DUNGWVNC 3 - ASII LAKDAP Bible (BSI)

Shiikeawe Raq Mosheq Heato

¹ Ranaiqshi Mosheq ka ahuchhiwe Jethro, Midian mungti ramwe skukong nai chhechhi kong kra riimrea riito. Apaiq raq nyamse kong ka rumnyangkhi kumtsaiphii wang kiina tsuqhoto. Raüta asii Sinai pumji kiina saükito.

² Kiijaq Tatiwe rase ka apaiq ma walütu ma jaraüta nyiimtamse mong na tiichhikito. Mosheq raq rumtamse ka walütu mong na anyai rai chhito. Shatmaq nyiimtamse ka wa raq khiimbaiq mak.

³ Kra chhi raüta, “Arka awang chang,” nguta atsan na tiimato. “Rumtamse ka wa raq jamkhii riito khiim baiq mak? Ngi ka atho na walata liila,” nguta tiimato.

⁴ Ümtiikiiwa Tatiwe raq Mosheq ka atho na warai chhitaq, kiitiikaq apaiq raq kra rumtamse mong maq, “Mosheq lei! Mosheq lei!” nguta heato. Apaiq raq treto, “O, ngi ka ajiilii.”

⁵ Shiikeawe raq nguto, “Naptohea na naq warai kiq she. Ümhok kop wiinai kra chhut baiqlaq. Jamkhano ngukla ümniika asii hiq ba na chaptlaü.

⁶ Ngi ka ümtitiim Shiikeawe, Abraham Shiikeawe, Isak Shiikeawe, kiimaq Jakob Shiikeawe.” Kra ningkhan Mosheq raq atheaphi ka khea maq pangto. Jamkhano ngukla apaiq ka Shiikeawe theaphi na liikham mak ahaisi riito.

⁷ Kiijiishe Tatiwe raq nguto, “Ngi raq Ejip mung na isenginok pinthum tiichamchao haihiitlaq kra chhikang she. Ngi raq tsangshiq ka maiq jaq khon mong na tsangti jongnok raq tiichamchaotlaq kriiwa tiichhii kuqlaq nguta hoq trangtlaq kra taikang she. Ngi raq tsangshiq chamchao thun ka kunli sapkang she.

⁸ Kra ningkhan Ngi ka tsangshiq kra Ejip mungti jaqkhon mong wa tiichhiike kai satki kang. Lata tsangshiq ka Ejip mung wa tsuq wan lata binlu binli hiqshong rahai, hiqpo hiq win mung na, ümchaü Kanannok, Hitaiqnok, Amoraiqnok, Perijaiqnok, Hiwaiqnok, kiimaq Jebusaiqnok sitlaq mung niishe mitsuq wanha.

⁹ Ngi raq isenginok hoqsii trangtlaq kriika taikang she. Kiimaq Ejip mungti raq tsangshiq ka ümtinkhan wa hok maq nishishi haihiitlaq kra chhikang she.

¹⁰ Ümchaü Ngi raq ümniika Ejip mung hokhamwe phana tiikitiikang. Kriika ümniiraq isenginok ka apaiq mungtan kiiwa ahin na tsuq wan miitu tiiki tiikang.”

¹¹ Shatmaq Mosheq raq Shiikeawe ma nguto, “Ngi ka juwa. Ngi ka hokhamwe phana jamkho miki kiimaq Israilnok ka Ejip mung wa jamkho mitiidong tsuq wan lot?”

¹² Shiikeawe raq treto, “Ngi ka ümniirai adam mirha. Kiimaq ümtiikiiwa ümniiraq mungmaiqse ka Ejip mung wa tsuq wantlaü, kiitiikaq ümniiraq Ngi ka ara pum arjaq mishomnoq haü. Kriikata ümniika Ngi riidea tiikikang nguta saqse miraq.”

