Adlezenn 28 - Bibl Koad 21: Ar Bibl e Brezhoneg evit ar Vretoned

Pennad 28 Bennozhioù ha mallozhioù

¹ Mar sentez ouzh mouezh an AOTROU da Zoue, en ur virout e holl c'hourc'hemennoù a gemennan dit hiziv hag en ur ober diouto, an AOTROU da Zoue a lakaio ac'hanout dreist holl bobloù an douar.

² Setu an holl vennozhioù a zeuio warnout hag a c'hoarvezo ganit mar sentez ouzh mouezh an AOTROU da Zoue:

³ Benniget e vi e kêr ha benniget e vi war ar maez.

⁴ Benniget e vo frouezh da gof, frouezh da zouar ha frouezh da loened, klodadoù da saout ha da zeñved.

⁵ Benniget e vo da baner ha da arc'h.

⁶ Benniget e vi ez tont ha benniget e vi ez mont.

⁷ An AOTROU a lakaio da enebourien a savo ez enep da vezañ pilet dirazout; mont a raint a-enep dit dre un hent, hag e tec'hint a-zirazout dre seizh hent.

⁸ An AOTROU a c'hourc'hemenno d'ar vennozh bezañ warnout ez solieroù hag e kement a ri gant da zaouarn, hag e vennigo ac'hanout er vro a ro dit an AOTROU da Zoue.

⁹ Diazezet e vi evel ur bobl santel gant an AOTROU, evel m'en deus touet dit, ma virez gourc'hemennoù an AOTROU da Zoue ha ma kerzhez en e hentoù.

¹⁰ Holl bobloù an douar a welo penaos eo anv an AOTROU galvet warnout, hag e toujint ouzhit.

¹¹ An AOTROU a raio dit kreskiñ e madoù, e frouezh da gof, e frouezh da loened, e frouezh da zouar, er vro en deus touet an AOTROU da'z tadoù reiñ dit.

¹² An AOTROU a zigoro dit e deñzor mat, an neñv, evit reiñ ar glav da'z touar en e amzer hag evit bennigañ kement a ri gant da zaouarn; hag e presti da galz a bobloù, n'ampresti ket.

¹³ An AOTROU a lakaio ac'hanout er penn ha nann el lost, hag e vi atav en nec'h, biken ne vi en traoñ, pa senti ouzh gourc'hemennoù an AOTROU da Zoue a gemennan dit hiziv, evit mirout anezho hag ober diouto,

¹⁴ hep distreiñ nag a-zehou nag a-gleiz eus an holl gomzoù a c'hourc'hemennan di hiziv, evit mont war-lerc'h doueoù all hag o servijañ.

¹⁵ Ma ne sentez ket ouzh mouezh an AOTROU da Zoue, ma ne virez ket e holl c'hourc'hemennoù hag e holl reolennoù a gemennan dit hiziv ha ma ne rez ket diouto, setu an holl vallozhioù a zeuio warnout hag a c'hoarvezo ganit:

¹⁶ Milliget e vi e kêr ha milliget e vi war ar maez.

¹⁷ Milliget e vo da baner ha da arc'h.

¹⁸ Milliget e vo frouezh da gof, frouezh da zouar, klodadoù da saout ha da zeñved.

¹⁹ Milliget e vi ez tont ha milliget e vi ez mont.

²⁰ An AOTROU a gaso ar vallozh, ar spont hag ar gourdrouz war gement tra a lakai da zaouarn d'ober, betek ma vi distrujet ha kollet buan, en abeg da fallentez da oberoù, ez po va dilezet evito.

²¹ An AOTROU a stago ar vosenn ouzhit, betek m'he devo kuzumet ac'hanout a-ziwar c'horre ar vro ma'z ez e-barzh d'he ferc'hennañ.

²² An AOTROU a skoio warnout gant al langis, an derzhienn, an danijenn, an devad, ar c'hleze, ar walenn hag an disliv, a heulio ac'hanout betek ma vi aet da goll.

²³ An neñvoù a vo arem a-us da'z penn, hag an douar a vo houarn dindanout.

²⁴ An AOTROU a roio poultr hag uloc'h evel glav da'z touar; diskenn a raio warnout eus an neñv, betek ma vi distrujet.

