Levitikosy 11 - Baiboly Katolika

3 FITSIPIKA MOMBA NY MADIO SY NY MALOTO Biby madio sy biby maloto A. Biby etỳ an-tany

¹ Ary niteny tamin’i Môizy sy i Aarôna i Iaveh nanao tamin’izy ireo hoe:

² «Mitenena amin’ny zanak’i Israely ka lazao hoe: Izao no ho biby fihinanareo amin’ny biby rehetra eto ambonin’ny tany:

³ Ny biby rehetra mivaky kitro sy misampan-tongotra ary mandinika no hohaninareo;

⁴ fa ny mandinika fotsiny na ny mivaky kitro fotsiny tsy hohaninareo. Ohatra ny rameva, izay mandinika nefa tsy mivaky kitro, dia ho maloto eo aminareo.

⁵ Ohatra ny zerboaza, izay mandinika fa tsy mivaky kitro, dia ho maloto aminareo.

⁶ Ohatra ny bitro, izay mandinika fa tsy misampan-tongotra, dia ho maloto aminareo.

⁷ Ohatra ny kisoa, izay mivaky kitro sy misampan-tongotra nefa tsy mandinika, dia ho maloto aminareo.

⁸ Koa aza mihinana ny henany, na mikasika izay fatiny akory, fa maloto aminareo ireny.»

B. Biby anaty rano

⁹ «Izao kosa no ho biby fihinanareo, amin’ny biby rehetra ao anaty rano: izay rehetra misy vombony sy misy kirany ao anaty rano, na ao an-dranomasina, na ao an-drenirano, no hohaninareo.

¹⁰ Fa ho fahavetavetana ho anareo kosa izay tsy misy vombony na kirany, na ny ao an-dranomasina, na ny ao an-drenirano, amin’ny biby rehetra mihetsiketsika ao anaty rano, sy amin’ny zava-manana aina rehetra misy ao.

¹¹ Ho fahavetavetana aminareo ireny, ka aza mihinana ny henany, ary ataovy zava-betaveta ny fatiny.

¹² Izay tsy misy vombony na kirany ao anaty rano, dia ho zava-betaveta avokoa aminareo.»

D. Ny vorona

¹³ «Amin’ny vorona kosa, dia ireto no ho zava-betaveta ho anareo ka tsy hohanina, fa zava-betaveta:

¹⁴ ny egla, ny arofiray, ny papango, ny fanindry, ny voromahery isan-karazany,

¹⁵ ny goaika isan-karazany,

¹⁶ ny aostritsa, ny tararaka, ny vorondriaka, ny hitsikitsika isan-karazany,

¹⁷ ny vorondolo, ny manarana, ny vorondolobe,

¹⁸ ny gisabe, ny pelikano, ny zipaety,

¹⁹ ny vanobe, ny vano isan-karazany; ny lavasanga, ny ramanavy.»

E. Biby madinika manana elatra

²⁰ «Ny biby madinika rehetra manana elatra, mandia tongotra efatra, ho zava-betaveta aminareo.

²¹ Amin’ny biby madinika manana elatra mandia tongotra efatra anefa, hano ihany izay manam-pingotra ambony faladia, hitsipihany eo amin’ny tany.

²² Ireto no ho fihinanareo amin’ireny: ny valala isan-karazany, ny solama isan-karazany, ny hargôla isan-karazany.

²³ Fa ny biby hafa manana elatra mandia tongotra efatra, dia ho zava-betaveta aminareo avokoa.»

Fikasihana biby maloto

²⁴ «Izao koa no hahaloto anareo, ka na zovy na zovy no hikasika ny fatiny, dia haloto mandra-paharivan’ny andro;

²⁵ ary na zovy na zovy hitondra tapaky ny fatiny dia hanasa ny fitafiany sy haloto mandra-paharivan’ny andro.

²⁶ Ny biby rehetra mivaky kitro, nefa tsy misampan-tongotra sy tsy mandinika, dia haloto aminareo, ka haloto izay rehetra mikasika azy.

