Josoa 22 - Baiboly Katolika

3. FIAFARAN’NY ASAN’I JOSOE 1. Fiverenan’ireo foko tany atsinanana sy ny ôtelin’ireo Fampodiana any an-dafin’i Jordany

¹ Dia nantsoin’i Jôsoe tamin’izay ny Robenita sy ny Gadita ary ny antsasaky ny fokon’i Manase,

² ka hoy izy tamin’izy ireo: «Efa notovinareo ny zavatra rehetra nandidian’i Môizy mpanompon’i Iaveh anareo efa nohenoinareo tamin’izay rehetra nandidiako anareo ny feoko.

³ Tsy nandao ny rahalahinareo ianareo, hatramin’izay andro lava izay ka mandraka androany, ka nitandrina tsara ny didin’i Iaveh Andriamanitrareo.

⁴ Ary ankehitriny, efa nomen’i Iaveh Andriamanitrareo fitsaharana ny rahalahinareo, araka ny efa nolazainy taminy; koa modia ary mankanesa any amin’ny lainareo, any amin’ny tany izay anareo, izay nomen’i Môizy mpanompon’i Iaveh anareo, any andafin’i Jordany.

⁵ Kanefa tandremo tsara ny hanaraka ny fitsipika aman-dalàna nandidian’i Môizy mpanompon’i Iaveh anareo, ka tiava an’i Iaveh Andriamanitrareo, mandehana amin’ny lalany rehetra, mitandrema ny didiny, miraiketa fo aminy, ary manompoa Azy amin’ny fonareo rehetra sy amin’ny fanahinareo rehetra.»

⁶ Dia nitso-drano azy ireo i Jôsoe ary nandefa azy, ka lasa nankany amin’ny lainy izy ireo.

⁷ I Môizy no nanome faritany, any amin’i Basàna, ho an’ny antsasaky ny fokon’i Manase, ary i Jôsoe kosa no nanome faritany ny antsasany sisa amin’ny rahalahiny atỳ an-dafin’i Jordany atỳ andrefana. Nony nampody azy ireo ho any an-dainy i Jôsoe dia nitso-drano azy,

⁸ ka nanao taminy hoe: «Hody eny an-dainareo ianareo, mitondrà harena be, biby fiompy sesehena, volafotsy, volamena, varahina, sy vy ary fitafiana be dia be, koa zarao amin’ny rahalahinareo ny babo azo avy tamin’ny fahavalonareo».

Nananganana ôtely teo amoron’i Jordany

⁹ Dia nandao ny zanak’i Israely tao Silô amin’ny tany Kanaana ny fokon-dRobena sy ny fokon’i Gada, ary ny antsasaky ny fokon’i Manase dia nody nankany amin’ny tany Galaada izay efa noraisiny ho zara taniny araka ny nandidian’i Iaveh tamin’ny alalan’i Môizy.

¹⁰ Nony tonga teo amin’ny faritanin’i Jordany, izay anisan’ny tany Kanaana, ny tarana-dRobena, sy ny taranak’i Gada, ary ny antsasaky ny fokon’i Manase, dia nanorina ôtely teo amoron’i Jordany, ary lehibe no fijery izany ôtely izany.

¹¹ Ren’ny zanak’i Israely, fa nisy nilaza hoe: «Indreo fa nanorina ôtely eo amin’ny faritanin’i Jordany, eo anoloan’ny tany Kanaana, amin’ny lafin-tanin’ny zanak’i Israely, ny tarana-dRobena, ny taranak’i Gada, ary ny antsasaky ny fokon’i Manase.»

¹² Nony nandre izany ny zanak’i Israely dia nivory tao Silô ny fiangonan’ny zanak’i Israely rehetra mba hiakatra hamely azy sy hanafika azy.

Nomena tsiny ireo foko tany Atsinanana

¹³ Nirahin’ny zanak’i Israely ho any amin’ny tarana-dRobena sy ny taranak’i Gada ary ny antsasaky ny fokon’i Manase, any amin’ny tany Galaada, i Finea zanak’i Eleazara mpisorona,

¹⁴ nomban’ny loholona folo lahy, dia loham-pokom-pianakaviana tamin’ny isan’arivon’i Israely.

¹⁵ Nony tonga tany amin’ny tarana-dRobena sy ny taranak’i Gada ary ny antsasaky ny fokon’i Manase any amin’ny tany Galaada izy ireo dia niteny taminy nanao hoe:

¹⁶ «Izao no lazain’ny fiangonan’i Iaveh rehetra: ‹Inona izato fahotana nataonareo tamin’ny Andriamanitr’i Israely, fa niala tamin’i Iaveh androany ianareo, tamin’ny nanorenanareo ôtely hiodinanareo amin’i Iaveh androany?›

¹⁷ Tsy ampy ho antsika va ny heloka tamin’i Fogôra, nefa mbola tsy nahadio tena ho afaka amin’izany isika mandraka androany, na dia efa nasian’ny loza aza ny fiangonan’i Iaveh,

¹⁸ no dia miodina miala amin’i Iaveh koa ianareo anio? Raha miodina amin’i Iaveh anefa anio, dia ho tezitra amin’ny fiangonan’i Israely rehetra Izy rahampitso.

