Nahoma 1 - Baiboly Katolika

¹ Teny momba an’i Niniva. Boky milaza ny fahitan’i Nahoma avy any Elkosy.

Salamo Hatezeran’i Iaveh Alef

² Andriamanitra saro-piaro sy mpamaly heloka i Iaveh; mpamaly heloka i Iaveh; sady mahalala fahatezerana; mamaly izay manohitra Azy i Iaveh, sady mitahiry fahatezerana amin’ny fahavalony.

³ Mahari-po ela i Iaveh sady be hery ary tsy misy meloka avelany fotsiny. Tadio aman-tafio-drivotra no handehanan’i Iaveh, ary rahona no vovoka diaviny.

Bet Gimel

⁴ Mandrahona ny ranomasina izy dia ataony maina; ary ataony ritra ny ony rehetra. Malazo i Basàna sy i Karmely, malazo koa ny zava-manirin’i Libàna.

Dalet He

⁵ Mihorohoro ny tendrombohitra eo anoloany, ary miempo ny havoana; mientanentana ny tany eo anatrehany, dia izao tontolo izao sy izay rehetra monina eo aminy.

Vao Jain

⁶ Iza no mahatoetra eo anoloan’ny fahavinirany? Zovy no mahatanty ny firehitry ny fahatezerany? Mitatra toy ny afo ny fahatezerany, ary mitresaka eo anoloany ny vatolampy.

Het Tet

⁷ Tsara fo i Iaveh; Fiarovana amin’ny androm-pahoriana Izy. ary mahalala izay matoky Azy

Iod Kaf

⁸ Hofoanany amin’ny riaka manafotra izany fitoerana izany; ary hoenjehina hatrany anatin’ny haizina ny fahavalony.

Teny fitsarana faminaniana ho an’i Jodà sy i Niniva (ho an’i Jodà)

⁹ Inona no hevitrao ny amin’i Iaveh? hotanterahiny ny fandravana: tsy hipoitra fanindroany ny fahoriana.

¹⁰ Fa nifaningotra toy ny tsilo sy toy ny leon’ny divainy izy ireo, ka ho levona toy ny mololo karankaina.

(Ho an’i Asora)

¹¹ Avy taminao no nivoahan’ilay misain-dratsy hanoherana an’i Iaveh, izay mamoron-kevitra mahameloka.

(Ho an’i Jodà)

¹² Izao no lazain’i Iaveh: Na dia tsy latsaka isa sady maro aza izy ireo, dia hojinjaina ary tsy hisy intsony. Efa nanetry anao Aho, ka tsy hanetry anao intsony.

¹³ Ary ankehitriny, ry Jodà ô, hotapahiko hiala aminao ny jiogany; ary hatòsako ny famatorana anao.

(Ho an’ny Mpanjakan’i Niniva)

¹⁴ Ny aminao kosa, izao no voadidin’i Iaveh: Tsy ho velo-maso intsony ny anaranao; hofoanako ao an-tranon’ny Andriamanitrao ny sarin-javatra voapaika sy ny anidina; manomam-pasana ho anao Aho satria latsa-danja ianao.