Mikha 4 - ASII LAKDAP Bible (BSI)

Tatiwe Wokhong Maq Mangjongse Khusang Misi

¹ Rawii shiqwii Tatiwe Shomjam khü hiqlam ka ku akin tarü thaq na, diilu pinthum miraq. Maiqphan pahea wa raüta kra pum na mirtam wan.

² Kiimaq tsangshiqnok raq mingu, “Tatiwe hiqlam kiina warong i, Israilnok Shiikeawe Shomjam kiina warong i. Apaiq raq nashiq ma, apaiq wokhong na siwan, rilung lam mishrin kuq. Krai mren nashiq ka apaiq, lam miphan wan rong i. Jamkhano nguhaüla, Tatiwe lamphan tri ka Jerusalem ma midong, kiimaq apaiq raq Jajon maq asengi ma tsü chongkuqtlo.”

³ Apaiq raq maiq mung pahea liipan wa, kha tri mitoqtan, maiqphan jonghea kiimaq luhea na siti liipan na, kha mipho, tsangshiq raq nepja thun ka, ni the chang thai miishe mitiiq, kiimaq tsangshiq piqkhu thun ka, nyiimdong ton chang jasai miishe mitiiq. Maiq mung thun liipan na re dongmak she miraq, chiqja reja tiije makshe miraq.

⁴ Maiqse angu tarü mungtsing maq misi, maiqmiimii spiqro na kiimaq maiqmiimii phupmup ro na misi. Kiimaq apaiq ka jurmin tiihaisong mak she miraq. Arka Ningkun Ajong Pinthum Tatiwe kiqkham kuqto.

⁵ Maiq phan aphantek raq, maiqmiimii phra mang chong raüta miphan wan. Shatmaq nashiq riika, nashiq Tati Shiikeawe mang chong laita, pattup pat-sa misi wan rong i.

Israilnok Pongmung Wa Maiqmii Mung Niishe Mitsuq Wan

⁶ Tati raq ngutlo, “Kra akhing na ngi raq, pong mung na atiipin jobaiq ha wa, adam niishe mitriitam wan ha. Ngi raq tiichamchao kang thun ka, adam na mirchom wanha.

⁷ Tsangshiq ka achuk akü luhea mung na. Shatmaq aso tiichong tlaq kiiwa, ngi raq mung anye tingsang niishe mitiichhan chhi wan ha. Tsang mung ka jonghea ashi miishe mija wan. Kra akhing miishe ngi raq, tsangshiq ka Jajon pum maq, ngalata pattup pat-sa miitushe mi peng wan ha.”

⁸ Kiimaq Jerusalem lei, Shiikeawe ka kiijaq ngaraüta, asenginok ka skusekong ikha rüm wan tlo, ümniika man na jamkhiiwa silaü, kiikha mungtan nyungchong miishe mija wan nong haü.

⁹ Riita ümchaü ümniika agilülü jam hosea wa? Nowü chhitsi ikha shea chamchao rai tlaü? Üm hokhamwe ka ahü riitiishea? Ümmung pengti mungtubi ka atsai kaikun she shea?

¹⁰ O Jerusalem lei, akap atsea phetrang rong laq. Jechakre ase chiitsi na phetrangtlaq ikha. Ümchaü namshiq raq chela ka abaiqthü chang miraq, Lanta hiqsii thung na sichang miraq, Namshiq ka Bebilon na wawan chang she miraq, Shatmaq kiijaq rewe jaqkhon mong wa Tatiwe raq namshiq mitiichhii kuq.

¹¹ Maiqmung pahea pong raüta ümnaq khatkai miitu thungto. Tsangshiq raq akha riichong tlo, “Jerusalem ka shiithenbaiq raa dongdii, Jerusalem ka athen kaiwi she michi rong i!”

¹² Shatmaq ara maiqmung thun raq, Tatiwe tiima ka khon mak! tsangshiq tiithung wantaq kriika, khaopum nibaiq tlaq ikha mini baiq.

¹³ Tatiwe raq ngutlo, “Jerusalem lei, tiido laq, laüta ümrewe ka nibaiq laq! Ngi raq ümniika minpongwe arong jinrong, kiimaq ahoksan ka miiki ngam, ikha honghea ningkun mikuq kang, ümniiraq maiqphan pahea mithaü baiq wan haü. Kiimaq tsangshiq tsiiq anyam, sepat lope atsuq wan ka, Ngi ma michom kuq wan haü, Ngi ka ra ahiq rümti Tatiwe.”