DUNGWVNC 4 - ASII LAKDAP Bible (BSI) ASII LAKDAP Bible (BSI)
DUNGWVNC 4

¹ Kiijiishe Mosheq raq Tatiwe bom ka akha treto, “Shatmaq Israilnok raq ngi ma kam mak kiimaq ngi raq chong tiikang kra taimak raüha. Tsangshiq raq ngi nang nga ümniika ngi rai riihumki maü dea nguta nguraüha?”

² Kiijiishe Tatiwe raq apaiq ma waito, “Ümjaq niika jamlai wa shamtlaü?” “Nyeakii shamtiikang,” nguta apaiq raq treto.

³ Tatiwe raq nguto, “Kra hiq na baiqlaq.” Ümtiikiiwa Mosheq raq nyeakii ka hiq na baiqtaq, kra nyeakii ka paü ma jakito. Kiimaq apaiq ka kra paükaü tho wa aju riito.

⁴ Kiijiishe Tatiwe raq Mosheq ma thaüto, “Hiq na bum laüta kra amaita maq tsunsaq riilaq.” Kiimaq Mosheq ka hiq na bumsaq raüta paükaü ka amaita maq tsunhit riito. Kiimaq paü ka nyeakii miishe jaki nongto.

⁵ Kiimaq Tatiwe raq nguto, “Ara klo laüta Israilnok ma Tatiwe, tsangtitiim Shiikeawe, Abraham Shiikeawe, Isak Shiikeawe, kiimaq Jakob Shiikeawe ka ümniirai riihum kito dea nguta saqse tiichhi kuqlaq.”

⁶ Kiimaq Tatiwe raq Mosheq ma thongshi ri hali thaüto, “Ümjaq ka ümsamtong mong na thülaq.” Kiimaq Mosheq raq aming ka langto. Kiimaq ümtiikiiwa apaiq raq ajaq ka samtong mong wa lamtaq, ajaq ka atsi, ami tamli she tsak-hiiq ikha lüriirii she riito.

⁷ Kiijiishe Tatiwe raq thaüto, “Ümjaq ka ümsamtong jong mong na hali thü nonglaq.” Kiimaq apaiq raq ajaq ka asamtong mong na thiito. Kiimaq apaiq raq ajaq ka kinphai na hali lam nongtaq, kra akhing na ajaq ka phintsaq tsaq she riito, akhum ahin kiikhiishe riito.

⁸ Kiimaq Tatiwe raq nguto, “Tsangshiq raq ümniima kammak riimakla aphati awang chang jaqsham kriima kam mak raüla, arti jaqsham ariiraq tsangshiq ka mitiikam she.

⁹ Kiimaq ara awang chang laknai she arma min tsangshiq ka ümniima kammak li la raüla, kiimaq ümniiraq jamlai wa chongtlaü kra ma kammakli raüla, Nail rai wa kham ka khulaq, laüta hiq na nyuklaq. Raüla kra kham ka tiijai miishe mijaki.”

¹⁰ Shatmaq Mosheq raq nguto, “Riimak, Tatiwe, ngi ka naq thaükiq. Ngi ka maiq ma bom chongketi riimak. Kiimaq ümniiraq ngi rai riibom tlaü ariiraq, ngi ka tsüwe tsitwe ma tiija mak. Ngi ka maiqrai riibom tsin mang we. Kiimaq agak agaq nai anang anamtiwe.”

¹¹ Kiijiishe Tatiwe raq apaiq ma nguto, “Maiqse ma anübok keti ka juwa? Kiimaq apaiq ka juro nibii ma tiijabaiqtla? Riimakla apaiq ka juro nütang ma tiijabaiqtla? Apaiq ma amakpo ka juro kuqtla? Riimakla juro amak ka tiichukbaiqtla? Arka Ngi, Tatiwe raq klo tiikang.

¹² Ümchaü min, kilaq! Ümnaq jamkhii bom chang wa ka Ngi raq mikhrum kuqkang. Kiimaq jamlai chong chang wa kra Ngi raq michong kuq kang.”

¹³ Shatmaq Mosheq raq treto, “Riimak, Tatiwe, mangchan laüta maiq ahinti tiikilaq.”

¹⁴ Ara ngukiitiishe Tatiwe ka Mosheq ma akhiq she riito. Kiimaq akha nguto, “Riita Lewiwe ümphu Aron kiiha? Ngi raq asap-ha apaiq ka bom asa atsin wiq. Liilaq, apaiq ka ümchaü ümniirai riihumwa ana watlo. Kiimaq apaiq ka ümniirai riihum haüla chochikhiq miraq.

¹⁵ Ümniiraq apaiq ma chonglaq. Laüta jamlai chong chang wa kra apaiq ma chonglaq. Ngi raq namnai wiita ma jamlai chong chang wa kra mikhrum kuqkang. Kiimaq Ngi raq namnai wiita ma jamlai klo chang wa kra achong mirkuqkang.

