ВЫСЛОЎІ 17 - Біблія (пераклад А.Бокуна) Біблія (пераклад А.Бокуна)
ВЫСЛОЎІ 17

¹ Лепш сухая луста ў супакоі, чым дом, поўны заколатай жывёлы, са сваркамі.

² Разумны слуга будзе панаваць над шалапутным сынам і між братоў будзе дзяліць спадчыну.

³ Літавальны гаршчок — для срэбра, і горан — для золата, а сэрцы выпрабоўвае ГОСПАД.

⁴ Ліхотнік зважае на вусны нягодныя, хлус слухае язык згубны.

⁵ Хто насьміхаецца з беднага, той зьневажае Творцу ягонага, і хто цешыцца з няшчасьця, не пазьбегне пакараньня.

⁶ Карона старых — сыны сыноў, і слава сыноў — бацькі іхнія.

⁷ Не пасуе бязглуздаму паважная мова, тым больш шляхетнаму вусны брахлівыя.

⁸ Хабар — каштоўны камень у вачах гаспадара яго, куды толькі зьвернецца ён, будзе мець посьпех.

⁹ Хто прыкрывае правіну, шукае любові, а хто паўтарае слова, разьдзяляе сяброў.

¹⁰ Мацней дзейнічае нагана на разумнага, чым сто ўдараў на дурнога.

¹¹ Ліхадзей шукае толькі непаслухмянства, таму бязьлітасны анёл будзе пасланы супраць яго.

¹² [Лепш] спаткаць мядзьведзіцу, пазбаўленую дзяцей, чым дурня ў неразумнасьці ягонай.

¹³ Хто адплочвае злом за дабро, у таго зло не адыйдзе ад дому ягонага.

¹⁴ Пачатак звадкі — прарыў вады, перш, чым спрэчка пачнецца, пакінь [яе].

¹⁵ Той, хто апраўдвае злачынцу, і той, хто вінаваціць праведніка, — абодва агіда для ГОСПАДА.

¹⁶ Навошта грошы ў руцэ дурнога, каб набыць мудрасьці, калі няма розуму?

¹⁷ Сябра любіць у кожны час, і ў нядолі робіцца братам.

¹⁸ Чалавек, пазбаўлены розуму, дае руку і ручаецца перад абліччам бліжняга свайго.

¹⁹ Хто любіць сваркі, любіць грэх, і хто падымае высока вароты свае, шукае загубы.

²⁰ Крывадушнае сэрца ня знойдзе дабра, і язык здрадлівы трапіць у бяду.

²¹ Хто нараджае неразумнага, [нараджае] на смутак сабе, і бацька бязглуздага ня будзе цешыцца.

²² Радаснае сэрца аздараўляе, [нібы] лекі, а маркотны дух сушыць косткі.

²³ Бязбожнік бярэ хабар з-за пазухі, каб скрывіць сьцежкі правасудзьдзя.

²⁴ Перад абліччам разумнага — мудрасьць, а вочы дурня — на канцы зямлі.

²⁵ Сын неразумны — згрызота для бацькі свайго і горыч для той, якая яго нарадзіла.

²⁶ Таксама нядобра караць праведніка і біць шляхетнага за шчырасьць.

²⁷ Хто мае веданьне, той у словах ашчадны, і чалавек разумны мае спакойны дух.

²⁸ Таксама неразумны, калі маўчыць, лічыцца мудрым, і калі закрывае вусны свае, разважлівым.