Matio 20 - Baiboly Katolika

Fanoharana amin’ireo mpiasa tanimboaloboka

¹ Ny fanjakan’ny lanitra dia tahaka ny lehilahy tompon-trano, izay nivoaka maraina koa hanakarama mpiasa, ho any an-tanimboalobony.

² Ary rehefa nifanaiky tamin’ny mpiasa Izy fa denie iray avy isan’andro ny karamany, dia nasainy nankany amin’ny tanimboalobony izy ireo.

³ Ary nivoaka izy tamin’ny ora fahatelo, dia nahita mpiasa hafa nidonana-poana teny an-kianja;

⁴ ka andeha koa ianareo, hoy izy taminy, mankany amin’ny tanimboaloboko, fa homeko anareo izay antonony.

⁵ Dia nankany ireo. Ary nivoaka indray izy tamin’ny ora fahenina sy fahasivy, ka nanao toraka izany koa.

⁶ Ary dia nivoaka koa izy tamin’ny ora faharaika ambin’ny folo, ka nahita mpiasa hafa nijanom-poana, dia hoy izy taminy: Nahoana ianareo no midonana-poana eto mandritra ny andro?

⁷ Fa hoy ireo taminy: Satria tsy nisy nanakarama anay. Dia hoy izy taminy: Andeha koa ianareo mankany amin’ny tanimboaloboko.

⁸ Ary nony hariva ny andro, dia hoy ilay tompon’ny tanimboaloboka tamin’ny mpitandrina ny fananany: Antsoy ny mpiasa, ary omeo ny karamany, aseseo avy atỳ amin’ny farany, ka hatrany amin’ny voalohany.

⁹ Dia nanatona izay nilatsaka tamin’ny ora faharaika ambin’ny folo, ka samy nahazo denie iray misesy avy.

¹⁰ Fa nony nanatona kosa ny voalohany, dia nanantena hahazo bebe kokoa, kanjo denie iray misesy avy ihany koa no azony.

¹¹ Teo am-pandraisana izany izy dia nimonomonona tamin’ny tompon-trano

¹² nanao hoe: Tsy niasa afa-tsy adim-pamantaranandro iray monja ireto farany ireto, kanefa nampitovinao aminay izay niaritra ny hasasarana sy ny hainandro nandritra ny andro.

¹³ Dia izao no navalin’ny Tompo ny anankiray tamin’izy ireo: Ry sakaiza, tsy manao zavatra tsy marina aminao aho; moa tsy denie iray va no nifanekenao tamiko?

¹⁴ Alao ny anao, dia mandehana, fa tiako ny manome an’ilay farany toraka ny anao koa.

¹⁵ Tsy mahazo manao izay tiako amin’izay fananako va aho, sa ratsy ny masonao satria tsara aho?

¹⁶ Dia toy izany, ny farany ho voalohany, ary ny voalohany ho farany; fa maro no antsoina, ary vitsy no voafidy.

Fanintelony nanambaràna ny Hijaliany

¹⁷ Ary nalain’i Jesoa mangingina ny mpianany roa ambin’ny folo, tamin’Izy niakatra ho any Jerosalema ka nilazany hoe:

¹⁸ «Indro fa miakatra ho any Jerosalema isika, ary ny Zanak’olona dia hatolotra amin’ny lohandohan’ny mpisorona mbamin’ny mpanora-dalàna, ary ireo hanameloka Azy ho faty,

¹⁹ ka hanolotra Azy amin’ny Jentily mba hoesoiny, sy hokapohiny, ary hofantsihana amin’ny Hazofijaliana; fa hitsangana indray Izy amin’ny andro fahatelo.»

Fangatahana nataon-drenin’ireo zanak’i Zebede

²⁰ Ary tamin’izany nanatona Azy ny renin’ny zanak’i Zebede mbamin’ny zanany lahy, ka nitsaoka Azy ary nangataka zavatra taminy.

²¹ «Inona no irinao?», hoy i Jesoa taminy. Dia hoy izy: «Aoka ireto zanako roa lahy ireto mba hipetraka eo ankavananao ny anankiray ary eo ankavianao ny anankiray, ao amin’ny fanjakanao.»

²² Dia hoy ny famalin’i Jesoa: «Tsy fantatrareo izay angatahinareo. Moa mahasotro izay kapoaka hosotroiko va ianareo?» «Efanay ihany,» hoy ireo taminy.

²³ Ary hoy Izy taminy: «Raha ny amin’ny kapoakako, dia hosotroinareo tokoa; fa raha ny amin’ny hipetraka eo ankavanako sy eo ankaviako kosa, dia tsy Ahy ny hanome anareo izany, fa homena izay nanamboaran’ny Raiko azy.»

Ny filoha, tokony hanompo

²⁴ Ary nony nandre izany izy folo lahy dia tezitra tamin’izy mirahalahy.

²⁵ Fa nasain’i Jesoa nanatona Azy izy ireo, ka nilazany hoe: «Fantatrareo fa ny mpanjakan’ny Jentily mandidy azy mafy, ary ny lehibeny mifehy azy fatratra.

²⁶ Fa tsy mba ho tahaka izany aminareo; fa izay te ho lehibe aminareo kosa, no aoka ho mpanomponareo izy.

²⁷ ary izay te ho lohany aminareo, no aoka ho andevonareo.

²⁸ dia tahaka ny Zanak’olona izany; fa Izy tsy tonga mba hotompoina fa mba hanompo ary hahafoy ny ainy ho fanavotana ny maro.»

Ireo jamba roa tao Jerikô

²⁹ Nony niala teo Jerikô Izy dia narahin’ny vahoaka maro.

³⁰ Ary indreo nisy jamba roa lahy nipetraka teo amoron-dalana: nony reny fa nandalo i Jesoa dia niantso mafy izy ireo nanao hoe: «Ry Tompo, Zanak’i Davida ô! mamindrà fo aminay.»

³¹ Norahonan’ny vahoaka izy ireo mba hangina, fa vao mainka niantso mafimafy kokoa izy nanao hoe: «Ry Tompo, Zanak’i Davida ô! mamindra fo aminay.»

³² Dia nijanona i Jesoa sady niantso azy ka nanao hoe: «Inona no tianareo hataoko aminareo?»

³³ «Tompo ô, ny mba hampahiratanao ny masonay,» hoy ireo taminy.

³⁴ Nangoraka azy ireo i Jesoa ka nanendry ny masony. Dia nahiratra niaraka tamin’izay izy, ka nanaraka Azy.