DUNGWVNC 20 - ASII LAKDAP Bible (BSI)

Aming Roqshi

¹ Shiikeawe raq bomto, kiimaq arthun ara apaiq bomtsi:

² “Ngi ka Tatiwe üm Shiikeawe ümniika Ejip mung na maiqdi asihaü wa shea wanti.

³ “Ngi tlea laüta ahin phra shomnoq maimak.

⁴ “Ümnaq maiqmii miitu ramungtan na siti lo riimakla mangjong hiq na sitilo, riimakla kham mong na sitilo kra sumla thun kiiwa jamlai phan sumla li jiimin naq klokiq.

⁵ Jamlai phan sumla khaki na jiimin naq bumkiq. Riimakla kra shomnoq maimak. Jamkhano ngukla Ngi ka Tatiwe üm Shiikeawe. Kiimaq Ngi rai riilongti ka ashi min thümang phan. Ngi ngengti ma mo tiiho tiikang. Kra mo ka asetiim kiimaq asaütiim maiq pat tsam nai patblai na saüli mo mitiihoha.

⁶ Shatmaq Ngi lungwiiti nai Ngi aming thun wokhong na siti miika Ngi lungwiitsii ka maiqpat ahing ahing na saüli mitiichhi kuqha.

⁷ “Imang ka abi kiimung miitu naq shaphaqkiq. Jamkhano ngukla Ngi, Tatiwe üm Shiikeawe raq imang atu na shaphaqti ka juli jiimin mo mitiihoha.

⁸ “Asii Niitiitsak Ranaiq ka aheawiq maq langlaq. Laüta asii thülaq.

⁹ Ümniima üm minshiiq miitu ka ratrok asi.

¹⁰ Shatmaq ramiishi ranaiq ka Ngi ma akiinongkuq niitiitsak ranaiq. Kra ranaiq ka jurmin minshiiqkai maimak. Ümniiraq lo, ümsetiim raq lo, üm disetiim raq lo, üm nyamsekong raq lo, riimakla pong mungti thun üm mung na siti raq lo jiimin minshiiqkai maimak.

¹¹ Ratrok na saüli Ngi, Tatiwe raq, mangjong hiq ara, ra ara, kiimaq khamjong chum kra kiimaq arthun na siti phanrap sitlaq kra phansang kang. Shatmaq ramiishi ngo ranaiq na Ngi ka niitiitsak ahai riikang. Kra ningkhan na, Ngi, Tatiwe raq Asii Niitiitsak Ranaiq ka shiiman kuq kang. Lata kra ranaiq ka asii tiijakang.

¹² “Ümwe nai ümnyung ka shrenglaq. Kra riihaüla ümniika Ngi raq kuq tiikang mung kiijaq rilung luhea misihaü.

¹³ “Maiq miisaq naq tiithumkiq.

¹⁴ “Maiqchak rai naq srakiq.

¹⁵ “Ahuk naq jakiq.

¹⁶ “Maiq ma arot kha naq nyankiq.

¹⁷ “Maiq jam chhi laüta naq süramkiq; achak ma, adise kong ma, anyamse kong ma, akumtoq kong ma, riimakla apaiq hupsam phan shi ra ma jiimin naq süramkiq.”

Mungmaiqse Haito

¹⁸ Riita mungmaiqse raq kra ramok trang nai nüchhong lerong tsü trang taito kiimaq rachhai watrang nai pum ka wakhuk raq mong wantaq kra chhito, tsangshiq ka haisitsi ma atiikhai rokrok riito. Kiimaq hiq lam maq luhea niili chapto.

¹⁹ Tsangshiq raq Mosheq ma nguto, “Ümniika raq naishiq ma chonglaq, kriili naishiq raq mitaikai. Shatmaq Shiikeawe raq naishiq rai riibom haüla, naishiq ka atsai mirhai sham nguta, naishiq ka ahai tiitiikai.”

²⁰ Kiijiishe Mosheq raq treto, “Naqhai rongkiq. Shiikeawe ka namshiq tairai kai li kito. Raüta namshiq raq apaiq bom ka phaqchii nichii maq tai wan ruq ratlo. Kra riihanla ngarai na dea man mirhan.”

²¹ Shatmaq mungmaiqse ka aluwiq niili chapruq riito. Mosheq lam lamse li kra phumda nyaqdok dok mong maq Shiikeawe bomtlaq kra tho na wato.

Berongwacha Tri

²² Tatiwe raq Mosheq ma Israilnok ma akha chonglaq nguta aming kuqto: “Ngi, Tatiwe raq ramungtan maq namshiq rai jamkho riibomkang kra chhilan she.

²³ Namshiq Ngi tiitsuq ma shomnoq wan miitu phra thun ka kampho maq riimakla chaq maq naq klo rongkiq.

²⁴ Ngi miitu ka hiq maq berong-wacha ashi klo ronglaq. Lanta kriijaq namshiq sku nai minsaü ka wiipumtam chaqtlii honglu thun nai rintii-honglu thun kra kuq ronglaq. Ngi raq ümriiba wa pong na namshiq raq Ngi shomnoq wan miitu tseathütiikang kiijaq Ngi ka shomnoq ronglaq. Kiijaq Ngi ka namshiq phana kilata mishman kuqkang.

²⁵ Kiimaq namshiq raq Ngi miitu long maq berong-wacha hai han jiila, kriika long ka asoq lanta naqhai rongkiq. Jamkhano ngukla namshiq raq long ka tson miishe soq hanla, kriithun ka Ngi miitu abi she. Alang maimak she miraq.

²⁶ Kiimaq Ngi miitu berong-wacha ka hiqkhu maq düwa raüta shomnoq chang ka naq klo rongkiq. Kra riihanla, namshiq ka kiijaq düwantlan akhing na raiqhü ma mijahan.