²⁵ An AOTROU a lakaio ac'hanout da vezañ pilet gant da enebourien; mont a ri a-enep dezho dre un hent, hag e tec'hi a-zirazo dre seizh hent, hag e vi stlabezet dre holl rouantelezhioù an douar.

²⁶ Da gorf marv a vo boued holl laboused an neñvoù ha loened an douar, ha ne vo den d'o spouronañ.

²⁷ An AOTROU a skoio warnout gant goulioù an Ejipt, ruzderioù, gal, tagn, na c'helli ket pareañ anezho.

²⁸ An AOTROU a skoio warnout gant follentez, dallentez, digalonegezh,

²⁹ hag e tastorni e-kreiz an deiz evel ma tastorn an dall en deñvalijenn, ne ri ket berzh ez hentoù, heskinet ha dibourc'het e vi bepred, ha ne vo den ebet da zieubiñ ac'hanout.

³⁰ Dimeziñ a ri da ur wreg hag un den all a gousko ganti, sevel a ri un ti ha ne chomi ket ennañ, plantañ a ri ur winienn ha ne zastumi ket frouezh kentañ anezhi,

³¹ da ejen a vo lazhet dirak da zaoulagad ha ne zebri ket dioutañ, da azen a vo laeret dirazout ha ne vo ket rentet dit, da zeñved a vo roet da'z enebourien ha ne vo den ebet da zieubiñ anezho.

³² Da vibien ha da verc'hed a vo roet d'ur bobl all, da zaoulagad a welo kement-se hag a guzumo war o lerc'h bemdez, ha da zorn a vo dinerzh.

³³ Ur bobl na'z po ket anavezet a zebro frouezh da zouar, da holl labour, ha ne vi bepred nemet heskinet ha mac'het.

³⁴ Mont a ri da sot o sellout ouzh ar pezh a weli gant da zaoulagad.

³⁵ An AOTROU a skoio warnout gant goulioù drouk war da zaoulin ha war da zivhar, ha ne c'helli ket bezañ pareet, kement-se adalek sol da droad betek da gitern.

³⁶ An AOTROU a raio dit kerzhout, gant da roue az po lakaet warnout, etrezek ur bobl na'z po ket anavezet, na te na da dadoù, hag e serviji eno doueoù all, koad ha maen.

³⁷ E-touez an holl bobloù ma kaso an AOTROU ac'hanout en o c'hreiz, e vi ur souezh, ur goap hag ur godis.

³⁸ Kas a ri kalz a had d'ar parkeier met dastum a ri nebeud diouto, rak debret e vo gant ar c'hilheien-raden.

³⁹ Plantañ a ri gwini hag o labouri met ne evi ket eus o gwin ha ne zastumi netra diouto, rak debret e vint gant ar preñved.

⁴⁰ Gwez-olivez az po e-barzh da holl zouaroù met n'en em olevi ket gant o eoul, rak da wez-olivez a gollo o frouezh.

⁴¹ Mibien ha merc'hed a c'hani met ne vint ket dit, rak mont a raint e dalc’hidigezh.

⁴² An amprevaned a baoura da wez ha frouezh da zouar.

⁴³ An diavaeziad a vo ez touez a savo a-us dit en nec'h-tre, hag e tiskenni en traoñ-tre,

⁴⁴ eñ a bresto dit ha te ne bresti ket dezhañ, eñ a vo ar penn ha te a vo al lost.

⁴⁵ An holl vallozhioù-se a zeuio warnout hag a vo war da lerc'h hag a c'hoarvezo ganit betek ma vi distrujet, dre ma ne'z po ket sentet ouzh mouezh an AOTROU da Zoue ha ne'z po ket miret e c'hourc'hemennoù hag e reolennoù en deus kemennet dit.

⁴⁶ Int a vo ur sin hag ur burzhud warnout ha war da lignez, da viken.

⁴⁷ Dre ma ne'z po ket servijet an AOTROU da Zoue gant levenez hag a galon vat e-barzh leunder a bep tra,

⁴⁸ e serviji da enebourien a gaso an AOTROU ez enep, en naonegezh, er sec'hed, en noazhder, en dibourvez a bep tra, hag e lakaio ur yev houarn war da c'houzoug betek ma vi distrujet.

