Lucas 12 - Kaxinawá Bíblia (BR)

Hawara hunea imisbu shabakabi unãshanaibukiri Jesusũ hatu yusĩnikiaki, na hãtxarã

¹ Hanushũ Jesus haska waibũ ana mirimahaira haki itxabu hani ni peshũ nĩkatirubumabia nĩkaibũ Jesusũ haki txiti ikabus dukũ yusĩ taewakĩ yuikĩ: —Fariseubu yusĩnanaĩ beparamemisbu misi shasha wati keskabuki. Hatũ yusĩa matuki hikitã matu kanematiruki. Hatũ yusĩa uĩrakãwẽ.

² Hawara habũ hune akubaĩmisburã, ana huneama shabakabi dasibibũ unãshãkanikiki.

³ Hanushũ hawara dasibibũ yui mexu meranua keska hunea hãtxamisbu shaba keska anushũ ana huneama shabakabi nĩkashãkanikiki. Ha inũ, dĩtu merã hikitã beputi beputã hamapai huneshũ yuimisbu hemaĩtĩ anua hãtxa kuxipawẽ txaniai keska nĩkashãkanikiki— iwanã,

Haki besti mesei datetikiri Jesusũ hatu yusĩnikiaki, na hãtxarã

⁴ ana betsa haki txiti ikabu yuikĩ: —Ẽ haibuaibuũ, ana matu yuinũ nĩkakãwẽ. Tsuabũra matũ yura besti tenãtirubuwẽ dateyamakãwẽ, tenãshũ matu ana itxakawapaketirubumakirã.

⁵ Hakia haki besti mesei mã datekubainũbũ matu yuinũ nĩkakãwẽ. Tsuãra matũ hiwea tenãtã txi nukaismanu hawẽ kuxipawẽ matu yunutiru bestiki mesei datekubaĩkãwẽ, Deuskirã. Txanima ẽ matu yuiairã, ha bestiki datei mesekubaĩkãwẽ.

⁶ Haska inũ, isa mixtĩ mekẽ besti bikĩ pei heshe pixta dabeswẽ bitirubuki, karumarã. Habiaskabiakẽ isa tibi tanai Deus hakimaismaki.

⁷ Hamẽ matũ bu dasibi mirimabiakẽ Deusũ ma tana keyumistũ isa mixtĩ itxapa abubiakĩ Deusũ isa mixtĩ binumakĩ matu abuhairamiski. Haskakẽ hawaki dateyamakubaĩkãwẽ— iwanã,

Habũ Jesus ikũ kayabi wai haki dakeisbuma unãti washanaibukiri hatu yusĩnikiaki, na hãtxarã

⁸ ana hatu yusĩkĩ: —Tsuabũra ea ikũwaĩ dakeama ea datã akĩ yurabu hatu yuikĩ: “Ẽ Jesusunaki”, ikubaĩmisbu eãri Deusũ nai tsumabu bebũ nishũ mekekĩ: “Narã, enabuki”, akĩ ẽ hatu yuishũshanaii.

⁹ Hakia tsuabũra ea txibãma ẽ hãtxaki dakei: “Ẽ Jesus ikũwãmaki”, eki ikubaĩmisburã, eari Deusũ nai tsumabu bebũshũ: “Narã, enabumaki”, akĩ ẽ hatu hãtxashunamari ishanaii.

¹⁰ Hamẽ tsuabũra ẽ matũ Hutxi Kayabi Iuwa ea yuãbiaibũ Deusũ hatũ txakabu buashũtiruki. Hamẽ betsarã, tsuabũra Deusũ Yushĩ Pepa yuaĩbu hatũ txakabu Deusũ buaismaki.

¹¹ Haska inũ, matuki sinatakĩ hau matu kupinũbũ hatũ itxati hiwe anu kasmai shanẽ ibu betsa anu kasmai matu iyushũ hatũ shanẽ ibubu anu matu nitxiãbu: “Harakiri yuishãpa?” iki dateyamashãkãwẽ.

