina teo aorianao; avy any amin’i Makira nisy lehibe nidina, avy any amin’i Zabolôna nisy mpitondra nitana ny tehin’ny mpanoratra.

¹⁵ Miakara amin’i Debôrà, ny andrian’i Isakara, eo anilan’i Baràka i Isakara, teo an-tany lemaka dia voairaka hanaraka azy izy. Teo akaikin’ny sakeli-dranon-dRobena, nisy fikasana lehibe tao am-po:

¹⁶ Nahoana no nijanona teo afovoan’ny tanimbolinao ianao, nihaino ny feon-tsodin’ny mpiandry ondrinao? Teo akaikin’ny sakeli-dranon-dRobena nisy fikasana lehibe tao am-po.

¹⁷ I Galaada tsy nandao ny fonenany tany an-dafin’i Jordany; ary i Dana, nahoana no nitoetra tao an-tsambony? I Asera nijanona tsy nihetsika akory teo amoron-dranomasina; teo am-pitodian-tsambony no nijanonany.

¹⁸ Fa i Zabolôna no firenena manao vy very ny ainy; torak’izany koa i Neftalì eo amin’ny havoany marin-tampona.

¹⁹ Tonga ireo mpanjaka ka nandrafitra ady izy ireo, nandrafitra ady tamin’izay ireo mpanjakan’i Kanaana, dia tao Tanàka teo amoron’ny ranon’i Magedao, fa tsy nahazo na dia akoram-bolafotsy iray aza.

²⁰ Ny tany an-danitra no niady ho antsika, ny kintana tamin’ny lalana ombany no niady tamin’i Sisarà.

²¹ Ny ranon-driaka Sisaona no nanakodia ny fatin’ireny, dia ny ranon-driaka tamin’ny andro fahagola, ny ranon-driaka Sisôna. Mandrosoa an-kasahiana, ry fanahiko ô!

²² Nikatrokatroka tamin’izay ny kitron’ny soavaly, tamin’ny hazakazaka, dia ny firiotran’ny mpiadiny,

²³ Ozòny i Mezôra, hoy ny Anjelin’i Iaveh, Ozòny dia ozòny ny mponina ao! Fa tsy mba tonga hanampy an’i Iaveh ireny, fa tsy nanampy an’i Iaveh ireny niaraka tamin’ny mahery.

²⁴ Hosoavina noho ny vehivavy i Jahela vadin’i Hebera, Kineanina; hosoavina noho ny vehivavy mitoetra an-day anie izy.

²⁵ Rano no nangatahiny, ronono no nomeny azy; ronono tsy misy fangarony no natolony tamin’ny kopy mihaja.

²⁶ Ny tanany anila mandray ny tsima-day, ary ny tanany havanana ny tantanan’ny mpiasa. Dia asiany i Sisarà, vakìny ny lohany; torotoroiny, gorobahany ny fihirifany.

²⁷ Miretaka eo an-tongony, lavo miampatra izy; miretaka eo an-tongony lavo izy, ary eo amin’izay iretahany ihany, no itsirany tsy misy aina intsony.

²⁸ Eo am-baravarankely amin’ny makarakara, no mijery ny renin’i Sisarà sady mikiakiaka: ‹Nahoana izato kalesiny no dia ela fiavy? Nahoana izato saretiny no dia miadam-pandeha?›

²⁹ Ny mahira-tsaina amin’ny andriambavy tandapany no mamaly azy; ary ny tenin’ireo no averiny ao am-pony:

³⁰ Tsy nahita va izy ireo, tsy mizara babo va izy ireo? Zazavavy iray, zazavavy roa ho an’ny isa-mpiady; lamba misoratsoratra ho babon’i Sisarà; lamba samihafa soratra ho babo, lamba misoratsoratra iray, lamba roa samy hafa soratra ho eo an-tsoroky ny vavy.

³¹ Ny fahavalonao rehetra anie ho levona toy izany, Iaveh ô, ary izay tia Anao kosa, hanahaka ny masoandro raha ilay miposaka amin’ny heriny izy!»

³² Dia nandry efapolo taona ny tany.