Adlezenn 9 - Bibl Koad 21: Ar Bibl e Brezhoneg evit ar Vretoned Bibl Koad 21: Ar Bibl e Brezhoneg evit ar Vretoned
Adlezenn 9

¹ Selaou, Israel! Emaout o vont da dremen hiziv ar Jordan evit trec'hiñ pobloù brasoc'h ha kreñvoc'h egedout, kêrioù bras ha mogeriet betek an neñv,

² ur bobl vras hag a vent uhel, mibien an Anakim a anavezez, hag ec'h eus klevet diwar o fenn: Piv a zalc'ho dirak mibien Anak?

³ Gouez eta hiziv penaos an AOTROU da Zoue a dremeno dirazout evel un tan loskus, eñ eo o distrujo hag o izelaio dirazout. O c'hasi kuit hag o lakai da vervel buan, evel m'en deus lavaret an AOTROU.

⁴ P'en devo o c'haset kuit an AOTROU da Zoue dirazout, ne lavari ket ez kalon: En abeg da'm reizhder eo en deus degaset ac'hanon an AOTROU da berc'hennañ ar vro-mañ. Rak en abeg da zrougiezh ar pobloù-se eo e kas anezho kuit an AOTROU dirazout.

⁵ N'eo ket en abeg da'z reizhder ha da eeunder da galon emaout o vont da berc'hennañ ar vro, met en abeg da zrougiezh ar pobloù-se eo e kas anezho kuit an AOTROU dirazout, hag evit kadarnaat ar gomz en deus touet an AOTROU da'z tadoù, da Abraham, da Izaak ha da Jakob.

⁶ Gouez eta penaos n'eo ket en abeg da'z reizhder e ro dit an AOTROU da Zoue ar vro vat-se evit he ferc'hennañ, dre ma'z out ur bobl a c'houzoug reut.

⁷ Az pez soñj, n'ankounac'ha ket penaos ec'h eus kounnaret an AOTROU da Zoue er gouelec'h, adalek an deiz ma'z out aet kuit eus bro Ejipt betek ma'z oc'h erruet el lec'h-mañ, ez oc'h bet disentus ouzh an AOTROU.

⁸ Kounnaret hoc'h eus ivez an AOTROU en Horeb, hag an AOTROU a fuloras a-enep deoc'h, gant ar soñj d'ho tistrujañ.

⁹ Pa'z on pignet war ar menez evit degemer an taolennoù maen, taolennoù an emglev en deus graet an AOTROU ganeoc'h, ez on chomet war ar menez daou-ugent devezh ha daou-ugent nozvezh hep debriñ bara hag hep evañ dour.

¹⁰ An AOTROU a roas din an div daolenn vaen, skrivet gant biz Doue, ha warno e oa an holl gomzoù en doa lavaret an AOTROU war ar menez a-greiz an tan, da zeiz ar vodadeg.

¹¹ A-benn daou-ugent devezh ha daou-ugent nozvezh e roas an AOTROU din an div daolenn vaen, taolennoù an emglev.

¹² An AOTROU a lavaras din: Sav, hast diskenn ac'hann, rak da bobl, an hini ac'h eus lakaet da vont kuit eus an Ejipt, a zo en em vreinet. Distroet int bet buan eus an hent am boa gourc'hemennet dezho, graet o deus ur skeudenn deuzet.

¹³ An AOTROU a gomzas o lavarout: Sellet em eus ouzh ar bobl-mañ, ha setu, eo ur bobl a c'houzoug reut.

¹⁴ Lez ac'hanon hag e tistrujin anezho hag e lamin o anv a-zindan an neñvoù, hag e rin ac'hanout ur bobl kreñvoc'h ha brasoc'h egeto.

¹⁵ Me a zistroas hag a ziskennas a-ziwar ar menez, ar menez a zeve gant tan, div daolenn an emglev am boa em daouarn.

¹⁶ Sellet em eus ha setu, pec'het ho poa a-enep an AOTROU ho Toue, graet ho poa ul leue teuzet, distroet oac'h buan eus an hent en doa gourc'hemennet an AOTROU deoc'h.

¹⁷ Kemeret em eus an div daolenn hag o zaolet em eus gant va daouarn d'o zerriñ dirak ho taoulagad.

¹⁸ Stouet em eus dirak an AOTROU, evel diagent, daou-ugent devezh ha daou-ugent nozvezh hep debriñ bara hag hep evañ dour, en abeg d'an holl bec'hedoù ho poa graet, oc'h ober ar pezh a zo fall dirak daoulagad an AOTROU, evit e fuloriñ.

¹⁹ Spontet e voen dirak ar gounnar hag ar fulor en em danas en hoc'h enep a-berzh an AOTROU, evit distrujañ ac'hanoc'h. Met an AOTROU a selaouas ouzhin c'hoazh ar wech-mañ.

²⁰ An AOTROU a oa kounnaret a-enep Aaron ivez, hag e felle dezhañ e lakaat d'ar marv. Pedet em eus evit Aaron ivez en amzer-se.

²¹ Kemeret em eus ho pec'hed, al leue ho poa graet, hag em eus e zevet en tan, hag em eus e freuzet ken na voe aet e poultr. Taolet em eus ar poultr er froud a ziskenne eus ar menez.

²² Kounnaret hoc'h eus an AOTROU e Tabeera, e Masa hag e Kibrod-Hataava.

²³ Pa gasas an AOTROU ac'hanoc'h eus Kadesh-Barnea en ur lavarout: Pignit ha dalc'hit ar vro am eus roet deoc'h, hoc'h eus disentet ouzh gourc'hemenn an AOTROU ho Toue, n'hoc'h eus ket kredet anezhañ na sentet ouzh e vouezh.

²⁴ C'hwi a zo bet disentus ouzh an AOTROU abaoe an deiz ma hoc'h anavezan.

²⁵ Stouet em eus dirak an AOTROU, evel diagent, daou-ugent devezh ha daou-ugent nozvezh, rak en doa lavaret an AOTROU e tistrujfe ac'hanoc'h.

²⁶ Me a bedas an AOTROU o lavarout: Aotrou AOTROU, na zistruj ket da bobl, da hêrezh, ac'h eus dasprenet gant da vraster hag ac'h eus lakaet da zont kuit eus an Ejipt gant un dorn nerzhus.

²⁷ Az pez soñj eus da servijerien, Abraham, Izaak ha Jakob, na sell ket ouzh kaleter ar bobl-mañ, nag ouzh e zrougiezh, nag ouzh e bec'hed,

²⁸ gant aon na vez lavaret er vro ac'h eus tennet ac'hanomp diouti: Dre ma n'eo ket gouest an AOTROU d'o lakaat da vont er vro en doa prometet dezho, ha dre ma kasa anezho, eo en deus o lakaet da vont kuit evit o lazhañ er gouelec'h.

²⁹ Ha koulskoude ez int da bobl ha da hêrezh, ac'h eus lakaet da vont kuit eus bro Ejipt dre da c'halloud bras ha da vrec'h astennet.