Josoa 21 - Baiboly Katolika

Ireo tanànan’ny fokon’i Levỳ

¹ Nanatona an’i Eleazara, mpisorona, sy i Jôsoe, zanak’i Nona ary ny loham-pianakaviana amin’ny fokon’ny zanak’i Israely, ny loham-pianakavian’ny Levita,

² ka niteny tamin’izy ireo, tao Silô, amin’ny tany Kanaana, nanao hoe: «Didy nomen’i Iaveh an’i Môizy ny hanomezana tanàna honenanay sy ny tany manodidina azy ho an’ny bibinay.»

³ Dia izao no tanàna sy ny tany manodidina azy, nomen’ny zanak’i Israely, avy amin’ny lovany, ho an’ny Levita, araka ny didin’i Iaveh.

⁴ Ny fianakavian’ny Kaatita aloha no nanaovana ny loka, ka tanàna 13 tamin’ny fokon’i Jodà sy ny fokon’i Simeôna, ary ny fokon’i Benjamina no azon’ny taranak’i Aarôna, mpisorona, anisan’ny Levita, tamin’ny filokana,

⁵ ary tanàna 10 tamin’ny fianakaviana, fokon’i Efraima sy fokon’i Dana, ary antsasa-pokon’i Manase, no azon’ny taranak’i Kaata sisa, tamin’ny loka.

⁶ Tanàna 13, tamin’ny fianakaviana fokon’i Isakara sy fokon’i Asera ary fokon’i Neftalì, sy antsasa-pokon’i Manase, any Basàna, no azon’ny taranak’i Gersôna tamin’ny loka.

⁷ Tanàna 12 tamin’ny fokon-dRobena, sy fokon’i Gada, ary fokon’i Zabolôna, no azon’ny taranak’i Merarì, araka ny fianakaviany.

⁸ Ireo sy ny tany manodidina azy no nomen’ny zanak’i Israely tamin’ny loka, ho an’ny taranak’i Levỳ, araka ny didy nomen’i Iaveh tamin’ny alalan’i Môizy.

Zara tanin’ny Kaatita

⁹ Ny tanàna nomeny avy tamin’ny fokon-taranak’i Jodà, sy fokon-taranak’i Simeôna, dia ireto voatondro amin’ny anarany avy;

¹⁰ dia ho an’ny taranak’i Aarôna, izay anisam-pianakavian’ny Kaatita amin’ny taranak’i Levì, fa izy ireo no nanaovana ny loka voalohany.

¹¹ Dia nomeny azy, tao amin’ny tendrombohitr’i Jodà, ny tanànan’i Arbe, rain’i Enàka, dia i Hebrôna izany, ary ny tany manodidina azy.

¹² Fa ny saha momba izany tanàna izany sy ny zana-bohiny kosa anefa dia nomeny an’i Kaleba, zanak’i Jefone, ho fananany.

¹³ Ny taranak’i Aarôna mpisorona dia nomeny ny tanàna fialofan’ny mamono olona, dia i Hebrôna sy ny manodidina azy, ary koa i Lebnà sy ny manodidina azy,

¹⁴ i Jetera sy ny manodidina azy, i Estemao sy ny manodidina azy,

¹⁵ i Hôlôma sy ny manodidina azy, i Dabira sy ny manodidina azy,

¹⁶ i Aina sy ny manodidina azy, i Jeta sy ny manodidina azy, i Betsamesy sy ny manodidina azy, tanàna sivy no azy amin’ireo foko roa ireo.

¹⁷ Ny avy amin’ny fokon’i Benjamina, dia i Gabaôna sy ny manodidina azy, i Gabaà sy ny manodidina azy,

¹⁸ i Anatôta sy ny manodidina azy, i Almôna sy ny manodidina azy, dia tanàna efatra.

¹⁹ Totalin’ny tanànan’ny mpisorona, taranak’i Aarôna, 13 omban’ny manodidina azy.

²⁰ Ny amin’ny fianakavian’ny zanak’i Kaata izay Levita, dia ny zanak’i Kaata sisa kosa, dia tanàna avy amin’ny fokon’i Efraima, no azony tamin’ny loka.