¹⁶ Apaiq ka ümnübok ma mija. Krai mren mungmaiqse ma jamlai chongke chang wa kra ümniiraq chongrii na apaiq raq michong kuq. Kra raüla ümniika Shiikeawe ikha mija haü, ümniiraq apaiq ma jamlai bom chong chang wa kra michong kuq haü.

¹⁷ Ara nyeakii ara ümjaq na shamholaq. Ara nyeakii maq awang chang jaq pahea misham haü.”

¹⁸ Raütiishe Mosheq ka ahuchhiwe Jethro phaniishe hali jang wan nongto. Raüta apaiq ma akha nguto, “Mangchan laüta ngi ka Ejip mung na, iphu inotiim phana tiikilaq. Tsangshiq ka ahea sha jamkhiiwa sitla liiki pha.” Kiimaq Jethro riimin ahea na nguta treto. Raüta khusang maq sikikiq nguta apaiq ma kiim riiphea bomto.

¹⁹ Riita Mosheq ka Midian mung niili shon na, Tatiwe raq apaiq ma thaüto, “Kilaq Ejip mung na jangholaq. Ümnaq tsea ma tankhanti thun maiq ka wiita tsaikito she.”

²⁰ Krai mren Mosheq raq achak nai asetiim ka kumtoq raikhü na tiingato. Raüta tsangshiq rai Ejip mung na, Shiikeawe raq shamholaq nguta chongtaq nyeakii kra ajaq na shamraü kihoto.

²¹ Kiimaq Tatiwe raq Mosheq mahali nguto, “Riita ümchaü min, ümniika Ejip mung niishe jangho nongtlaü. Kiimaq Ngi raq ümniima awang chang jaqsham thun klo miitu ningkun kuq kang kra hokhamwe makki na klo miitu khekham riilaq. Shatmaq Ngi raq hokhamwe tsan tsü ka lanlaqlaq mitiija baiqha. Kiimaq apaiq raq Israilnok ka tiiwa mak miningtang.

²² Kra riihaüla, ümniiraq apaiq ma akha chongraatlo, Ngi, Tatiwe raq akha ngutiikang, ‘Israil ka ise chhikhuwe.

²³ Ngi raq ümniima ise ka tiiwa ratlo. Apaiq raq Ngi ka mishomnoq laq. Shatmaq ümniiraq apaiq ka ningtang laü. Ümchaü min, Ngi raq ümse chhikhuwe kriishe mitsat baiqha.’”

²⁴ Kiimaq Ejip mung na kaiho lam maq lamjap hiq ba maq, Tatiwe ka Mosheq rai riihumto, raüta apaiq ka atsea baiq danto.

^25-26 Kiijiishe tsangnyung Jippora raq longpo ashi aniq asiwiqti kra tsunhit raüta, ase khum wa atho ka han baiqto. Raüta kriimaq Mosheq hok na thansaq riito. Kra athohan mrochhi kra klo kha na, “Ümniika ngi ma tiijai tiidongti iwese,” nguta nguto. Kiimaq Tatiwe raq Mosheq ka tsatbaiq mak tiiwong kuqto.

²⁷ Kiimaq anü na Tatiwe raq Aron ma chongto, “Kumtsaiphii wang kiina kilaq. Laüta Mosheq rai riihum kikiq.” Kiimaq apaiq ka Mosheq rai riihumkai asii pum kiina kihoto. Kiimaq apaiq ka Mosheq rai riihumto. Raüta apaiq theaphi na shupto.

²⁸ Kiijiishe Mosheq raq Aron ma Tatiwe raq apaiq ka Ejip mung na jangholaq nguta thaütaq akhing na bom chongkuqtaq thun ka wiita Aron ma tlü chongkuqto. Kiimaq Tatiwe raq apaiq ma awang chang jaqsham miitu aming kuqtaq kriimin apaiq ma chongto.

²⁹ Krai mren Mosheq nai Aron ka Ejip mung na kihoto. Raüta Israilnok welabi ka wiita adam na tiithungto.

³⁰ Kiimaq Aron raq tsangshiq ma Tatiwe raq Mosheq ma bom chongkuqtaq kra wiita tlü chongkuqto. Kiijiishe Mosheq raq mungmaiqse khaki na awang chang jaqsham thun kra klo raüta tiichhi kuqto.

³¹ Kiimaq tsangshiq raq kamto. Kiimaq tsangshiq raq Tatiwe ka tsangshiq phaniishe saükito. Kiimaq tsangshiq ka maiq raq ümtinkhan wa hok maq nishishi tiichamchao haihiitlaq kra chhito she nguta tai raüta, tsangshiq ka hiq na bum rang raüta shomnoqto.