Zakaria 9 - Baiboly Katolika

FIZARANA FAHAROA Ny tany vaovao

¹ Teny fitsarana. Tenin’i Iaveh mamely ny tany Hadràky; ary ao Damasa no ho fonenany, - fa ny mason’i Iaveh dia eo amin’ny olona, sy eo amin’ny fokon’i Israely rehetra; -

² ary koa ao Hamata, mifanolotra amin’i Damasa, sy ao Tira mbamin’i Sidona, satria be fahendrena izy.

³ I Tira dia nanao trano mimanda ho azy, nanangona volafotsy hoatra ny vovoka, sy volamena hoatra ny fotaka eny an-dalambe.

⁴ Indro fa ho azon’ny Tompo izy io; hasiany ny heriny eny amin’ny ranomasina, ary ny tenany ho levonin’ny afo.

⁵ Hahita izany i Askalôna, ka hatahotra; i Gazà koa hiolanolana azon’ny fijaliana; ary i Akarôna koa, fa efa ho levona ny fanantenany. I Gazà, tsy hana-mpanjaka intsony, ary tsy honenana intsony i Askalôna.

⁶ Vahiny tsy manjary no haka fonenana ao Azota, ary hofoanako ny avonavon’ny Filistinina.

⁷ Hoesoriko avy any am-bavany ny rany; ary avy eo anelanelan’ny nifiny ny fahavetavetany; ka izy koa dia ho sisa ho an’ny Andriamanitsika; ho toy ny lohany amin’i Jodà, ary i Akarôna ho toy ny Jeboseanina.

⁸ Hitoby manodidina ny tranoko Aho; hiaro azy amin’ny tafika rehetra sy amin’ny mpandehandeha rehetra; ka tsy hisy mpampahory hamaky eo aminy intsony, fa ny masoko no efa nahita ankehitriny.

Ny Mesia

⁹ Mifalia amin’ny hafaliana lehibe, ry zanaka vavin’i Siôna! Manaova feo firavoravoana, ry zanaka vavin’i Jerosalema. Fa indro ny Mpanjakanao avy ho atỳ aminao; marina izy sady arovan’Andriamanitra; manetry tena mitaingina ampondra dia ampondra tanora, zanak’ampondravavy.

¹⁰ Hofoanako tsy hisy ny kalesy fiadiana any Efraima, mbamin’ny soavaly ao Jerosalema, ary hopotehina ny tsipìka fiadiana. Hilaza fiadanana amin’ny firenena izy; ny fanjakany dia hahatratra ny hatramin’ny ranomasina ka hatramin’ny ranomasina; ary hatramin’ny ony ka hatramin’ny faran’ny tany.

Fiarenan’i Israely

¹¹ Ho anao koa, noho ny ran’ny fanekena taminao, no efa hamoahako ny mpifatotrao, avy ao an-davaka tsy misy rano.

¹² Miverena ho ao amin’ny fitoerana mimanda, ianareo babon’ny fanantenana. Mbola lazaiko anio izao: Indroa heny no haveriko aminao.

¹³ Fa henjaniko ho Ahy i Jodà, ary ataoko amin’ny tsipìka i Efraima. Hamporisika ny zanakao Aho, ry Siôna, hiady amin’ny zanakao, ry Javàna, ary hataoko toy ny sabatry ny lehilahy mahery ianao.

¹⁴ Hiseho eo ambonin’izy ireo i Iaveh, hitsoriaka toy ny helatra, ny zana-tsipìkany. Hampaneno ny trômpetra ny Tompo Iaveh, ary handroso amin’ny tafio-drivotra any atsimo.

¹⁵ Harovan’i Iavehn’ny tafika izy ireo; ka handevona, hanitsakitsaka ny vaton’antsamotady, hisotro, hihavatràvatra toy ny azon-divay, ary ho feno toy ny kapoaka fisoronana, toy ny tandroky ny ôtely.

¹⁶ I Iaveh, Andriamaniny, no ho famonjena azy ireo, amin’izany andro izany; dia ho famonjena ny andian’ondry izay vahoakany; izy ireo ho toy ny vaton-tsatroboninahitra, hamirapiratra eo amin’ny taniny.

¹⁷ Endrey izany fandrosoana, endrey izany hatsaran-tarehin’izy ireo! Ny vary, hampitombo ny zatovo, ary ny divay vaovao, hampitombo ny virjiny.