Lioka 23 - Baiboly Katolika

¹ Tamin’izay dia nitsangana izy rehetra ka nitondra an’i Jesoa tany amin’i Pilaty,

I Jesoa eo anatrehan’i Pilaty

² Ary ry zareo niampanga Azy toy izao: «Azonay nampiodina ny firenenay Ilay io, sy nandrara tsy handoa hetra ho an’i Sezara, ary nilaza ny Tenany ho Kristy mpanjaka.»

³ Dia nanontany Azy i Pilaty nanao hoe: «Moa mpanjakan’ny Jody va Ianao?» ka novaliany hoe: «Voalazanao.»

⁴ Ary hoy i Pilaty tamin’ny lohandohan’ny mpisorona sy ny vahoaka: «Tsy hitako izay mahameloka io Lehilahy io.»

⁵ Fa vao mainka nanao letrezana izy ireo nanao hoe: «Mampiodina ny vahoaka Izy, aeliny eran’i Jodea manontolo ny fampianarany, dia hatrany Galilea izay nanombohany ka hatraty.»

⁶ Nony nandre ny teny hoe Galilea i Pilaty, dia nanontany raha olona avy any Galilea Izy,

⁷ ka nony fantany fa hoe avy any amin’ny tany fehezin’i Herôda Izy, dia nampanateriny tany amin’i Herôda, izay tao Jerosalema koa tamin’izany andro izany.

I Jesoa eo anatrehan’i Herôda

⁸ Faly dia faly i Herôda nony nahita an’i Jesoa, fa ela no naniriany hahita Azy, noho ny fandrenesany Azy efa maresaka erỳ, sady nanantena izy fa hahita Azy hanao fahagagana.

⁹ Nanao fanontaniana maro taminy izy, fa tsy namaly na inona na inona kosa i Jesoa.

¹⁰ Eo izany ny lohandohan’ny mpisorona sy ny mpanora-dalàna efa nikiribiby erỳ miampanga Azy.

¹¹ Dia notebahin’i Herôda sy ny miaramilany Izy, ka nony efa nampiakanjoiny akanjo fotsy sy nolalaoviny, dia naveriny tany amin’i Pilaty indray.

¹² Tamin’izay andro izay dia tonga nisakaiza terỳ i Herôda sy i Pilaty, ilay efa nifandrafy teo iny.

I Jesoa averina eo anatrehan’i Pilaty

¹³ Nasain’i Pilaty novorina ny lohandohan’ny mpisorona sy ny mpifehy ary ny vahoaka,

¹⁴ dia nilazany hoe: «Nentinareo tatỳ io Lehilahy io, fa hoe mandrendri-bahoaka hikomy, ary efa nanadina Azy teo anatrehanareo aho, nefa tsy hitako velively izay helony amin’izay iampanganareo Azy.

¹⁵ Tahaka izany koa i Herôda, fa namerina Azy ho atỳ amintsika Izy; ary indro tsy misy na inona na inona tokony hanamelohana Azy ho faty.

¹⁶ Koa hofaiziko Izy, dia halefako.»

¹⁷ Fa tsy maintsy mandefa mpifatotra iray ho an’ny vahoaka rahateo izy amin’ny andro fety.

¹⁸ Kanjo indray niredona ny vahoaka niantso hoe: «Vonoy io, fa i Barabasy alefaso ho anay.»

¹⁹ I Barabasy anefa dia natao an-tranomaizina, satria sendra nisy fikomiana tao an-tanàna, ka namono olona izy.

²⁰ Dia mbola niteny ihany i Pilaty, fa te handefa an’i Jesoa;

²¹ nefa niantso mafy ny vahoaka nanao hoe: «Fantsiho! fantsiho amin’ny Hazofijaliana Izy!»

²² Fa niteny tamin’izy ireo fanintelony indray i Pilaty nanao hoe: «Inona àry no ratsy nataony? Tsy hitako izay heloka tokony hahafaty Azy; ka hofaiziko Izy, dia halefako.»

²³ Nefa nikiry izy ireo niantso mafy nangataka Azy hofantsihana amin’ny Hazofijaliana, ka nitombo nitombo ihany ny horakoraka.

²⁴ Dia nasain’i Pilaty hatao izay nangatahiny;

²⁵ ilay notadiaviny ho afaka sy natao an-tranomaizina noho ny fikomiana sy vonoana olona moa nalefany, ary i Jesoa kosa natolony hanaovany izay sitrapony.

Eny an-dalana mankany amin’ny Kalvery

²⁶ Ary raha nitondra Azy izy ireo, dia nisy lehilahy Sireneanina anankiray avy any an-tsaha atao hoe Simôna notanany, dia nampitondrainy ny Hazofijaliana nanaraka an’i Jesoa.

²⁷ Nisy vahoaka betsaka nanaraka Azy sy vehivavy koa izay nandòn-tratra nitomany Azy.

²⁸ Fa nitodika azy ireo i Jesoa ka nanao hoe: «Ry zanaka vavin’i Jerosalema, aza mitomany Ahy foana, fa ny tenanareo sy ny zanakareo no itomanio,

²⁹ fa indro ho avy ny andro hanaovana hoe: ‹Sambatra ny momba sy ny kibo izay tsy niteraka ary ny nono izay tsy ninonoana.›

³⁰ Amin’izay ny olona vao hilaza amin’ny tendrombohitra hoe: ‹Mianjerà aminay› sy amin’ny havoana hoe: Saròny izahay;

³¹ fa raha toy izany no ataony amin’ny hazo lena, hatao ahoana amin’ny maina?»