¹² Matu haska waibu habiatiã matu hãtxamakĩ Deusũ Yushĩ Pepatũ matu unãmakĩ haska matu hãtxamashanikiki— hatu waya

Hawẽ hiwetimabiakẽ mabuwẽ kemuarã, mesekiaki, na hãtxarã

¹³ hanushũ mapuabu anushũ huni betsã hau Jesusũ ea merabewanũ ishũ yuikĩ: —Yusĩnaã, ẽ ibu mawaxĩkẽ ẽ hutxĩ hawẽ mabu ea pashkashunamaki. Hau ea pashkashunũ ea yuishũwẽ— aka

¹⁴ nemakĩ Jesusũ yuikĩ: —Ẽ matũ shanẽ ibumaki. Haska watã ẽ matu pashkashũtirumaki— iwanã,

¹⁵ yurã kaiã yuikĩ: —Mã mabuwẽ kemuairã, matu yuinũ nĩkakãwẽ. Mã mabuyabia hatũ matu hiwematirumawẽ taea hamapai mabu xarabu besti abui ha hayanũ ika mã kemukũkainairã, uĩrakãwẽ— iwanã,

¹⁶ hanushũ haskakiri miyuiwẽ hatu yusĩkĩ —Huni betsa mabu mirimayatũ hawẽ bai anu yunu betsa betsapa washũ itxawatã

¹⁷ hawẽ xinãnẽ xinãkĩ: “Ẽ shekiwã mirima ẽ hani arutirumaki. Haska washãpa?” iwanã,

¹⁸ “Ẽ xinãnã, ẽ shekiwã aruti betsa betsapa apakĩ keyutã ana hanu aruti hiwe ewapa wakĩ hanu ẽ shekiwã inũ ẽ mabu ẽ arushanaii”.

¹⁹ Haska watã hamebi xinãkĩ yuikĩ: “Ma hanu ẽ mabu inũ ẽ piti itxapa aruti ẽ hayaki. Haskakẽ ana dayama huĩrukũkĩ piti itxapa pikĩ mabesh aki benimakũkaini bari itxapa ẽ hiweshanaii”, ikaya

²⁰ hanushũ Deusũ yuikĩ: “Haskamaki. Haska mĩ yuiairã, mĩ unãmahairaki. Na habia mexu merã mĩ mawaya ha mĩ mabu mĩ pewakĩ keyushurã, tsuabũra pashkashãkanikiki”, akĩ yuitiruki.

²¹ Ha huni keskakĩ tsuabũra hamebi mabu itxawakĩ yauxikĩ Deus haibuwama Deus bebunua nuitapaikiki— iwanã,

Deusũ hawenabu mekekubaĩmiskiaki, na hãtxarã

²² hanushũ Jesusũ hawẽ tsumabu besti ana yuikĩ: —Eska bestiwẽ taea matũmebi mã hamapaiwẽ dabanã imisbukiri matu yusĩnũ nĩkakãwẽ. Hiwe bestia pepakũkaĩnũ ika piti pi inũ tari sawenũ ika hawẽ dabanã iyamakubaĩshãkãwẽ. Hiwea hayairã, pitiwẽ besti mã itirubumaki. Yura hayairã, tari sawe bestinũ ika mã itirubumariki. Haskakẽ ha dabewẽ taea mã hiwenũ Deusũ matu hiwea inãma iniki.

²³ Hamẽ Deusũ matu mekekubaĩmistũ matu damiwatã matu hiwemakĩ piti inũ matũ tari matu inãkubaĩmiski.

²⁴ Ha inũ, nai anu peiyabukiri matu xinãmanũ nĩkakãwẽ. Habũ hawa mibã banama inũ hawa bimi tsekaisbuma inũ habũ piti aruti hayabumabiakẽ Deusũ hatu pimakubaĩmiski. Haskakẽ Deusũ matu abukĩ peiyabu matu binumakubainikiki.

²⁵ Ha inũ, tsuabura ibubis nuikĩ hawẽ mabu inũ hawẽ piti xinaĩwẽ taeshũ hawẽ hiwea ana txaipawatirumahairaki.

²⁶ Mĩ haska bestitirumawẽ taea hawara betsa betsapa inũ ika hawẽ dabanã iyamakubaĩkãwẽ.

²⁷ Haskatã hua tuemis xinãkãwẽ. Hawa dayakĩ turu waismabia hawẽruai tuemiski. Hakia nukũ shenipabu shanẽ ibu Salomão mabuhairayatũ hawẽ tari hawẽrua saweshũ hawẽruakĩ hua tuemis binuama iniki.

²⁸ Hakia ni mashu huaya sepaxĩshũ kuamisbuki. Deusũ hua hawẽruawamistũ ha hua binumakĩ Deus matuwẽ nuikĩ matu tari sawematiruki, mã ikũ beshmas wabiayarã.

^29-30 Haskakẽ yura dasibibu mai hirabi anuabu piti inũ tariwẽ kemukĩ benakubaũmisbuki. Hakia maturã, mã betsaki. Matũ Epã matu unaĩwẽ taea ha piti inũ tari mã bikatsis imisrã, ana has xinaĩ hawẽ dabanã iyamakubaĩshãkãwẽ.

