Psalms 5 - Die Bybel 2020-vertaling

¹ Vir die •musiekleier. Met fluitspel. 'n Psalm. Van Dawid.

² Luister tog na my woorde, Here; hoor my versugting!

³ Slaan ag op my noodkreet, my Koning en my God, want tot U bid ek!

⁴ Here, in die oggend hoor U my stem, in die oggend lê ek my saak aan U voor, en wag.

⁵ Ja, U is 'n God wat goddeloosheid nie duld nie; boosheid kan by U nie vertoef nie.

⁶ Verwaande mense kan voor U oë nie staande bly nie; U het 'n weersin in almal wat onreg pleeg.

⁷ U laat leuenaars ten gronde gaan; die Here verafsku mense wat bloed vergiet en bedrog pleeg.

⁸ Maar ék mag op grond van u oorvloedige troue liefde na u huis kom; uit ontsag vir U buig ek in aanbidding na u •heilige •tempel.

⁹ Lei my deur u geregtigheid, Here, omdat ek teenstanders het; maak u pad reguit voor my.

¹⁰ Daar kom immers niks betroubaars uit hulle monde nie, hulle binneste huisves vernietiging, hulle kele is 'n oop graf, met hulle tonge vlei hulle.

¹¹ Laat hulle boet, o God, laat hulle deur hulle eie planne tot 'n val kom. Dryf hulle uitmekaar oor hulle baie oortredings, want hulle is in opstand teen U.

¹² Maar laat almal wat by U skuil, bly wees; laat hulle vir altyd juig en sprei U beskerming oor hulle uit. Laat dié wat u Naam liefhet, oor U jubel.

¹³ Want U, Here, U seën die •regverdige, soos 'n skild omring U hom met welwillendheid.