Levitikosy 25 - Baiboly Katolika

Ireo taona masina (Jereo Eks 23,10-11; Deter 5,1-11) A. Ny taona sabatìka, faha-50

¹ Ary i Iaveh niteny tamin’i Môizy tany an-tendrombohitra Sinaia nanao hoe:

² «Mitenena amin’ny zanak’i Israely ka lazao aminy hoe: Rehefa tafiditra any amin’ny tany omeko anareo ianareo, hisy fitsaharana ho an’ny tany; ho sabata fankalazana an’i Iaveh izany.

³ Mandritra ny taona enina no hamafazanao ny sahanao, mandritra ny taona enina no handrantsananao ny voalobokao sy hitoazanao ny vokany.

⁴ Fa ny taona fahafito kosa dia ho sabata fitsaharana lehibe ho an’ny tany, sabata fankalazana an’i Iaveh, ka tsy hamafy amin’ny taninao ianao na handrantsana ny voalobokao.

⁵ Aza mijinja izay maniry, avy amin’ny voa nihintsana tamin’ny fijinjana lasa, na hioty ny salohim-boaloboka avy amin’ny voaloboka tsy norantsanana: taona fitsaharana ho an’ny tany izany.

⁶ Izay ho vokatry ny tany mandritra ny sabatany dia hatao fivelomana ho anao, mbamin’ny ankizy lahinao, ny ankizy vavinao, ny mpikaramanao, ny vahiny miara-monina aminao;

⁷ ary ho an’ny biby fiompinao koa sy ny biby dia, eo amin’ny taninao, dia hatao fivelomana ny vokany rehetra.»

B. Ny taona jobily

⁸ Hanisa taon-tsabata fito impito fito taona ianao: fotoana mahalany sivy amby efapolo taona no faharetan’izany taona sabata fito izany.

⁹ Ny andro fahafolon’ny volana fahafito dia tsofy ataovy manakoako ny feon’ny trômpetra; amin’ny andron’ny fanonerana dia tsofy hatraiza hatraiza eo amin’ny taninareo ny trômpetra.

¹⁰ Ary ankamasino ny taona fahadimampolo, ataovy antso avo ny fahafahana ho an’ny mponina rehetra amin’ny tany. Fa jobily ho anareo izany, ka samia ianareo mody amin’ny taniny avy, samia mody ao amin’ny fianakaviany avy.

¹¹ Jobily ho anareo ny taona fahadimampolo: tsy hamafy ianareo, tsy hijinja izay maniry ho azy amin’ny tany; ary tsy hioty ny voaloboka tsy norantsanana,

¹² fa Jobily izany, ka masina ho anareo. Izay ho vokatry ny taninareo no hohaninareo.

¹³ Amin’izany taona Jobily izany, samia ianareo mody amin’ny taninareo avy.

¹⁴ Raha misy varotra hifanaovanareo amin’ny namanareo, na misy zavatra vidinareo aminy, dia aza misy mamono antoka ny rahalahiny.

¹⁵ Araka ny isan-taona isaina hatramin’ny Jobily lasa teo no hividiananao amin’ny namanao, ary araka ny isan’ny fotoam-pahavokarana no hivarotany aminao.

¹⁶ Araka ny hamaroan’ny taona mbola ho avy no hanondrotanao ny vidiny, ary araka ny havitsian’ny taona no hampihenanao ny vidiny: satria ny isan’ny vokatra isan-taom-pijinjana no ivarotany aminao.

¹⁷ Aza misy mamono antoka ny rahalahinareo ianareo, fa matahora an’Andriamanitra, satria Izaho no Iaveh Andriamanitrareo.

¹⁸ Araho ny didiko; tandremo ny fitsipiko, ary tanteraho izany, ka handry feizay amin’ny tany ianareo.

¹⁹ Ny tany hahavokatra, ianareo hihinana amim-panaranam-po, ka dia handry feizay ianareo.

Antoka omen’Andriamanitra

²⁰ Ndrao manao hoe ianareo: Inona no hohaninay amin’ny taona fahafito, fa tsy hamafy izahay, na hampakatra ny vokatray?

²¹ Hampidina aminareo ny fanambinako amin’ny taona fahenina aho, dia hahavokatra ho ampy anareo telo taona izy;

²² amin’ny taona fahavalo no hamafazanareo, ka hihinana ny tranainy ianareo, ary hatramin’ny taona fahasivy, mandra-pahavokaran’ny taona dia hihinana ny tranainy ianareo.

Vokatry ny fahamasinana a) Ny tany: fanavotana ny tanàna

²³ Tsy azo amidy varo-maty ny tany, fa Ahy ny tany; ary ianareo hipetraka atỳ amiko toy ny vahiny sy olona mpiavy fotsiny.

²⁴ Avelao ho azo avotana avokoa ny tany ao amin’ny tany rehetra hanananareo.

²⁵ Raha tonga mahantra ny rahalahinao ka ivarotany ny sasany amin’ny taniny, dia ny solony, ny havany akaiky, no ho avy ka hanavotra izay namidin’ny rahalahiny.

²⁶ Raha tsy manana olona ho solony ralehilahy, fa ny tenany ihany no mba mahita izay ampy hanavotana azy,

²⁷ hisainy ny taona hatramin’ny nivarotany azy, ka izay ankevitry ny taona sisa no haloany amin’ilay nivarotany azy, dia hody amin’ny taniny indray izy.

²⁸ Ary raha tsy mahazo izay ampy handoavany izany onitra izany izy, dia hitoetra eo an-tanan’ilay nividy ihany aloha ny tany namidiny, mandra-pahatongan’ny taona Jobily, fa amin’ny Jobily dia afaka izy, ka hody amin’ny fananany indray.

