Adlezenn 10 - Bibl Koad 21: Ar Bibl e Brezhoneg evit ar Vretoned

Pennad 10 An div daolenn vaen nevez. Doujañ an AOTROU

¹ En amzer-se an AOTROU a lavaras din: Gra div daolenn vaen evel ar re gentañ, ha pign da'm c'havout war ar menez. Ober a ri ivez un arc'h koad,

² hag e skrivin war an taolennoù-se ar c'homzoù a oa war an taolennoù kentañ ac'h eus torret, hag e lakai anezho en arc'h.

³ Graet em eus un arc'h e koad kasia ha div daolenn vaen evel ar re gentañ, ha pignet on war ar menez gant an div daolenn em dorn.

⁴ Hag e skrivas war an taolennoù ar pezh en doa skrivet ar wech kentañ, an dek komz en doa lavaret an AOTROU war ar menez a-greiz an tan, da zeiz ar vodadeg. An AOTROU o roas din.

⁵ Distroet ha diskennet on a-ziwar ar menez, ha lakaet em eus an taolennoù en arc'h am boa graet; eno emaint evel m'en doa gourc'hemennet an AOTROU din.

⁶ Mibien Israel a yeas kuit eus Beerod-mibien-Jaakan evit Mosera. Aaron a varvas eno hag a voe sebeliet. Eleazar e vab a voe aberzhour en e lec'h.

⁷ Ac'hane ez ejont kuit evit Gudgoda, hag eus Gudgoda evit Jotbata, ur vro gant gwazhioù-dour.

⁸ En amzer-se an AOTROU a zispartias meuriad Levi evit dougen arc'h emglev an AOTROU, evit en em zerc'hel dirak an AOTROU, evit e servijañ hag evit bennigañ en e anv, betek hiziv.

⁹ Setu perak n'en deus Levi na lodenn na hêrezh gant e vreudeur, an AOTROU eo e hêrezh, evel m'en deus lavaret an AOTROU da Zoue dezhañ.

¹⁰ En em zalc'het on war ar menez evel an deizioù diagent, daou-ugent devezh ha daou-ugent nozvezh. An AOTROU a selaouas ouzhin c'hoazh ar wech-mañ, an AOTROU ne fellas ken dezhañ da zistrujañ.

¹¹ An AOTROU a lavaras din: Sav! Kae evit kerzhout dirak ar bobl, hag ez aint da berc'hennañ ar vro am eus touet reiñ d'ho tadoù.

¹² Bremañ eta, Israel, petra a c'houlenn diganit an AOTROU da Zoue, nemet doujañ an AOTROU da Zoue, kerzhout en e holl hentoù, karout anezhañ, servijañ an AOTROU da Zoue eus da holl galon hag eus da holl ene,

¹³ mirout gourc'hemennoù an AOTROU hag e reolennoù a gemennan dit hiziv, evit ma vi eürus?

¹⁴ D'an AOTROU da Zoue eo an neñvoù ha neñvoù an neñvoù, an douar ha kement a zo ennañ,

¹⁵ ha nemet ouzh da dadoù eo, en em stagas an AOTROU evit o c'harout. War o lerc'h, a-douez an holl bobloù, dibabet en deus ac'hanoc'h, o lignez, evel m'emañ hiziv.

¹⁶ Amdroc'hit eta ho kalonoù ha na reudit ket ho kouzoug.

¹⁷ Rak an AOTROU ho Toue eo Doue an doueoù had Aotrou an aotrounez, an Doue bras, galloudek ha spontus, na ra van ebet eus diavaezioù an dud ha na gemer ket a zonezon,

¹⁸ a ro e wir d’an emzivad ha d'an intañvez, a gar an diavaeziad hag a ro dezhañ boued ha dilhad.

¹⁹ Karout a reot an diavaeziad, rak diavaezidi oc'h bet e bro Ejipt.

²⁰ Doujañ a ri an AOTROU da Zoue, hag e serviji anezhañ, hag en em stagi outañ, hag e toui dre e anv.

²¹ Eñ eo da veuleudi, eñ eo da Zoue, eñ eo an hini en deus graet ez keñver an traoù bras ha spontus o deus gwelet da zaoulagad.

²² Da dadoù a ziskennas d'an Ejipt, bez' e oant dek ha tri-ugent, ha bremañ, an AOTROU da Zoue en deus lakaet ac'hanout da vezañ niverus evel stered an neñvoù.