Jaona 8 - Baiboly Katolika

¹ I Jesoa kosa nankany an-tendrombohitra Oliva,

² fa nony maraina koa vao niverina tany an-Tempoly Izy, ka nanatona Azy ny vahoaka rehetra, dia nipetraka nampianatra azy ireo Izy.

³ Ary nisy vehivavy anankiray azo nijangajanga nentin’ny mpanora-dalàna sy ny Farisianina, ka narosony teo afovoany.

⁴ Dia hoy izy tamin’i Jesoa. «Ry Mpampianatra, azo nijangajanga ity vehivavy ity.

⁵ Ary i Môizy ao amin’ny Lalàna dia nandidy antsika hitora-bato ny olona toy izany, fa Ianao kosa mba ahoana, hoy Ianao?»

⁶ Izy no nanao izany dia ny hakany fanahy Azy, mba hisy hiampangany Azy. Fa i Jesoa kosa niondrika dia nanoratra tamin’ny rantsan-tanany teo amin’ny tany.

⁷ Ry zareo amin’izany tsy nitsahatra, fa mbola nanontany Azy ihany, ka nitraka Izy dia nanao taminy hoe: «Izay tsy manam-pahotana aminareo no aoka hitora-bato azy voalohany.»

⁸ Dia niondrika indray Izy ka nanoratra teo amin’ny tany.

⁹ Fa ry zareo kosa nony nandre izany, dia nihatakataka tsirairay, ny zokinjokiny no loha làlana, ka i Jesoa irery sisa nijanona sy ilay vehivavy teo afovoany.

¹⁰ Izay vao nitraka i Jesoa, ka nanao taminy hoe: «Ravehivavy, aiza ry zareo niampanga anao teo? Moa tsy nisy nanameloka anao va?»

¹¹ «Tsy nisy, Tompoko, hoy izy. Izaho koa tsy hanameloka anao, hoy i Jesoa. Mandehana, ka aza manota intsony.»

I Jesoa fahazavan’izao tontolo izao

¹² Ary niteny tamin’ny olona indray i Jesoa, ka nanao hoe: «Izaho no fahazavan’izao tontolo izao: izay manaraka Ahy tsy mandeha amin’ny maizina, fa hanana ny fahazavan’ny fiainana.»

Ady hevitra momba ny fanambaràn’i Jesoa ny Tenany

¹³ Dia hoy ny Farisianina taminy: «Manambara Tena Ianao, ka tsy marina ny fanambarànao.»

¹⁴ Fa namaly i Jesoa ka nanao taminy hoe: «Na dia manambara Tena aza Aho. dia marina ny fanambaràko, satria fantatro Izay niaviako sy izay alehako, ary ianareo tsy mahalala izay iaviako na izay alehako.

¹⁵ Ianareo mitsara araka ny nofo, fa Izaho kosa tsy mitsara olona na iza na iza.

¹⁶ Ary raha mitsara Aho, dia marina ny fitsaràko, satria tsy Izaho irery, fa Izaho sy ny Ray izay naniraka Ahy;

¹⁷ ka araka ny voasoratra eo amin’ny Lalànareo, dia marina ny fanambaràn’ny olona roa.

¹⁸ Ary izaho sady manambara ny Tenako no ambaran’ny Ray izay naniraka Ahy koa.»

¹⁹ Dia hoy ry zareo taminy: «Aiza ny Rainao?» Fa i Jesoa namaly hoe: «Samy tsy fantatrareo na Izaho na ny Raiko; fa raha mahalala Ahy ianareo, dia ho nahalala ny Raiko koa.»

²⁰ Teo amin’ny fandatsahan-drakitra no nilazan’i Jesoa an’izany, raha nampianatra tao amin’ny tempoly Izy; nefa tsy nisy nisambotra Azy, satria tsy mbola tonga ny fotoany.

Fampitandremana an’ireo Jody tsy mety mino

²¹ Hoy indray i Jesoa tamin’izy ireo: «Handeha Aho ka hitady Ahy ianareo, ary ho faty amin’ny fahotanareo. Izay alehako tsy azonareo aleha.»

²² Dia hoy ny Jody: «Hamono tena angaha Izy no manao hoe: ‹Izay alehako tsy azonareo aleha?› »

²³ Fa hoy Izy tamin’izy ireo: «Ianareo avy etỳ an-tany, Izaho avy any an-danitra; ianareo olon’izao tontolo izao; Izaho tsy mba olon’izao tontolo izao.

²⁴ Izany no nilazako taminareo fa ho faty amin’ny fahotanareo ianareo; satria raha tsy mino ianareo fa Izaho no Izy, dia ho faty amin’ny fahotanareo ianareo.»

²⁵ Dia hoy ry zareo taminy: «Iza moa Ianao?» ka hoy ny navalin’i Jesoa azy: «Izay lazaiko aminareo indrindra.

²⁶ Manana zavatra maro hilazana sy hitsarana anareo Aho; fa marina ilay naniraka Ahy, ary izay efa reko taminy no lazaiko amin’izao tontolo izao.»

²⁷ Tsy nahalala izy ireo fa ny Ray no nolazainy taminy.

²⁸ Ka hoy i Jesoa taminy: «Rehefa voasandratrareo ny Zanak’olona vao ho fantatrareo fa Izaho no Izy, sady tsy manao na inona na inona ho Ahy Aho, fa izay nampianarin’ny Ray Ahy no lazaiko.

²⁹ Ary Izay naniraka Ahy dia eto amiko, fa tsy navelany ho irery Aho, satria manao izay tiany mandrakariva.»

