Matha 1 - An Bíobla Naofa 1981

Íosa, Mac Dháiví...

¹ Leabhar ghinealach Íosa Críost, mac Dháiví, mac Abrahám.

² Ghin Abrahám Íosác; ghin Íosác Iacób; ghin Iacób Iúdá agus a dheartháireacha;

³ ghin Iúdá Fearas agus Zára ó Thámár; ghin Fearas Easróm; ghin Easróm Áram;

⁴ ghin Áram Aimineadab; ghin Aimineadab Náiseon; ghin Náiseon Salmón;

⁵ ghin Salmón Boaz ó Ráchab; ghin Boaz Ióibeid ó Rút; ghin Ióibeid Iseái;

⁶ ghin Iseái Dáiví rí. Ghin Dáiví Solamh ó bhean Úirías;

⁷ ghin Solamh Róbóam; ghin Róbóam Aibiá; ghin Aibiá Ásaf;

⁸ ghin Ásaf Iósáfat; ghin Iósáfat Iórám; ghin Iórám Ózáias;

⁹ ghin Ózáias Iótám; ghin Iótám Áchaz; ghin Áchaz Eizichias;

¹⁰ ghin Eizichias Manasaes; ghin Manasaes Amós; ghin Amós Iósáias;

¹¹ ghin Iósáias Iachónáias agus a dheartháireacha le linn bhroid na Bablóine.

¹² Tar éis bhroid na Bablóine, ghin Iachónáias Salaitiéil; ghin Salaitiéil Zoróbaibeil;

¹³ ghin Zoróbaibeil Aibiúd; ghin Aibiúd Eiliáicím; ghin Eiliáicím Azór;

¹⁴ ghin Azór Sadóc; ghin Sadóc Aichím; ghin Aichím Eiliúd;

¹⁵ ghin Eiliúd Eiliazar; ghin Eiliazar Matan; ghin Matan Iacób;

¹⁶ ghin Iacób Iósaef, fear céile Mhuire ónar rugadh Íosa ar a dtugtar Críost.

¹⁷ A bhfuil de ghlúine ann dá bhrí sin: ó Abrahám go dtí Dáiví, ceithre glúine déag; ó Dháiví go dtí broid na Bablóine, ceithre glúine déag; agus ó bhroid na Bablóine go dtí Críost, ceithre glúine déag.

...a Gabhadh ón Spiorad Naomh, a Rugadh ó Mhuire Ógh

¹⁸ Seo mar a tharla Íosa Críost a shaolú. Bhí Muire, a mháthair, luaite le Iósaef, agus sula ndearnadar aontíos, fuarthas torrach í ón Spiorad Naomh.

¹⁹ Ba dhuine cóir a fear céile Iósaef, ach níorbh áil leis go dtabharfaí míchlú di, agus chinn sé í a scaoileadh uaidh os íseal.

²⁰ Ag machnamh ar an méid sin dó, áfach, thaispeáin aingeal ón Tiarna é féin do i mbrionglóid agus dúirt: “A Iósaef, a mhic Dháiví, ná bíodh eagla ort do bhean chéile Muire a thabhairt abhaile leat, óir, an leanbh atá gafa aici, is ón Spiorad Naomh é.

²¹ Béarfaidh sí mac, agus tabharfaidh tú Íosa mar ainm air, óir slánóidh sé a phobal óna bpeacaí.”

²² Thit an méid sin go léir amach chun go gcomhlíonfaí a ndúirt an Tiarna tríd an bhfáidh:

²³ “Beidh an mhaighdean torrach agus béarfaidh sí mac agus tabharfar Imeánuéil mar ainm air,” - ainm a chiallaíonn: Tá Dia linn.

²⁴ Dhúisigh Iósaef agus d'éirigh, agus rinne mar d'ordaigh aingeal an Tiarna dó: 25 a bhean a thabhairt abhaile leis. Ach ní raibh cuid aige di nó gur rug sí mac, agus thug sé Íosa mar ainm air.