Mikha 2 - ASII LAKDAP Bible (BSI)

Miitsan Maiqse Tiichamchaoti Deawan Chang Thiikho

¹ Hiqbi kho hiqbi kho! Rawa konhü mat-sü tsasü ngati hiqbi kho! Ranap rawü ho raüla matniq tsaniq jaqshamtlo!

² Tsangshiq raq aroro maiq wak nyeatlo Tsangshiq raq aroro maiqjam nyeahoto. Maiqta maiqwii tachong nyeahotlo, maiqta kiimaq tsanghup tsang sam, tiiwongchang ahü.

³ Arningkhan Tatiwe raq ngutlo, “Ümchaü ngi raq ümnaq dea wa chang, thü kho thü tiikang, kra mongwa ümniika, lun lot maü she! üm thiikho na ümniili midea haü. Krai mren shiikong kumrong maq, khumlot maüchang.

⁴ Kra ümningthoi akhing saü wan raüjaq. Nanok raq ümrilung chamchao kra chong raüta, ümnaq slailii shi akha mishi nge, Nashiq thumkai she! Tatiwe raq nahiq nara nyea wanto she. Raüta najaqtinok ma likuqbaiqto she Naishiq ka maiq shumwi lishe”

⁵ Namshiq raq atinkhan ashut kiimung kha na, Tatiwe senginok ma, Tatiwe raq tsangshiq hiqshong jangkuq wan raüjaq, kiijaq namshiq rii hiq phü ahü lapman she.

⁶ Tsangshiq raq ngi ma akha, tra hoto, “Naishiq ma akha tra naqhokuq kiq. Tatiwe raq naishiq shiithen baiq mak miraq. Naishiq ka chongthum tiija mak miraq.

⁷ Israilnok ka Tatiwe manson ho raüta sitlo ngutiisha tiima tlaü? Tatiwe raq abi jaqsham ka ninlot mak she ngutiisha tiima tlaü? Tatiwe raq atinkhan abi kiimung ka miklo wandea shea? Tatiwe raq athuk atsom kloti lungwiitlo riimak shea?”

⁸ Tatiwe raq ngutlo, “Namshiq raq isengi ka re raq akhat ikha khattlan. Maiqwere ka re maq ajang wan, jamkun na khusang maq siwa nguta saü wantlo. Shatmaq namshiq raq tsangshiq raq, samtong jong adü na asam kra, chhut lanta nyea tlan. Lanta tsangshiq ka kheahü rasong tiichamchao tlan.

⁹ Namshiq raq isengi anyungre, thümwaq mantibi ka, maiqmii jam na apeowiq asi wa jobaiqtlan, lanta ngi achu shiiman tsangsetiim ka, pattup miitu nyeahotlan.

¹⁰ Tiido ronglaq! lanta namchiim jintlo ronglaq. Namshiq chapngachang ka ajaq ahüshe. Namshiq maiqmii thiikho thülan, kiijiishe midea wan han. Lanta laimiq ümwa wan han.

¹¹ “Arnok riika arot akiq shammi bom chongketi, ‘Namshiq ma spiqtai nai laohu chamtraq misaü’ nguta chongketi shammi lungwiitlo.

Israilnok Rejaq Song Ma Jaq Mikhaqkuq

¹² Shatmaq Tatiwe raq ngutlo, “O Israilnok lei, Rejaq song ka ngi raq mirchomha. Namshiq wiita rü adam na mitriitamha. Skusekong akheti raq shea wantlaq ikha, Sku rümchang nyiimlung rüram na; Skukong atsamphaq haisiq tlaq ikha, Israil mung ka pahea ra ma hiq ma hali, mitiipu wan nong ha,” nguta Tatiwe raq ngutlo.

¹³ Shiikeawe raq tsangshiq dong wan chang kilü mirkuq, Raüta pongmung wa tsangmung na mitsuq wan, Tsangshiq ka chela kilü thun linwan raüta, wase miishe mijawan. Tsangshiq hokham Tatiwe raq Lamshea raüta re mung wa, tsangmung niishe mi laü wan.