Jozue 18 - Bibl Koad 21: Ar Bibl e Brezhoneg evit ar Vretoned

Pennad 18 An dud kaset d'ober un tres. Lodenn roet da Venjamin

¹ Holl vodadenn mibien Israel en em zastumas e Silo, hag e lakajont eno teltenn an engalv. Ar vro a oa bet mestroniet ganto.

² Met chomet e oa, e-touez mibien Israel, seizh meuriad ha n'o doa ket bet a hêrezh.

³ Jozue a lavaras da vibien Israel: Pegeit e taleot da vont da berc'hennañ ar vro en deus roet deoc'h an AOTROU , Doue ho tadoù?

⁴ Dibabit tri den dre bep meuriad, hag e kasin anezho. Sevel a raint hag ec'h ergerzhint ar vro, hag e raint un tres anezhi evit he lodennañ; hag e tistroint da'm c'havout.

⁵ Hag he lodennint e seizh lodenn, Juda a chomo en e harzoù er c'hreisteiz, ha ti Jozef a chomo en e harzoù en hanternoz.

⁶ Grit un tres eus ar vro e seizh lodenn, hag e tegasot anezhañ din amañ. Hag e taolin ar sord evidoc'h, amañ, dirak an AOTROU hon Doue.

⁷ Ne vo ket a lodenn evit al Levited en ho touez, rak ar servij evel aberzhourien d'an AOTROU eo o hêrezh. Gad, Ruben hag hanter-veuriad Manase o deus resevet o hêrezh en tu all d'ar Jordan, er sav-heol, ar pezh en deus roet dezho Moizez servijer an AOTROU .

⁸ An dud-se a savas hag a yeas. Jozue a c'hourc'hemennas d'ar re a yeas ober un tres eus ar vro, o lavarout: Kit, ergerzhit ar vro, grit un tres anezhi ha tistroit da'm c'havout, hag e taolin ar sord evidoc'h, amañ, dirak an AOTROU , e Silo.

⁹ An dud-se a yeas, a ergerzhas ar vro, a reas un tres anezhi en ul levr e seizh lodenn hervez ar c'hêrioù, hag e tistrojont da gavout Jozue da gamp Silo.

¹⁰ Jozue a daolas ar sord evito e Silo dirak an AOTROU , ha Jozue a lodennas eno ar vro da vibien Israel, pep e lodenn.

¹¹ Hag ar sord a gouezhas war veuriad mibien Benjamin, hervez o ziegezhioù, hag an douar a roas ar sord dezho a zegouezhas etre mibien Juda ha mibien Jozef.

¹² O harz hanternoz a yae adalek ar Jordan, hag e pigne war gostez hanternoz Jeriko, hag e pigne er menez war-zu ar c'huzh-heol, hag e tape gouelec'h Betaven,

¹³ hag ez ae ac'hane an harz war-zu Luz, e kreisteiz Luz, a zo Betel, hag e tiskenne an harz da Atarod-Adar, e-kichen ar menez a zo e kreisteiz Bet-Horon-Izel,

¹⁴ hag e kendalc'he an harz, hag e troe e korn ar mor war-zu ar c'hreisteiz, adalek ar menez a zo a-dal da Bet-Horon war-zu ar c'hreisteiz, hag e tape Kirjad-Baal, a zo Kirjad-Jearim, kêr mibien Juda. Evel-se e voe tu ar c'huzh-heol.

¹⁵ Tu ar c'hreisteiz a yae eus dibenn Kirjad-Jearim, hag ez ae an harz war-zu ar mor, hag ez ae da vammenn doureier Neftoa,

¹⁶ hag e tiskenne an harz betek dibenn ar menez a zo a-dal da draonienn mab Hinnom, a zo traonienn ar Refaim, ouzh an hanternoz, hag e tiskenne an harz dre draonienn Hinnon war gostez kreisteiz ar Jebuziz, hag e tiskenne da En-Rogel,

¹⁷ hag e kromme war-zu an hanternoz betek En-Shemesh, ha betek Gelilod a-dal da venez Adummim, hag e tiskenne da vaen Bohan mab Ruben,

¹⁸ hag e tremene dre gostez hanternoz a-dal da Araba, hag e tiskenne da Araba,

¹⁹ hag e tremene an harz dre gostez hanternoz Bet-Holga, hag e tape an harz brec'h hanternoz Mor an Holen a zo e genoù ar Jordan. Evel-se e voe tu ar c'hreisteiz.

²⁰ Ar Jordan a oa harz tu ar sav-heol. Hennezh e voe hêrezh mibien Benjamin, e harzoù tro-dro, hervez o ziegezhioù.

²¹ Kêrioù meuriad mibien Benjamin a oa, hervez o ziegezhioù: Jeriko, Bet-Holga, Emek-Keziz,

²² Bet-Araba, Zemaraim, Betel,

²³ Avim, Para, Ofra,

²⁴ Kefar-Ammonai, Ofni, Geba. Ar c'hêrioù-se: daouzek, gant o c'hêriadennoù.

²⁵ Gabaon, Rama, Beerod,

²⁶ Mizpe, Kefira, Moza,

²⁷ Rekem, Jirpeel, Tareala,

²⁸ Zela, Elef, Jebuz, a zo Jeruzalem, Gibead, Kirjad. Ar c'hêrioù-se: pevarzek, gant o c'hêriadennoù. Hennezh e voe hêrezh mibien Benjamin, hervez o ziegezhioù.