¹⁹ Koa raha ny tany fanananareo no heverinareo ho maloto dia mankanesa any amin’ny tany izay fananan’i Iaveh, izay ipetrahan’ny fonenan’i Iaveh, ka monena any aminay; fa aza miodina amin’i Iaveh ary aza miodina aminay, amin’ny fanorenana ôtely hafa noho ny ôtelin’i Iaveh Andriamanitsika.

²⁰ Moa tsy i Akàna zanak’i Zare va no nanao fahotana, ny amin’ny zavatra natao anatema, moa tsy ny fiangonan’i Israely va no nipoahan’ny hatezeran’i Iaveh? Ka dia tsy izy irery no maty noho ny heloka nataony?»

Fanomezana rariny ireo foko tany an-dafin’i Jordany

²¹ Dia namaly ny tarana-dRobena ny taranak’i Gada ary ny antsasaky ny fokon’i Manase, ka nanao tamin’ireo mpifehy isan’arivon’i Israely hoe:

²² «Ny Tsitoha Andriamanitra, i Iaveh, ny Tsitoha Andriamanitra i Iaveh: mahalala, ary i Israely koa hahalala raha fiodinana sy fivadihana amin’i Iaveh izany, dia aza mamonjy anay akory Ianao anio, ry Andriamanitra ô!

²³ Raha ny hiala amin’i Iaveh no nanorenanay, sy ny hanatitra sorona dorana sy fanatitra ary ny hanao sorom-pihavanana eo amboniny, dia aoka hampamoahin’i Iaveh izany izahay.

²⁴ Raha tsy tahotra ny hihatra aminay kosa no nanaovanay izany, fa hoy izahay: Indray andro any, ny taranakareo hilaza amin’ny taranakay hoe: Mifaninona akory moa ianareo sy i Iaveh Andriamanitr’i Israely?

²⁵ I Jordany no faritra nataon’i Iaveh hanelanelana anay sy ianareo, ry tarana-dRobena sy taranak’i Gada, ka tsy manana anjara amin’i Iaveh akory ianareo? Amin’izany ny taranakareo dia hampitsahatra ny taranakay tsy hatahotra an’i Iaveh;

²⁶ ka nifampilaza izahay hoe: Andeha isika hanorina ôtely anankiray, tsy hanaterana sorona dorana, na sorona,

²⁷ fa mba ho vavolombelona ho anay sy ianareo, sy ny fara mandimby antsika, fa izahay dia manompo an’i Iaveh eo anatrehany amin’ny sorona doranay, sy ny soronay, ary ny sorom-pihavananay, mba tsy hilazan’ny taranakareo amin’ny taranakay rahatrizay hoe: Tsy manana anjara amin’i Iaveh ianareo.

²⁸ Ary hoy izahay: Raha avy izay hilazany amintsika na amin’ny taranatsika indray andro any, dia izao no havalintsika azy: Jereo ny endriky ny ôtelin’i Iaveh naorin’ny razanay, tsy hanaterana sorona, fa ho vavolombelona ho anay sy ianareo.

²⁹ Koa lavitra anay izay hikomy amin’i Iaveh na hiala amin’i Iaveh anio, ka hanorina ôtely hanaterana sorona dorana, sy fanatitra ary sorona, afa-tsy ny ôtelin’i Iaveh Andriamanitsika, izay eo anoloan’ny fonenany.»

Niverina ny fifanarahana

³⁰ Nony ren’i Finea, mpisorona sy ny lohan’ny fiangonana, mpifehy ny isan’arivon’i Israely izay niaraka taminy ny teny nolazain’ny tarana-dRobena, sy ny taranak’i Gada ary ny taranak’i Manase dia afa-po izy ireo.

³¹ Ary hoy i Finea zanak’i Eleazara mpisorona tamin’ny tarana-dRobena sy ny taranak’i Gada ary ny taranak’i Manase: «Fantatray izao fa eto afovoantsika i Iaveh, satria tsy nanao izany fahotana izany tamin’i Iaveh ianareo; koa amin’izany, dia efa nanafaka ny zanak’i Israely tamin’ny tanan’i Iaveh ianareo.»

³² Dia nandao ny tarana-dRobena sy ny taranak’i Gada, i Finea, zanak’i Eleazara mpisorona sy ny loholona, ka niverina, avy amin’ny tany Galaada, ho any amin’ny tany Kanaana, ao amin’ny zanak’i Israely, ka nanao ny filazany tamin’izy ireo.

³³ Sitraky ny zanak’i Israely izany zavatra izany, ka nisaotra an’Andriamanitra izy, ary tsy nihevitra intsony izay hiakatra amin’ireny mba handrava ny tany nonenan’ny tarana-dRobena sy ny taranak’i Gada.

³⁴ Nomen’ny tarana-dRobena sy ny taranak’i Gada anarana hoe: «Ed» ilay ôtely, satria io, hoy izy, no vavolombelona amintsika roa tonta fa i Iaveh no Andriamanitra.