⁴⁹ An AOTROU a lakaio da sevel a-enep dit eus pell, eus pennoù an douar, ur bobl a nijo avel an erer, ur bobl na gompreni ket he yezh,

⁵⁰ ur bobl garv o dremmoù, na ziskouezo na doujañs e-keñver an hini kozh na truez e-keñver ar bugel,

⁵¹ a zebro frouezh da loened ha frouezh da zouar, betek ma vi distrujet. Ne lezo dit na gwinizh, na gwin, nag eoul, na klodadoù da saout ha da zeñved, betek ma vi distrujet,

⁵² hag e sezizo ac'hanout war da holl zorojoù, betek ma kouezho da vogerioù uhel ha kreñv, ar re a fizies enno ez holl vro; da sezizañ a raio war da holl zorojoù, en holl vro en devo roet dit an AOTROU da Zoue.

⁵³ Hag e tebri frouezh da gof, kig ar vibien hag ar merc'hed en devo an AOTROU da Zoue roet dit, e-pad ar seziz, en anken ma o devo lakaet ac'hanout da enebourien.

⁵⁴ An den tenerañ en ho touez, an hini flourañ, a sello gant ul lagad drouk ouzh e vreur, ouzh e wreg karet-mat hag ouzh ar restad eus e vibien en devo espernet,

⁵⁵ ne roio da hini ebet anezho kig e vibien a vo o tebriñ, dre ma ne chomo netra gantañ, e-pad ar seziz, en anken ma o devo lakaet ac'hanout da enebourien ez holl zorojoù.

⁵⁶ Ar wreg tenerañ en ho touez, an hini flourañ, an hini n'he dije ket aesaet lakaat sol he zroad war an douar, dre flourded ha dre denerded, a sello gant ul lagad drouk ouzh he fried karet-mat, ouzh he mab hag ouzh he merc'h,

⁵⁷ ouzh ar bugel bihan a zeuio a-douez he zreid hag ouzh ar vibien a c'hano, rak en diouer a bep tra, e tebro anezho e kuzh, e-pad ar seziz, en anken ma o devo lakaet ac'hanout da enebourien ez holl zorojoù.

⁵⁸ Ma ne virez ket an holl gomzoù eus al lezenn-mañ, a zo skrivet el levr-mañ, o toujañ anv glorius ha spontus an AOTROU da Zoue,

⁵⁹ an AOTROU a lakaio da zont goulioù estonus warnout ha goulioù war da lignez, goulioù bras ha kendalc'hus, kleñvedoù fall ha padus.

⁶⁰ Degas a raio warnout holl gleñvedoù an Ejipt, ac'h eus bet aon razo, hag en em stagint ouzhit,

⁶¹ hag an AOTROU a lakaio ivez da zont warnout kleñvedoù ha goulioù n'int ket skrivet e levr al lezenn-mañ, betek ma vi distrujet.

⁶² C'hwi a chomo e niver bihan, el lec'h ma oac'h niverus evel stered an neñv, dre ma ne'z po ket sentet ouzh mouezh an AOTROU da Zoue.

⁶³ Evel m'en doa an AOTROU plijadur oc'h ober vad deoc'h hag o kreskiñ ac'hanoc'h, evel-se en devo an AOTROU plijadur o koll ac'hanoc'h hag o tistrujañ ac'hanoc'h, hag e viot tennet eus ar vro ez i d'he ferc'hennañ.

⁶⁴ An AOTROU a stlabezo ac'hanout e-touez an holl bobloù, adalek penn an douar betek dibenn an douar, hag e serviji eno doueoù all na'z po ket anavezet, na te na da dadoù, koad ha maen.

⁶⁵ E-touez ar pobloù-se, ne vi ket sioul ha sol da droad n'en devo diskuizh ebet. An AOTROU a roio dit ur galon grenus, daoulagad enkrezet hag un ene trist.

⁶⁶ Da vuhez a vo dispis dirazout, er spont e vi noz ha deiz, aon az po ez puhez.

⁶⁷ Diouzh ar beure e lavari: Perak n'eo ket noz? Da noz e lavari: Perak n'eo ket ar beure? Kement-se en abeg d'ar spont a spourono da galon ha d'ar gwel a welo da zaoulagad.

⁶⁸ Hag an AOTROU a adkaso ac'hanout d'an Ejipt war listri, dre an hent am eus lavaret dit diwar e benn: N'en adweli ken! Hag eno en em werzhot d'hoc'h enebourien evel sklaved ha mitizhien, ha ne vo den d'ho prenañ.