¹³ Shatmaq Mosheq raq treto, “Riita ngi ka Israilnok phana kilata, tsangshiq ma, ‘Namtitiim Shiikeawe raq ngi ka namshiq phana tiikito,’ nguta nguha jaq tsangshiq raq ngi ma, ‘Riita Apaiq mang ka juwa?’ nguta miwai. Kra ngu raüjaq ngi raq tsangshiq ma jamkho michongha?”

¹⁴ Shiikeawe raq nguto, “Ngi ka Ngi dongdii. Ümniiraq tsangshiq ma akha ngo ratlo: ‘Ngi ka Ngi dongdii nguta ngutlaqwe raq ngi ka namshiq phana tiikito.’

¹⁵ Israilnok ma chonglaq, Ngi, Tatiwe, tsangtitiim Shiikeawe, Abraham Shiikeawe, Isak Shiikeawe, kiimaq Jakob Shiikeawe raq ümniika tsangshiq phana tiikito nguta chonglaq. Arka pattup pat-sa miitu imang. Rawiichii maiqpat ümchuwa saü wantlaq kriiraq imang ka akha chong chang.

¹⁶ Kilaq. Laüta Israilnok welabi ka adam na triitamlaq. Laüta tsangshiq ma chonglaq, Ngi, Tatiwe, tsangtitiim Shiikeawe, Abraham Shiikeawe, Isak Shiikeawe, kiimaq Jakob Shiikeawe ka ümniirai sham riichhikito nguta chonglaq. Laüta tsangshiq ma Ngi ka tsangshiq phaniishe saüki kang kiimaq Ejip mungti raq tsangshiq ka jamkho haihiitlaq kriika chhikang she nguta chonglaq.

¹⁷ Ngi raq tsangshiq ka Ejip mung na ümtinkhan wa haihii raüta tiichamchaotlaq kiiwa ahin niishe mitsuq wanha nguta thimi wankang she. Lata tsangshiq ka hiqpo hiqwin mung niishe Kanannok sichang, Hitaiqnok sichang, Amoraiqnok sichang, Perijaiqnok sichang, Hiwaiqnok sichang, kiimaq Jebusaiqnok sichang mung niishe mitsuq wanha.

¹⁸ “Ümniiraq tsangshiq ma jamlai wa chongkuq tlaü ka isenginok raq mitai. Laütiishe ümniika Israilnok welabi thun kra sheaho laüta Ejip mung hokhamwe phana kai ratlo. Laüta apaiq ma akha chonglaq, ‘Tatiwe, Hibrunok Shiikeawe ka naishiq ma apumsii maq asham tiichhikito. Ümchaü min ümniiraq naishiq ka rumnyangkhi kumtsaiphii wang na Tatiwe, naishiq Shiikeawe ma honglu takekai miitu ranaiq tsam khumchang loq na saüli kaiho miitu naishiq ma aming kuqlaq.’

¹⁹ Ngi raq asap-ha, Ejip mung hokhamwe ka ningkun maq tiichop hü maq namshiq ka tiiwa mak miraq.

²⁰ Shatmaq Ngi raq iningkun maq Ejip mung na phiiptsi chang thun jaqsham lata imo mitiihoha. Kra jai miitiq apaiq raq namshiq ka mitiiwa.

²¹ “Ngi raq Ejip mungti ma ümniika mitiishrengha. Raü jiitiq ümtiikiiwa isenginok ka laü wantlaq na, tsangshiq ka jaqmii maq wawan mak miraq.

²² Israilnok nyungre loweatek raq apaiq jamthoti Ejip nyungre thun phana miki kiimaq apaiq jam na siti Ejip nyung sitlaq kra phana miki, raüta khu akhea kiimaq chaq kiimaq kampho laktum thun kra mijaü. Raüta Israilnok raq arthun laktum arka tsangsetiim maiqwe sere kiimaq jechakse re dangkong na mitlak. Raüta Ejip mung wa tachong wiira tsiiq tum thun kra wiita howan raüta milaü wan.