Adlezenn 6 - Bibl Koad 21: Ar Bibl e Brezhoneg evit ar Vretoned

Pennad 6 Karout an AOTROU

¹ Setu ar gourc'hemennoù, ar reolennoù hag ar barnedigezhioù en deus gourc'hemennet an AOTROU ho Toue deskiñ deoc'h, evit ma reot diouto er vro ma'z eot e-barzh d'he ferc'hennañ,

² evit ma touji an AOTROU da Zoue, o virout e holl reolennoù hag e holl c'hourc'hemennoù a gemennan dit, te, da vab ha da vibien-vihan, en holl zeizioù da vuhez, evit ma vo hiraet da zeizioù.

³ Selaou a ri eta, Israel, hag ec'h eveshai ma vo graet diouto, evit ma vi eürus ha ma kreskot meurbet, evel m'en deus lavaret an AOTROU, Doue da dadoù, er vro a zever gant laezh ha mel.

⁴ Selaou, Israel! An AOTROU hon Doue a zo an AOTROU hepken.

⁵ Karout a ri an AOTROU da Zoue, eus da holl galon, eus da holl ene, eus da holl nerzh.

⁶ Ar c'homzoù-se a c'hourc'hemennan dit hiziv a vo ez kalon,

⁷ o c'helenn a ri da'z mibien hag e komzi diouto pa vi ez ti ha pa gerzhi war an hent, pa c'hourvezi ha pa savi,

⁸ hag ec'h erei anezho evel un arouez war da zorn, hag e vint evel talgenoù etre da zaoulagad;

⁹ o skrivañ a ri war bostoù da di ha war da zorojoù.

¹⁰ P'en devo da lakaet an AOTROU da Zoue da vont er vro en deus touet da'z tadoù, da Abraham, da Izaak, da Jakob reiñ dit, gant kêrioù bras ha mat na'c'h eus ket savet,

¹¹ tiez leun a bep seurt madoù na'c'h eus ket leuniet, puñsoù toullet na'c'h eus ket toullet, gwini ha gwez-olivez na'c'h eus ket plantet, pa zebri hag ez po da walc'h,

¹² diwall d'ankounac'haat an AOTROU en deus tennet ac'hanout eus bro Ejipt, eus an ti sklavelezh.

¹³ Doujañ a ri an AOTROU da Zoue, hag e serviji anezhañ, hag e toui dre e anv.

¹⁴ Ned eot ket war-lerc'h doueoù all, a-douez doueoù ar pobloù a vo en-dro deoc'h,

¹⁵ rak an AOTROU da Zoue a zo ez kreiz un Doue gwarizius. Fulor an AOTROU da Zoue en em danfe a-enep dit, hag e lamfe ac'hanout a-ziwar an douar.

¹⁶ Ne demptot ket an AOTROU ho Toue, evel ma hoc'h eus e demptet e Masa.

¹⁷ Mirout a reot gourc'hemennoù an AOTROU ho Toue, e destenioù hag e reolennoù en deus gourc'hemennet dit.

¹⁸ Ober a ri ar pezh a zo eeun ha mat dirak daoulagad an AOTROU, evit ma vi eürus ha ma'z i da berc'hennañ ar vro vat en deus touet an AOTROU da'z tadoù,

¹⁹ o kas kuit da enebourien azirazout, evel m'en deus lavaret an AOTROU.

²⁰ Pa c'houlenno da vab ouzhit en amzer da zont: Petra eo an testenioù, ar reolennoù hag ar barnedigezhioù en deus gourc'hemennet deoc'h an AOTROU hon Doue?

²¹ e lavari da'z mab: Bez' e oamp sklaved da Faraon en Ejipt, hag an AOTROU en deus tennet ac'hanomp eus an Ejipt gant un dorn kreñv.

²² An AOTROU en deus graet sinoù ha burzhudoù bras ha spontus a-enep an Ejipt, a-enep Faraon hag a-enep e holl di dirak hon daoulagad,

²³ ha tennet en deus ac'hanomp ac'hane, evit degas ac'hanomp d'ar vro en doa touet d'hon tadoù reiñ deomp.

²⁴ An AOTROU en deus gourc'hemennet deomp ober diouzh ar reolennoù-mañ, o toujañ an AOTROU hon Doue, evit ma vimp atav eürus ha ma tiwallo hor buhez evel hiziv.

²⁵ Ar reizhder a zalc'himp pa virimp an holl c'hourc'hemennoù-se ha pa raimp diouto dirak an AOTROU hon Doue, evel m'en deus urzhiet deomp.