²⁷ Amin’ny biby mandia tongotra efatra, izay mandeha amin’ny faladiany dia haloto aminareo, ka haloto mandra-pahariva ny andro izay rehetra mikasika ny fatiny;

²⁸ ary izay rehetra nitondra ny fatiny dia hanasa ny fitafiany sy haloto mandra-paharivan’ny andro. Ho zava-maloto aminareo ireo biby ireo.»

F. Biby madinika mandady

²⁹ «Amin’ny biby madinika mandady amin’ny tany, ireto no ho maloto aminareo: ny kionkiona, ny totozy, ny androngo isan-karazany;

³⁰ ny mosaraina, ny tanalahy, ny salamandry, ny tsàtsaka, ary ny taopy.»

Fitsipika hafa momba ny fikasihana biby maloto

³¹ Ireo no ho maloto aminareo amin’ny biby mandady; ka haloto mandra-paharivan’ny andro izay rehetra mikasika ny fatin’ireo.

³² Haloto avokoa ny zavatra ilatsahan’ny fatin’ireo, na fanaka hazo, na fitafiana, na hoditra, na lasàka, na inona na inona zavatra ampiasaina; ka hapetraka ao anaty rano izany ary haloto mandra-paharivan’ny andro, vao hadio.

³³ Ary raha misy zavatra amin’ireny sendra tafalatsaka ao anatin’ny vilany tany, dia haloto avokoa izay rehetra ao anaty vilany, ka homontsaninareo ny vilany.

³⁴ Haloto ny zava-pihinana rehetra nandrahoina tamin’ny rano, haloto ny zava-pisotro izay isotroana na inona na inona tavy misy azy.

³⁵ Haloto avokoa ny fanaka ilatsahan-javatra avy amin’ny fatin’ireny, ka ravana ny lafaoro mbamin’ny vilany aman-tsarony, fa haloto izy, ka hataonareo ho zava-maloto.

³⁶ Ny loharano anefa mbamin’ny lavaka fantsakana izay fiangonan-drano, dia hitoetra ho madio ihany, fa izay mikasika ny fatin-javatra no haloto.

³⁷ Raha voa hafafy no hilatsahan-javatra avy amin’ny fatin’ireny, dia hitoetra ho madio ihany;

³⁸ raha nasian-drano anefa ny voa nafafy, no nianjeran-javatra avy amin’ny fatin’ireny, dia hataonareo zava-maloto.

³⁹ Raha biby azonareo hanin-kena no maty, izay mikasika ny fatiny haloto mandra-paharivan’ny andro,

⁴⁰ ary izay mihinana ny fatiny, hanasa ny fitafiany sy haloto mandra-paharivan’ny andro; izay hitondra ny fatiny dia hanasa ny fitafiany sy haloto mandra-paharivan’ny andro.

Fampianarana fahamasinana

⁴¹ Ny biby rehetra mandady amin’ny tany dia ho zava-betaveta aminareo, ka tsy hohanina.

⁴² Aza misy haninareo rehefa mety ho biby mandady amin’ny tany, na ireo mikisaka amin’ny kibony, na ireo mandia tongotra efatra, na ireo manana tongotra maro, fa ho zava-betaveta ireny aminareo.

⁴³ Aza mametaveta ny tenanareo amin’ireny biby mandady rehetra ireny; aza mandoto ny tenanareo amin’ireny fa hahazo loto avy amin’ireny ianareo.

⁴⁴ Fa izaho no Iaveh Andriamanitrareo, ka hanamasina ny tenanareo ianareo dia ho masina satria masina Aho; aza mandoto ny tenanareo amin’izay biby rehetra mandady amin’ny tany.

⁴⁵ Fa Izaho no Iaveh nampiakatra anareo avy amin’ny tany Ejipta, mba ho Andriamanitrareo. Aoka ho masina ianareo satria masina Aho.

Famaranana

⁴⁶ Izany no lalàna momba ny biby mandia tongotra efatra, ny vorona, ny zava-miaina rehetra mihetsiketsika ao anaty rano, ary izay rehetra mandady amin’ny tany,

⁴⁷ mba hanavahanareo izay maloto sy izay madio ary ny biby fihinana sy izay tsy fihinana.