Hosea 9 - ASII LAKDAP Bible (BSI)

Shiikeawe Raq Israil Mung Mishthenbaiq

¹ O, Israilnok lei, thatsang maiqse raq lang tlaq ikha, poi naq lang rongkiq. Namshiq ka Shiikeawe wokhong wa dongho lan. Lanta mephe-nyungre ikha sitlan. Israil mung tlotli na namshiq raq, Baal phra raq namshiq trong wintlo nguta, apaiq shomnoq tlan!

² Shatmaq jaqlo liipan niili, namshiq tsamtiip na tsam ka ahü she miraq. Olip petsi tiikitchang min ahü she miraq. Kiimaq namshiq nyangchang chenye kiimin ahü she miraq.

³ Israilnok ka Tatiwe raq akuq tsangmung na silu mak she miraq. Tsangshiq ka re raq Ejip mung na hali mitsuqho nong. Kiimaq Asiria mung niishe mitsuq wan. Raüta kiijaq apii chang phan kriishe miphaqsiq wan.

⁴ Tsangshiq raq Tatiwe ma, honglu na che min kuq mak she miraq. Kiimaq tsangshiq raq nyamse honglu akuq wan kiimin, Tatiwe raq tao mak she miraq. Kra honglu thun ka, wulum tiijü tsam ikhli miraq. Kra wa nyiim wanti tarü, ashe maiqse miishe mija wan. Kra phaqsiq tlaq ka, tsangshiq wokpo miituli. Kriika Tatiwe jam na, honglu kewan chang riimak.

⁵ Ikhiijiika, rawiitek kuk nai mei klo wantlaq ikha, Tatiwe shreng poi akhing ranaiq kiiha? tsangshiq raq jamlai honglu she wa mikuq wan?

⁶ Shiikeawe sintsang she saüki raüla, Israilnok ka barap niishe mitiipinbaiq. Ejip mungti raq tsangshiq ka adam na mirchom. Raüta Mephi chela na tsang maaphong milap! Tsangshiq rongwin wan chang hiqshong thun ka, hiqmiqchangkhü ma mija, shukrü tonglong lishe miraq.

⁷ Shiikeawe manson saüto she Israilnok ma. Tsangshiq khapho akhing saüto. Israilnok hoqtlo, “Shammiwe ka angiwe! riisham bomchongti ka aruwe!” nguta ngutlo. “Namshiq ngarai jonghea, kra ningkhan ngi ngengtlan,” nguta Tatiwe raq ngutlo.

⁸ Shiikeawe raq ngi ka ashammiwe ma shongto. Raüta Israilnok ma honlam tsii chongkai tiikito. Shatmaq ümjiiwa trahokai kitiikang, tsangshiq raq ngi atsea miitu, wushi tiimin ma chan tlaq ikha, chiiq chantlo. Shiikeawe shomjam mong niimin, mungmaiqse ka shammiwe ngengti siisaq.

⁹ Tsangshiq raq Gibea chela maq phawan raüta, abi pinthum ngarai tangtlo. Shiikeawe raq tsangshiq ngarai raüpot khathüto. Apaiq raq tsangshiq mitiichamchao she.

Israilnok Ngarai

¹⁰ Israilnok ka rumnyangkhi kumtsaiphii na, spiqro achhi wan ikha, ngi ma rahea hum wan kang. Kiimaq tsipha shaqshaq phupmup chongtsi ikha, aphaqsea ma sumhea, namtitiim ka ngi raq, maiqlung ngamwii humwan kang, Shatmaq Peor pum na saü raüta, wuda pongwe ikha, Baal phra puk na nyap wanto Raüta tsangshiq jeangaü wanto. Raüta shekhiq miishe jawanto

¹¹ Kra ningkhan Israil mung jonglu khushü, pechong wa wushi abi wan ikhiishe mibi wan. Anyungtiim ka tsihü chong ikhiishe miraq! Ase min hum mak miraq! no ngachang na ase kopmak miraq!

¹² Anyungtiim raq tsangsetiim li hum raü min, wiita ngi raq mitsat baiqha. Laihü nyungtiim ma mitiijaha. Ngi raq tiishaübaiqkang miiphat, riitsitsaitsiiq michamchao.

¹³ Man na akhing ashi na, Israil ka hiqwin ba na achhi taitsichong ikha, ajaq nümwa heala. Tsangsetiim akong ada riito. Shatmaq ümchaü re ma, wiita tiitsatbaiqto.

¹⁴ Tatiwe lei kuqlaq, jamlai wa mikuq haü? maase hochang wok kuqlaq, apü shinriiqriiq mirlaq,

Tatiwe Raq Israilnok Tiishuttlo

¹⁵ Tsangshiq ka ashut ashai wiita raüchong, Gilgal chela maq shampha wanto, Kriikha na ngi raq saisi wan kang, tsangshiq ka Ijamjong wa, mijobaiqha. Ngi raq tsangshiq lungwii mang she. Mungtu shiilangbi ngi ngengti siisaq.

¹⁶ Israilnok ka arangchong maq atsaiki pechong ikha, arang thun ka ashinkaiwi she, atso ango min ahüshe. Tsangshiq ka tsihüshe. Tsangsetiim li hum raü min, Tsangtsan ranchang jaqpaq ka, ngi raq michumbaiqha.

Israilnok Shutphit Kra Chongtlo

¹⁷ Tsangshiq raq Shiikeawe bom tlea wan kha na, I Shiikeawe raq tsangshiq ka amiimshe mirbaiq. Tsangshiq ka Pongmung na, mangtam ikhiishe mimo wan.