Adlezenn 8 - Bibl Koad 21: Ar Bibl e Brezhoneg evit ar Vretoned

Pennad 8 Derc'hel soñj eus an AOTROU

¹ Mirout a reot an holl c'hourc'hemennoù a gemennan dit hiziv hag e reot diouto, evit ma vevot ha ma kreskot, ha ma'z eot da berc'hennañ ar vro en doa touet an AOTROU d'ho tadoù.

² Az pez soñj eus an hent en deus lakaet ac'hanout da gerzhout ennañ an AOTROU da Zoue e-pad daou-ugent vloaz er gouelec'h, evit da izelaat ha da amprouiñ, evit gouzout petra a oa ez kalon ha ma virfes e c'hourc'hemennoù.

³ Da izelaet en deus ha da lezet da gaout naon, met roet en deus dit da zebriñ ar mann, n'anavezes ket ha n'anaveze ket da dadoù, evit reiñ da c'houzout dit penaos an den ne vev ket gant bara hepken, met penaos an den a vev gant kement a zeu eus genoù an AOTROU.

⁴ Da zilhad ne voent ket uzet warnout, ha da droad ne voe ket goeñvet e-pad an daou-ugent vloaz-se.

⁵ Anavez eta ez kalon penaos an AOTROU da Zoue a gastiz ac'hanout evel ma kastiz un den e vab.

⁶ Mir gourc'hemennoù an AOTROU da Zoue evit kerzhout en e hentoù hag evit doujañ anezhañ.

⁷ Rak an AOTROU da Zoue a lakaio ac'hanout da vont en ur vro vat, ur vro gant gwazhioù-dour, eienennoù ha lennoù a red en traoniennoù hag er menezioù,

⁸ ur vro gant gwinizh, heiz, gwini, gwez-fiez ha greunavalenned, ur vro gant gwez-olivez o reiñ eoul ha gant mel,

⁹ ur vro e-lec'h na zebri ket bara gant rouezded, e-lec'h na vanko dit netra, ur vro ma'z eo he mein houarn hag eus he menezioù e kizelli arem.

¹⁰ Pa ez po debret hag ez po da walc'h, e vennigi an AOTROU da Zoue abalamour d'ar vro vat en devo roet dit.

¹¹ Diwall d'ankounac'haat an AOTROU da Zoue, o tremen hep mirout e c'hourc'hemennoù, e varnedigezhioù hag e reolennoù a gemennan dit hiziv.

¹² Pa ez po debret hag ez po da walc'h, pa ez po savet tiez kaer evit chom enno,

¹³ pa vo kresket da saout ha da zeñved, pa vo kresket da arc'hant ha da aour ha pa vo kresket kement a zo dit,

¹⁴ ra n'en em uhelaio ket da galon, ra n'ankounac'hai ket an AOTROU da Zoue en deus tennet ac'hanout eus bro Ejipt, eus an ti sklavelezh,

¹⁵ en deus lakaet ac'hanout da gerzhout er gouelec'h bras hag euzhus-se, leun a naered gwrezus hag a gruged, e lec'hioù sec'h hep dour, en deus lakaet dour da zont er-maez eus ar roc'h evidout, eus ar rec'hell,

¹⁶ en deus roet dit da zebriñ er gouelec'h ar mann n'anaveze ket da dadoù, evit izelaat hag amprouiñ ac'hanout, hag evit ober vad dit da c'houde.

¹⁷ Ra ne lavari ket ez kalon: Va nerzh ha galloud va dorn o deus prenet din ar madoù-se.

¹⁸ Az pez soñj eus an AOTROU da Zoue, rak eñ eo a roio dit an nerzh da brenañ madoù, evit kadarnaat an emglev en deus touet da'z tadoù, evel m'emañ hiziv.

¹⁹ Mar c'hoarvezfe ec'h ankounac'hafes an AOTROU da Zoue ha ma'c'h afes war-lerc'h doueoù all, ma o servijfes ha ma stoufes dirazo, e testan deoc'h hiziv: a-dra-sur e viot kollet!

²⁰ Evel ar pobloù en deus lakaet an AOTROU da vont da get dirazoc'h, e viot kollet, rak n'ho po ket sentet ouzh mouezh an AOTROU ho Toue.