³¹ Hakia hawara Deusũ abuai txibãkĩ ha dukũ Deus shanẽ ibuwakĩ xinãkubaĩshãkãwẽ. Mã haska wai ha katxu hawẽ hiweti piti inũ tari mã hayakũkaĩshanaii, Deusũ matu merabewarã— iwanã,

Deus hiweshuni pepatikiri Jesusũ hatu yusĩnikiaki, na hãtxarã

³² Jesusũ hawẽ tsumabu yusĩkubaĩkĩ yuikĩ: —Ẽ matu mekeawẽ taea mã ẽ txashuwã keskabuki. Ha inũ, mã ikũwaĩbu itxapamabiakẽ matũ Epa Deusũ hawenabu matu watã habe matu hiwemakubaĩshanikiki. Haskawẽ taea hawawẽ dateyamakãwẽ.

³³ Matũ mabu hawara ma hayawẽ nuiama matũ mabu betsawẽ pei bitã hawẽ nuitapaibu merabewakubaĩshãkãwẽ. Hamẽ ha pei matũ kapãkãki mã arua yumetsubũ bibaĩtirubuki. Ha inũ, hawẽ masãnẽ pesa pesa atiruki. Hakia matũ pei yauxiama mã inãnanãmisbu pewẽ matu kupikĩ nai anua hawa txapui keyuisma Deusũ matu inãshanikiki.

³⁴ Hamẽ tsuabura hawẽ hiweti mabuwẽ kasmai Deuskiri xinaĩ mã Deus hiweshunairã, habiariri matũ xinãnẽ mã nuiai hayaki, nai anu kasmai mai anurã— iwanã,

Usha keskama nĩkai keskakĩ Jesus hushanai manakubaĩtikiaki, na hãtxarã

³⁵ Jesusũ hatu yusĩkubaĩkĩ ana yuikĩ: —Tari pekariama inũ bĩ nukawariama keskashũ mã ea manakubaĩshanũ bebũkiri matu yuinũ nĩkakãwẽ.

³⁶ Hawẽ haibu aĩyaĩ anu hiwe ibu nawai ka hawẽ tsumapã manaya hushũ hikinũ ishũ kenaya hawẽ beputi shui hawaira bepẽshũshanũ ika ushama manai keskakubaĩkãwẽ.

^37-38 Hanũkaĩ hatiã huimẽkainã? yamenapũ kasmai takara keui taeaya kasmai hiwe ibu hukĩ hawẽ tsuma ushabuma betxituxiaya hawẽ tsumabu benimahairashãkanikiki. Hanushũ hiwe ibũ hawẽ tsumabu duawakĩ hau habetã pinũbũ hatu bashti imatã hatu pimashanikiki.

³⁹ Ha inũ, hatiara yumetsu huai bebũkiri unãkĩ hiwe ibũ beshtekatsi manatiruki, hau hikiyamanunã.

⁴⁰ Haska keskariai hatiãra ẽ matũ Hutxi Kayabi Iuwa ẽ ana hushanai tsuã unãmakẽ matunã, matũ hiwea pewakĩ keyutã ea manakubaĩshãkãwẽ— ikaya

Tsuma txikix inũ tsuma txikixmakiri Jesusũ hatu yusĩnikiaki, na hãtxarã

⁴¹ hanushũ Pedrõ Jesus yukakĩ yuikĩ: —Yusĩnaã, na miyuiwẽ mĩ nuku yusĩaĩnã, nukuna bestimẽ? Dasibitunaraka?— aka

⁴² Jesusũ yuikĩ: —Eska keskaki. Shanẽ ibu betsa txai kakĩ hawẽ tsuma unãnepa yunubaĩmiskiri matu yuinũ nĩkakãwẽ. Hawẽ tsuma betsabu pimakĩ hau hawẽ hiwe mekeshũkubainũ hatũ shanẽ ibũ hawẽ tsuma unãnepa yunubaĩmiski.

⁴³ Hanua shanẽ ibu ana txĩtũkirã haska yunubainima ashũkubainaya ha shanẽ ibu haki nukutuxitã benimahairashanikiki.

⁴⁴ Txanima ha shanẽ ibũ hawẽ tsuma dasibi hawẽ hamapai mekemashanikiki, hawẽ hiwe inũ, hawẽ bai betsa betsapa inũ, hawẽ inabu inũ, hawẽ tsumabu betsarã.