³⁰ Tamin’Izy niteny izany, dia maro no nino Azy.

I Jesoa sy i Abrahama

³¹ Koa hoy i Jesoa tamin’ireo Jody nino Azy: «Raha mahatana ny teniko ianareo dia ho mpianatro tokoa,

³² sady ho fantatrareo ny marina, ary ny marina no haha-olona afaka anareo.»

³³ Dia hoy ny navalin’izy ireo Azy: «Taranak’i Abrahama izahay, ary tsy mba nandevozin’olona na oviana na oviana, ka ahoana no ilazanao hoe: ‹Ho olona afaka ianareo?› »

³⁴ Fa hoy i Jesoa taminy: «Lazaiko marina dia marina aminareo fa izay manota dia andevon’ny ota;

³⁵ ny mpanompo tsy mitoetra ao an-trano mandrakariva, fa ny zanaka no mitoetra ao mandrakariva.

³⁶ Koa raha ny Zanaka no manafaka anareo, dia ho afaka tokoa ianareo.

³⁷ Fantatro ihany fa taranak’i Abrahama ianareo, nefa mitady hamono Ahy ianareo, satria tsy tafalatsaka ao am-ponareo ny teniko.

³⁸ Izaho milaza izay hitako eo amin’ny Raiko, ary ianareo kosa manao izay renareo ao amin’ny rainareo.»

³⁹ Namaly ireo ka nanao taminy hoe: «I Abrahama no rainay.» Fa i hoy i Jesoa taminy: «Raha zanak’i Abrahama ianareo, dia hanao ny asan’i Abrahama.

⁴⁰ Nefa mitady hamono Ahy ianareo ankehitriny, dia Izaho izay nilaza taminareo ny marina reko tamin’Andriamanitra: tsy asan’i Abrahama izany.

⁴¹ Ny asan’ny rainareo no ataonareo!.» Dia hoy ireo taminy: «Tsy mba teraka tamin’ny fijangajangana izahay, ka iray ihany ny rainay, dia Andriamanitra.»

⁴² Fa hoy kosa i Jesoa tamin’izy ireo: «Raha Andriamanitra no rainareo, dia ho tia Ahy ianareo, satria Andriamanitra no niaviako, ary Izy no nahatongavako atỳ; fa tsy tonga ho Ahy Aho, fa Izy no naniraka Ahy.

⁴³ Ahoana àry no tsy fantatrareo ny fiteniko? Satria tsy mahay mihaino ny teniko ianareo.

⁴⁴ Ny devoly no ray niavinareo, ka izay tian’ny rainareo no tianareo hatao. Ary izy dia mpamono olona hatramin’ny voalohany sy tsy naharitra tamin’ny marina, satria tsy misy marina ao aminy. Raha mandainga izy, dia ny azy no lazainy izany, satria mpandainga sy rain’ny lainga izy;

⁴⁵ fa Izaho kosa satria milaza ny marina Aho, dia tsy mino Ahy ianareo.

⁴⁶ Iza moa aminareo no mahazo milaza marina fa nanota Aho? Raha ny marina no lazaiko, nahoana no tsy mino Ahy ianareo?

⁴⁷ Izay avy amin’Andriamanitra no mihaino ny tenin’Andriamanitra, ka izany indrindra no tsy ihainoanareo, satria tsy avy amin’Andriamanitra ianareo.»

⁴⁸ Dia namaly ny Jody ka nanao taminy hoe: «Moa tsy marina ny filazanay fa Samaritanina Ianao sady manana demony?»

⁴⁹ Ary hoy ny navalin’i Jesoa: «Tsy manana demony Aho, fa Izaho manome voninahitra ny Raiko, ary ianareo kosa tsy manaja Ahy.

⁵⁰ Izaho tsy mitady voninahitra ho Ahy, fa ao ny mitady izany sy hitsara.

⁵¹ Lazaiko marina dia marina aminareo, fa raha misy mitandrina ny teniko, dia tsy hahita fahafatesana mandrakizay izy.»

⁵² Dia hoy ny Jody: «Fantatray amin’izao fa manana demony Ianao; i Abrahama sy ny mpaminany aza maty, fa Ianao kosa manao hoe: ‹Raha misy mitandrina ny teniko, dia tsy hanandrana fahafatesana mandrakizay izy.›

⁵³ Angaha Ianao lehibe noho i Abrahama rainay izay efa maty? Ny mpaminany koa efa maty; manao Anao ho iza re Ianao e?»

⁵⁴ Dia hoy i Jesoa: «Raha manome voninahi-Tena Aho, dia tsinontsinona ny voninahitro; fa ny Raiko izay ataonareo ho Andriamanitrareo no manome voninahitra Ahy.

⁵⁵ Tsy fantatrareo anefa Izy; fa Izaho no mahalala Azy, ary raha milaza ho tsy mahalala Azy Aho, dia ho mpandainga tahaka anareo koa; fa fantatro Izy, ary mitandrina ny teniny Aho.

⁵⁶ Nientan-kafaliana i Abrahama rainareo nanantena hahita ny androko; ary nahita izy ka faly.»

⁵⁷ Dia hoy ny Jody taminy: «Tsy mbola dimampolo taona akory Ianao, ka dia hoe nahita an’i Abrahama?»

⁵⁸ «Lazaiko marina dia marina aminareo, hoy i Jesoa taminy: Fony mbola tsy àry i Abrahama, dia efa Izaho Aho.»

⁵⁹ Tamin’izay naka vato izy ireo hitorahana Azy; fa niery i Jesoa ka nivoaka ny Tempoly.