DUNGWVNC 5 - ASII LAKDAP Bible (BSI)

Mosheq Nai Aron Ka Ejip Mung Hokhamwe Man Na Chapto

¹ Kra raütiishe Mosheq nai Aron ka Ejip Mung hokhamwe phana kihoto. Raüta akha nguto, “Tatiwe, Israilnok Shiikeawe raq akha ngutlo ‘Isenginok ka tiiwalaq. Tsangshiq raq Ngi shreng ma kumtsaiphii rumnyangkhi wang na poi miklolaq.’”

² Kiijiishe hokhamwe tsangnai ma shiitep waito, “Tatiwe ka juwa? Ngi raq apaiq bom ka jaram taiwa? Lata Israilnok ka jaram tiiwa baiq wa? Ngi raq Tatiwe ka sap mang. Kiimaq ngi raq Israilnok kiimin tiiwa mang.”

³ Kiijiishe Mosheq nai Aron raq treto, “Hibrunok Shiikeawe apaiq ka naishiq phana kito. Raüta naishiq ma asham tiichhi kito. Naishiq ka ranaiqtsam lam na saüli kumtsaiphii rumnyangkhi wang na tiiwalaq, naishiq raq Tatiwe, naishiq Shiikeawe ma honglu thun takuq kiphai. Naishiq raq kra klo mai riihai jiila, apaiq raq naishiq ka tha tiidong raüta riimakla re na mitiitsai.”

⁴ Hokhamwe raq Mosheq nai Aron ma nguto, “Namnai raq mungmaiqse ka tsangshiq jaqsham wa jaram tiichiim sam wa? Kra dikong thun ka tsangshiq jaqsham chang kiina sheahotlo ronglaq!

⁵ Namshiqnok ka Ejip mungti thaq na pahea ra ma hiq ma she purai wan lan. Jamlai jiq ngukai, ümchaü ka jaq min shammai she sha ngutlan ngukai!”

⁶ Kra ranaiq liipan niili hokhamwe raq Ejip mungti dikong rümtibi kiima nai Israilnok jaqsham liitibi kriima akha aming kuqto:

⁷ “Mungmaiqse jaqshamtibi ma kiitelong lo ma tsamkü shin ka naqkuq rongkiqshe. Tsangshiq maiqmii tiiki lanta tritki rongkiq.

⁸ Shatmaq kongkhuji maq ranaiq shi na kiitelong ka ümchuwa lo tlaq, kiichu khaq khaq lo ratlo. Kiitelong ka poshi min tiitsap mai mak. Tsangshiq jaqsham chang ahü kha maq, tsangshiq raq ngi nangnga tsangshiq Shiikeawe ma honglu takekai miitu tiiwa laq nguta paqlaqtlo!

⁹ Arnok arma jaqsham ka apalin she tiisham ronglaq. Lanta tsangshiq ka jaqsham na tiimo ronglaq. Kra raütiq tsangshiq raq hiqtili arot bom chong kra taisea miitu akhing ahüshe miraq.”

¹⁰ Kiimaq dikong pengtibi nai Israilnok jaqsham liitibi ka Israilnok phana kito. Raüta Israilnok ma akha chongto, “Hokhamwe raq namshiq ma tsamkü shin ka lunkuq mak she nguwa.

¹¹ Apaiq raq ngutlo, namshiq maiqmii hok maq kilanta tsamkü ka ümriiba wa jiimin ahumhum ritki rongkiq. Shatmaq namshiq raq kiitelong ka ranaiq shi na ümchupo lochang wa kriika tiitsap mai mak nguwa.”

¹² Krai mren mungmaiqse ka Ejip mung hamli na tsamkü shin rit kai maiqmii miirang raüta kihoto.

¹³ Dikong pengtibi raq tsangshiq ka shiitep wan ruq maq kongkhu na tsangshiq ma tsamkü shin lunkuq tlaq akhing na ranaiqshi na kiitelong ka ümchuwa klo tlaq kiichu klo raa dongdii nguta pinthum teptep shiitep wanto.

¹⁴ Kiimaq Ejip mungti dikong pengtibi raq tsangshiq raq ashong Israilnok jaqsham liitibi ka hot hot she buk siq wanto. Tsangshiq raq akha shiitep wanto, “Namshiq raq kongkhu ji na ümchuwa klotlan kiichu jam nguto klo man riilan?”

¹⁵ Kiijiishe Israilnok jaqsham liitibi ka hokhamwe phana wato. Raüta akha shokto, “Chaü lei, ümniiraq naishiq ka akha jam nguto shiitep holaü?

¹⁶ Naishiq ma tsamkü shin kiimin lunkuq mak she. Shatmaq naishiq raq kiitelong ka loraa dongdii nguta aming kuqtlo! Raüta ümchaü naishiq ka maiqmo she hophaq tiikai. Arka ümsenginok shut.”

¹⁷ Kiijiishe hokhamwe raq treto, “Namshiq ka riinin nok kiimaq jaqsham roman dam tlan. Kra ningkhan tiina namshiq raq ngi nang nga namshiq ka Tatiwe ma honglu thun takekai tiiwalaq nguta ijaq wa aming jaü tlan.

¹⁸ Ümchaü min jangho lanta jaq ka shamki rongkiq! Namshiq ma tsamkü shin ka kuq mai she. Shatmaq namshiq raq kiitelong ka ümchu lochang wa kiichu klo ratlo.”

¹⁹ Kiijiishe Israilnok jaqshamti liitibi raq tsangshiq ka chamchao khobok mong niishe kha ana nguta sapto. Jamkhano ngukla tsangshiq raq kiitelong ka kongkhuji na ranaiqshi na ümchuwa lotlaq kiichu klo raa nguta tsangshiq ma shiitepto.

²⁰ Tsangshiq ka kinphai na dongho tlaq akhing niishe, tsangshiq raq Mosheq nai Aron rai riihumto. Tsangnai ka tsangshiq khe kiijaq riito.

²¹ Tsangshiq raq Mosheq nai Aron ma nguto, “Namnai raq jamlai wa riilan ka Tatiwe raq chhito she. Namnai raq hokhamwe nai asengi ajong alabi ma naishiq tiingeng wan lan arkha na namnai apaiq mo mihohan. Namnai raq tsangshiq ma naishiq tiitsea baiq miitu lampu tankuq lan.”

Mosheq Raq Tatiwe Ma Shokto

²² Kiijiishe Mosheq raq Tatiwe ma akha hali nguto, “Tatiwe, ümniiraq ümsenginok ka jam nguto atinkhan tiichamchaoho laü? Ümniiraq ngi ka arjaq jaramli wa tiiki laü?

²³ Ngi raq hokhamwe phana üm mang na bom chongwa kang miiphat she, apaiq raq tsangshiq ka tiibitaq hok maq nishishi she haihii wanto. Shatmaq ümniiraq tsangshiq ka khrum kuq maü shaq li shat shat!”