⁴⁵ Hakia hawẽ tsuma xinã pema yunubainima xinã txakakĩ yuikĩ: “Ẽ shanẽ ibu yane huamaki. Hatiara hushanikiki”, iki dayanika betsabu huni inũ aĩbu itxakawai nawatxakayamai pãekĩ

⁴⁶ hatiã huai manama ha shanẽ ibu hikituxitã hawẽ yunua ashũamawẽ taeshũ manaka txakaibube kupihairashanikiki.

⁴⁷ Haskakẽ tsuabũra hawẽ shanẽ ibũ daya unã keyubiakĩ haska abuai akama inũ txibãmawẽ taeshũ hatu kupihairashanikiki.

⁴⁸ Hakia betsarã, shanẽ ibũ yunuama kakẽ hawẽ xinã haska abuai unãma kanemisbu ha mawaira hatu kupiama ishanikiki. Hanushũ tsuara Deusũ hãtxa itxapa inãxina hawẽ taeshũ hawẽ daya itxapari yukashanikiki. Tsuara Deusũ itxapa mekemamis hani haska wamis itxapari yukariakubaĩshanikiki— iwanã,

Jesusũ hatu pashkakeakẽnũ ika hunikiaki, na hãtxarã

⁴⁹ Jesusũ ana hawẽ tsumabu yusĩkĩ yuikĩ: —Ea ikũwaĩbu inũ ea ikũwãbuma hawẽ unãti wakĩ hatu pashkakĩ unãti wanũ ika ẽ huniki. Haskakẽ ewẽ taea hau pashkanũbũ ẽ manayuaii.

⁵⁰ Haskakẽ Deusũ ea unãti wakĩ hatu ea tenãmakĩ ea nuitapawashanaibu manai ẽ yumãyuaii.

⁵¹ Mã xinãnã, mai anushũ unãnuma matu hiwematanũ ika ẽ huni dabanẽ mã xinaĩmẽkaĩ? Haskamaki. Yurabu pashkanũ ika ẽ huniki.

⁵² Haskakẽ na habiatiã taewakĩ hiwe betsa anushũ hau ea txibanũbũ hawenabu mekẽ besti pashkakĩ dabe kasmai dabe inũ bestibũ ea ikũwaĩbu dabe kasmai dabe inũ bestibũ ea ikũwãbuma ẽ hatu pashkakeakekubainaii.

⁵³ Ẽ hatu haska waya ewẽ taea huni bake hawẽ epabe sinatanameshãkanikiki. Ha inũ, aĩbu bake hawẽ ewabe sinatanameshãkanikiki. Ha inũ, hawẽ babawã hawẽ yayabe habiaskariashãkanikiki. Hatu haska wakĩ ẽ hatu pashkakeakekubaĩshanaii— hatu watã,

Hanu kupiti huaitiã unãbumakiri Jesusũ hatu yusĩnikiaki, na hãtxarã

⁵⁴ hanushũ mapuabu Jesusũ hatu dasibi yuikĩ: —Bari kaikiri mexu mexuai uĩkĩ: “Ui bekatsis ikikiki”, ikĩ uĩkĩ mã yuimiski, kaneamarã.

⁵⁵ Ha inũ, sulkiria niwe bei shũku ikai uĩkĩ: “Ikis bari kuhairayuikiki”, ikĩ mã yuiriamiski, kaneamarã.

⁵⁶ Beparamemisbuũ, haska ui inũ niwe bemis unãbiamisshũ hanu txakabu betsa betsapa kaĩakeakeai uĩbiakĩ haskai mã hiwea matu kupishanai mã unãmamẽ?— iwanã

Deviawẽ hau hawẽ nuinũ daewatikiri Jesusũ hatu yusĩnikiaki, na hãtxarã

⁵⁷ —Haskai matũmebi unãbiakĩ hawara pepa shabakabi matuna mã pe waismamẽ?

⁵⁸ Haska inũ, yura betsa mã devehairawẽ taeshũ ha mã deveatũ nawa shanẽ ibu anu matu iyuaya hau shanẽ ibũ hawẽ policiabu matu bitximayamanũ ha mã devea hawawẽra daewakãwẽ.

⁵⁹ Mã daewabainama matu bitxiabu mã paka keyuama ikũ mã haskatã kaĩ tirumaki. Habiaskari wakĩ ea haibuwatã Epa Deus daewariakubaĩkãwẽ, matũ txakabuwẽ hau matu kupiyamashanunã— hatu waya