Matha 1 - Tiomna Nua 1951 (de Siúnta)

¹ Leabhar geinealaigh Íosa Críost, mic Dháibhí, mic Abrachaim.

² Do ghein Abracham Íosóg; agus do ghein Íosóg Iácób; agus do ghein Iácób Iúdás agus a dhearbhráithre.

³ Agus do ghein Iúdás Fares agus Sara ó Thamar; agus do ghein Fares Esróm; agus do ghein Esróm Aram;

⁴ agus do ghein Aram Aminadab; agus do ghein Aminadab Naasón; agus do ghein Naasón Salmón;

⁵ agus do ghein Salmón Boes Ó Rachab; agus do ghein Boes Ióbed ó Rút; agus do ghein Ióbed Iesse;

⁶ agus do ghein Iesse an rí Dáibhí.

⁷ Agus do ghein an rí Dáibhí Solamh ó’n mnaoi do bhí ag Úrias; agus do ghein Solamh Robóam; agus do ghein Robóam Abia; agus do ghein Abia Asa;

⁸ agus do ghein Asa Iósafat; agus do ghein Iósafat Ióram;

⁹ agus do ghein Ióram Ósias; agus do ghein Ósias Ióatam; agus do ghein Ióatam Achas;

¹⁰ agus do ghein Achas Esecias; agus do ghein Esecias Manassés; agus do ghein Manassés Amós;

¹¹ agus do ghein Amós Iósias; agus do ghein Iósias Iechonias agus a dhearbhráithre le linn broide Baibiolóine.

¹² Agus tar éis broide Baibiolóine do ghein Iechonias Salatiél; agus do ghein Salatiél Sorobábel;

¹³ agus do ghein Sorobábel Abiúd; agus do ghein Abiúd Eliachém; agus do ghein Eliachém Asór;

¹⁴ agus do ghein Asór Sadóc; agus do ghein Sadóc Achím;

¹⁵ agus do ghein Achím Eliúd; agus do ghein Eliúd Eleásar; agus do ghein Eleásar Mattán;

¹⁶ agus do ghein Mattán Iácób; agus do ghein Iácób Seosamh, fear Mhuire, ó n‐ar geineadh Íosa d’á ngoirthear Críost.

¹⁷ Uime sin, na geinealaigh go léir ó Abracham go Dáibhí, is ceithre glúna déag iad; agus ó Dháibhí go broid Bhaibiolóine, ceithre glúna déag; agus ó bhroid Bhaibiolóine go Críost, ceithre glúna déag.

¹⁸ Agus mar so is eadh tharla geineamhain Íosa Críost. Iar mbeith d’á mháthair, Muire, luaidhte le Seosamh, sara dtángadar le chéile, frith go raibh sí torrach ó’n Spiorad Naomh.

¹⁹ Acht, ó ba dhuine fíréanta Seosamh, a fear, agus nárbh áil leis a maslú go poiblidhe, ba mhian leis a cur uaidh ós íseal.

²⁰ Acht ag machtnamh dhó air, do taidhbhrigheadh dhó i n‐aisling aingeal an Tighearna, adubhairt, a Sheosaimh, a mhic Dhaibhí, ná bíodh eagla ort do chéile, Muire, thabhairt chun aoin‐tighis leat; óir, an ghein atá gabhtha aice, is ó’n Spiorad Naomh í.

²¹ Béarfaidh sí mac, agus do‐bhéarfaidh tú ÍOSA mar ainm air, óir slánóchaidh sé a phobal ó n‐a bpeacaidhibh.

²² Agus do thuit seo amach chum go gcóimhlíonfaidhe an nidh adubhairt an Tighearna tríd an bhfáidh, g‐á rádh,

²³ Féach, béidh maighdean torrach, agus béarfaidh sí mac, Agus do‐bhéarfar Emmanuel mar ainm air, ainm chialluigheas, Dia linn.

²⁴ Agus ar ndúiseacht do Sheosamh, do‐rinne sé mar d’órduigh aingeal an Tighearna dhó, agus do ghlac sé chuige a bhean,

²⁵ acht níor aithin sé í nó go rug sí mac, agus thug sé ÍOSA mar ainm air.