Salm 118 - An Bíobla Naofa 1981

Iomann Buíochais don Tiarna

¹ Alleluia. Tugaigí buíochas don Tiarna toisc gur maith é; agus go maireann a bhuanghrá go brách.

² Bíodh teaghlach Iosrael á rá: “Maireann a bhuanghrá go brách.”

³ Bíodh teaghlach Árón á rá: “Maireann a bhuanghrá go brách.”

⁴ Abradh an dream lenarb eagal an Tiarna: “Maireann a bhuanghrá go brách.”

⁵ Ghair mé ar an Tiarna i mo chruachás; d'fhreagair sé agus shaor sé mé.

⁶ Tá an Tiarna i m'fhochair; ní baol dom. Cad a dhéanfaidh an duine dom?

⁷ Tá an Tiarna i m'fhochair ag cuidiú liom; beidh mo naimhde romham faoi tháir.

⁸ Is fearr dul i muinín an Tiarna ná i muinín an duine.

⁹ Is fearr dul i muinín an Tiarna ná i muinín na bhflatha.

¹⁰ Thimpeallaigh na ciníocha go léir mé; threascair mé in ainm an Tiarna iad.

¹¹ Chruinnigh siad thart i mo thimpeall; threascair mé in ainm an Tiarna iad.

¹² Chruinnigh siad i mo thimpeall mar bheacha, ina mbladhaire amhail tine i measc driseog; threascair mé in ainm an Tiarna iad.

¹³ Teilgeadh síos mé i dtreo is go dtitfinn; ach chuidigh an Tiarna liom.

¹⁴ Is é an Tiarna mo neart is mo mhisneach; is é a thug slán mé.

¹⁵ Cluintear gártha lúcháire is caithréime i mbothanna na bhfíréan. “D'oibrigh deaslámh an Tiarna go tréan;

¹⁶ is i a dheaslámh a d'ardaigh mé. D'oibrigh deaslámh an Tiarna go tréan.”

¹⁷ Ní éagfaidh mé, mairfidh mé; agus inseoidh mé a mhóréachtaí.

¹⁸ Cé gur smachtaigh an Tiarna go dian mé, níor dhaor sé chun báis mé.

¹⁹ Osclaígí dom doirse na fíréantachta; rachaidh mé isteach a thabhairt buíochais.

²⁰ Seo agaibh doras an Tiarna trína rachaidh na fíréin isteach.

²¹ Gabhaim buíochas leat de bhrí gur éist tú liom; agus gur tú mo shlánaitheoir.

²² An chloch dár dhiúltaigh na saoir, rinne ceann an chúinne di.

²³ Is é an Tiarna a rinne an ní seo, agus is éachtach linn é.

²⁴ Is é seo an lá a rinne an Tiarna; bíodh áthas is gliondar orainn.

²⁵ Fóir orainn, achainímid, a Thiarna; a Thiarna, go n‑éirí linn!

²⁶ Is beannaithe in ainm an Tiarna an té atá le teacht. Beannaímid sibh as teach an Tiarna.

²⁷ Sé an Tiarna Dia ár solas. Gabhaigí ar aghaidh i mórshiúl le craobhacha go beanna na haltóra.

²⁸ Is tú mo Dhia, gabhaim buíochas leat; móraim thú, a Dhia.

²⁹ Tugaigí buíochas don Tiarna toisc gur maith é; maireann a bhuanghrá go brách.