²¹ Nomena azy i Sikema, tanàna fialofan’izay namono olona, mbamin’ny tany manodidina azy, amin’ny tendrombohitr’i Efraima;

²² ary koa i Gazera sy ny manodidina azy, i Kibsama sy ny manodidina azy, i Bety-Hôrôna sy ny manodidina azy: tanàna efatra.

²³ Ny avy amin’ny fokon’i Dana, i Eltekao sy ny manodidina azy, i Gabatôna sy ny manodidina azy,

²⁴ i Ajalôna sy ny manodidina azy; i Geta-Remôna sy ny manodidina azy: tanàna efatra.

²⁵ Ny avy amin’ny antsasaky ny fokon’i Manase dia i Tanàka sy ny manodidina azy ary i Geta-Remôna sy ny manodidina azy: tanàna roa.

²⁶ Folo no totalin’ny tanàna omban’ny manodidina azy no an’ny fianakavian’ny zanak’i Kaata sisa.

Zara tanin’ny taranak’i Gersôna

²⁷ Izao no nomena ny taranak’i Gersôna, anisan’ny fianakavian’ny Levita: avy amin’ny antsasaky ny fokon’i Manase, ilay tanàna fialofan’izay namono olona, dia i Gaolôna, any Basàna, sy ny manodidina azy; ary koa i Bôsrà sy ny manodidina azy: tanàna roa.

²⁸ Avy amin’ny fokon’i Isakara: i Kesiôna sy ny manodidina azy;

²⁹ i Dabereta sy ny manodidina azy; i Jaramota sy ny manodidina azy, i En-Ganima sy ny manodidina azy: tanàna efatra.

³⁰ Avy amin’ny fokon’i Asera: i Masàla sy ny manodidina azy, i Abdôna sy ny manodidina azy,

³¹ i Helkata sy ny manodidina azy, i Rohaba sy ny manodidina azy: tanàna efatra.

³² Avy amin’ny fokon’i Neftalì ilay tanàna fialofan’izay namono olona, i Kadesy any Galilea sy ny manodidina azy, i Kartàna sy ny manodidina azy, tanàna telo.

³³ Totalin’ny tanànan’ny Gersônita, araka ny fianakaviany: tanàna 13 omban’ny manodidina azy.

Zara tanin’ny taranak’i Merarỳ

³⁴ Izao no nomena ny fianakavian’ny taranak’i Merarỳ, Levita sisa; avy amin’ny fokon’i Zabolôna: i Jeknama sy ny manodidina azy; i Kartà sy ny manodidina azy;

³⁵ i Damnà sy ny manodidina azy, i Naalôla sy ny manodidina azy: tanàna efatra.

³⁶ Avy amin’ny fokon’i Gada: ilay tanàna fialofan’izay namono olona, dia i Ramôta avy any Galaada sy ny manodidina azy,

³⁷ ary koa i Manaïma sy ny manodidina azy, i Hesebona sy ny manodidina azy, i Jazera sy ny manodidina azy: tanàna efatra izy rehetra.

³⁸ Totalin’ny tanàna azon’ny taranak’i Merarì, araka ny fianakaviany tamin’ny loka, dia ny fianakavian’ny Levita sisa: tanàna 12.

³⁹ Ny totalin’ny tanànan’ny Levita teo amin’ny fananan’ny zanak’i Israely dia 48 sy ny manodidina azy.

⁴⁰ Samy manana ny tany manodidina azy avokoa ireo tanàna ireo; toy izany daholo ireo tanàna rehetra ireo.

Famaranana ny fizaràna tany

⁴¹ Dia nomen’i Iaveh an’i Israely avokoa izany, ny tany rehetra nianianany homena ny razany, ka nalain’izy ireo ho fananany sy nonenany.

⁴² Nampandry fahalemana azy tamin’ireo manodidina azy i Iaveh, araka ny efa nianianany tamin’ny razany, ka tsy nisy nahatoha azy ny fahavalony na dia iray aza, ary natolotr’i Iaveh teo an-tanany izy.

⁴³ Tsy nisy foana akory, na dia iray aza, ny teny soa rehetra nolazain’i Iaveh tamin’ny taranak’i Israely, fa tanteraka avokoa.