²⁹ Raha misy olona mivarotra trano ao anaty tanàna mimanda dia azony avotana izany, mandritra ny herintaona hatramin’ny nivarotany azy, ka maharitra herintaona maninjitra no ahazoany manavotra azy.

³⁰ Fa raha tsy voaavotra mandra-pahatapitry ny herintaona maninjitra kosa ilay trano ao anaty tanàna mimanda, dia tapaka varo-maty ho an’ilay nividy azy sy ho an’ny taranany, ka tsy ho afaka aminy amin’ny Jobily.

³¹ Fa ny trano ao amin’ny tanàna tsy voaisy manda manodidina kosa, dia hatao momba ny tany ihany: azo avotana ireny, ary ho afaka amin’ny Jobily.

³² Ny amin’ny tanànan’ny Levita kosa, ny amin’ny trano hananany ao an-tanàna, dia azony avotana hatrany hatrany.

³³ Raha misy mividy trano amin’ny Levita, dia ho afaka amin’ny Jobily ny trano namidy ao amin’ny tanàna efa nomena azy ireo; satria ny trano ao an-tanànan’ny Levita dia fananany eo afovoan’ny zanak’i Israely.

³⁴ Ny saha manodidina ny tanànan’ny Levita, dia tsy hamidy fa fananany mandrakizay izany.

Ny olona: ampisamborina, afahana

³⁵ Raha misy rahalahinao mihamahantra sy mihaòsa tanana eo akaikinao, na dia izay hafa firenena na vahiny aza, dia tohano izy, mba hivelona eo akaikinao.

³⁶ Aza maka zana-bola na tombony aminy, fa matahora ny Andriamanitrao, ka aoka hivelona eo akaikinao ny rahalahinao.

³⁷ Aza mampanàna vola aminy, na mampisambotra hanina hilàn-tombony aminy.

³⁸ Izaho no Iaveh Andriamanitrareo, Izay namoaka anareo tany amin’ny tany Ejipta, hanomezako anareo ny tany Kanaana, mba ho Andriamanitrareo.

³⁹ Raha mihamahantra ny rahalahinao eo akaikinao, ka mivaro-tena aminao, aza dia ampanaovina asan’andevo izy,

⁴⁰ fa ataovy toy ny mpikarama, na vahiny an-trano, ary mandra-pahatongan’ny taona Jobily no hanompoany anao.

⁴¹ Amin’io dia ho afaka izy mbamin’ny zanany miaraka aminy, ka hody any amin’ny fianakaviany sy hiverina amin’ny fananan-drazany indray.

⁴² Fa mpanompoko nentiko nivoaka avy any amin’ny tany Ejipta izy ireo ka tsy hamidy toy ny fivarotra andevo.

⁴³ Tsy hizaka azy amin-kalozana ianao, fa hatahotra ny Andriamanitrao.

⁴⁴ Ireo firenena manodidina anao no azonao angalana andevo lahy na vavy, mba ho anao; amin’ireo no hividiananareo ankizy lahy aman’ankizy vavy.

⁴⁵ Ireo zana-bahiny mitoetra eo aminareo koa no azonareo ividianana, na ireo fianakavian’izy ireo, izay miara-monina aminareo, sy naterany teo amin’ny taninareo; ka dia ho fanananareo ireny.

⁴⁶ Havelanareo ho lovan’ny zanakareo mandimby anareo ireny, mba hizakany azy ireo toy ny fananana; ho andevonareo mandrakizay izy. Fa raha ny amin’ny rahalahinareo, ny zanak’i Israely kosa, dia aza misy aminareo mizaka ny rahalahiny amin-kalozana.

⁴⁷ Raha misy olon-kafa firenena na vahiny tonga manan-karena teo akaikinao ary misy rahalahinao nihanahantra teo akaikiny, ka nivaro-tena tamin’ilay hafa firenena vahiny eo akaikinao, na amin’ny taranaky ny fianakaviana hafa firenena,

⁴⁸ dia azo avotana izy, rehefa nivaro-tena; ny iray amin’ny rahalahiny no mahazo manavotra azy;

⁴⁹ na ny rahalahin-drainy, na ny zana-drahalahin-drainy mahazo manavotra azy; na ny iray amin’ny havany akaiky mahazo manavotra azy; na ny tenany, rehefa mba mahazo harena izy, dia hiavo-tena.

⁵⁰ Izy sy ilay nividy azy no hiara-manisa ny taona hatramin’ny nivarotany tena tamin’izy io, ka hatramin’ny taona Jobily; dia hatao araka izay isan’ny taona ny vola nivarotany ny tenany; hotombanana toy ny fanao amin’ny mpikarama izay andro niasany.

⁵¹ Raha mbola maro ny taona sisa, dia haloany araka izay isan’izany taona izany ny vola avony, atao ara-kevitry ny vola nividianana azy ihany.

⁵² Ary raha vitsy sisa ny taona hatramin’ny taona Jobily, dia isaina izany: hatao araka izany taona izany ny vola avony haloany.

⁵³ Ho toy ny mpikarama an-taona no ho fitoetrany ao aminy; ary tsy ho an-kalozana no hitondrany azy, eo imasonao.

⁵⁴ Raha tsy misy hanavotana azy akory, dia ho afaka amin’ny taona Jobily izy mbamin’ny zanany miaraka aminy.

⁵⁵ Satria amiko ny zanak’i Israely no mpanompo; mpanompoko nentiko nivoaka avy any amin’ny tany Ejipta izy. Izaho no Iaveh Andriamanitrareo.