³² Ary nisy olon-dratsy roa lahy koa nentin’ny miaramila, hiara-kovonoina amin’i Jesoa.

Famantsihana amin’ny Hazofijaliana

³³ Nony tonga tany amin’ny fitoerana atao hoe Kalvery izy ireo, dia nofantsihany tamin’ny Hazofijaliana Izy, sy ireo mpangalatra ireo, ny iray moa teo ankavanany ary ny iray kosa teo ankaviany.

³⁴ Dia hoy i Jesoa: «Raiko, avelao ny helony, fa tsy fantany izay ataony.» Ary nanaovan’izy ireo loka no fizara ny fitafiany.

I Jesoa eo amin’ny Hazofijaliana esoina sy tevatevaina

³⁵ Ny vahoaka nijanona nijery teo, ary ny loholona avy no nandatsa Azy nanao hoe: «Namonjy ny sasany Izy ka aoka hamonjy ny Tenany, raha Izy no Kristin’Andriamanitra, Ilay voafidy.»

³⁶ Ny miaramila koa naneso Azy ka nanatona nanolotra vinaingitra Azy,

³⁷ ary nanao hoe: «Raha Ianao no Mpanjakan’ny Jody, vonjeo ny Tenanao.»

³⁸ Teo ambonin’ny lohany koa dia nisy soratra tamin’ny teny grika sy latinina ary hebrio nanao hoe: ITY NO MPANJAKAN’NY JODY.

Ilay jiolahy nivalo

³⁹ Ary ny anankiray tamin’ireo mpangalatra izay nihantona teo dia nanevateva Azy nanao hoe: «Raha Ianao no Kristy, vonjeo ny Tenanao sy izahay.»

⁴⁰ Fa nanarin’ilay anankiray izy, nataony hoe: «Ialahy koa ve tsy matahotra an’Andriamanitra, saingy hoe samy voaheloka ho faty izao?

⁴¹ Ny antsika dia rariny izao, satria mandray ny valin’ny ratsy nataontsika isika; fa ny Azy kosa tsy mba nanao ratsy na inona na inona Izy.»

⁴² Dia hoy izy tamin’i Jesoa: «Tompoko, tsarovy aho rehefa mby any amin’ny fanjakanao Ianao.»

⁴³ Ka hoy ny navalin’i Jesoa azy: «Lazaiko marina aminao fa anio dia hihaona amiko any am-paradisa ianao.»

Ny nahafatesan’i Jesoa

⁴⁴ Ary rehefa tokony ho tamin’ny ora fahenina, dia rakotra haizina ny tany rehetra ka naharitra hatramin’ny ora fahasivy izany,

⁴⁵ fa nihamaizina ny masoandro; ary rovitra nisasaka roa ny efitra lamba tao amin’ny Tempoly.

⁴⁶ Ary niantso tamin’ny feo mahery i Jesoa nanao hoe: «Raiko! apetrako ao an-tananao ny fanahiko.» Nony voalazany izany, dia niala aina Izy.

Taorian’ny nahafatesan’i Jesoa

⁴⁷ Rehefa nahita ny zava-niseho teo ny kapiteny, dia nankalaza an’Andriamanitra ka nanao hoe: «Tena olo-marina tokoa io Lehilahy io.»

⁴⁸ Ny vahoaka rehetra vory teo mba hijery koa, nony nandinika ny zava-niseho, dia lasa niverina nandondòna ny tratrany.

⁴⁹ Fa ny olom-pantatr’i Jesoa rehetra kosa dia nijoro teny lavidavitra omban’ireo vehivavy nanaraka Azy avy tany Galilea, ka samy nijery izany.

Ny nandevenana an’i Jesoa

⁵⁰ Ary nisy lehilahy tsara fanahy sady marina anankiray atao hoe Josefa izay anisan’ny Sanedrìna;

⁵¹ tsy mba nisy neken’izy io na ny hevi-dratsin’ny sasany na ny nataon’izy ireo; avy any Arimatia tanànan’i Jodea izy, ary mba nanantena ny fanjakan’Andriamanitra koa.

⁵² Nanatona an’i Pilaty izy, ka nangataka ny vatan’i Jesoa.

⁵³ Dia nampidininy ny faty ka nofonosiny lamba, ary naleviny tao anatin’ny fasana anankiray nolavahana tamin’ny vato, sy tsy mbola nandevenana olona.

⁵⁴ Andro fiomanana tamin’izay andro izay, sady efa hiantomboka ny sabata.

⁵⁵ Ary ny vehivavy nanaraka an’i Jesoa avy tany Galilea dia niaraka tamin’i Josefa koa, ka nijery ny tao am-pasana sy izay fomba hametrahana ny vatan’i Jesoa.

⁵⁶ Rehefa niverina avy any izy ireo, dia namboatra zava-manitra sy menaka manitra; fa nony sabata ny andro vao nitsahatra araka ny Lalàna izy.