Josoa 15 - Baiboly Katolika

Ny fokon’i Jodà

¹ Ny anjara lasan’ny fokon-taranak’i Jodà, araka ny fianakaviany, tamin’ny filokana, dia nitatra hatrany amin’ny faritanin’i Edôma hatrany amin’ny efitra Sina any atsimo any amin’ny farany atsimo.

² Ny faritry ny taniny amin’ny atsimo dia niantomboka avy amin’ny faran’ny Ranomasin-tSira dia amin’ny tendrony mitodika atsimo,

³ ka nitohy ao atsimon’ny fiakarana Akrabima, dia mahazo an’i Sina, sy miakatra any atsimon’i Esrôna, niakatra mankany Adara, niolaka any Karkaà,

⁴ avy eo dia nahazo an’i Asmôna, nitohy hatramin’ny ranon-driakan’i Ejipta, dia nihatra hatrany amin’ny ranomasina ny faritry ny taniny. Izany no ho faritry ny taninareo any atsimo.

⁵ Ary ny Ranomasin-tSira hatramin’ny vavaranon’i Jordany no faritry ny tany atsinanana. Ny faritry ny tany avaratra dia hatreo amin’ny helo-dRanomasin-tSira, amin’ny vavaranon’i Jordany,

⁶ ka niakatra hatrany Bety-Aglà ny faritry ny tany, dia nihazo any avaratr’i Bety-Arabà, ary niakatra hatramin’ny vaton’i Bôena, zana-dRobena, ny faritry ny tany;

⁷ niakatra any Debera, nony mby eo amin’ny lohasaha Akora ny faritry ny tany dia nihodina mianavaratra mankany Galgalà, izay manandrify ny fiakaran’i Adomima, atsimon’ny ranon-driaka, ary ny faritry ny tany nihazo tao akaikin’ny ranon’i En-Semesa, ka nihatra hatrany En-Rôgela.

⁸ Ary ny faritry ny tany niakatra eo amin’ny lohasahan’i Ben-Enôma, hatrany amin’ny kisolosolo atsimon’ny Jeboseanina, dia i Jerosalema; avy eo dia nisondrotra ny faritry ny tany hatrany an-tampon’ny tendrombohitra manandrify ny lohasaha Enôma eo andrefany, sy amin’ny faran’ny tany lemaky ny Refaima eo avaratra.

⁹ Avy eo an-tampon’ny tendrombohitra dia nizotra ny faritry ny tany hatrany amin’ny lohan’ny ranon’i Neftoà, nihatra amin’ny tanàna ao an-tendrombohitra Efrôna; nandroso ny faritry ny tany mankany Baala, dia Kariata-Jearima izany.

¹⁰ Avy eo Baala ny faritry ny tany dia niolaka miankandrefana mankany amin’ny tendrombohitra Jarima, dia i Keslôna izany, nidina mankany Bety-Samesa nihazo an’i Tamà.

¹¹ Ny faritry ny tany nipaka amin’ny kisolosolo avaratr’i Akarôna, ary nizotra ny faritry ny tany mankany Sekrôna, nihazo amin’ny tendrombohitra Baala ary nipaka amin’i Jebneela ary nihatra amin’ny ranomasina.

¹² Ary ny faritry ny tany andrefana dia ny ranomasina lehibe sy ny taniny. Izany no faritry ny tanin’ny taranak’i Jodà, araka ny fianakaviany, amin’ny lafiny rehetra.

Ny taranak’i Kaleba monina eo amin’ny faritra misy an’i Hebrôna

¹³ Araka ny didin’i Iaveh tamin’i Jôsoe, nomena anjara teo afovoan’ny taranak’i Jodà i Kaleba zanak’i Jefone, dia ny tanànan’i Arbe, rain’i Enaka, dia i Hebrôna izany.

¹⁴ Noroahin’i Kaleba hiala tao izy telo lahy, zanak’i Enaka, dia i Sesaia, i Ahimàna ary i Tolmaia taranak’i Enaka.

¹⁵ Avy tao, dia niakatra namely ny mponina tao Dabira indray izy. Kariata-Sefera no anaran’i Dabira taloha.

¹⁶ Hoy i Kaleba: «Homeko an’i Aksà zanako vavy ho vadiny izay handresy an’i Kariata-Sefera, ka hahafaka azy.»

¹⁷ Otoniela zanak’i Keneza, rahalahin’i Kaleba, no nahafaka azy ka nomen’i Kaleba azy i Aksà zanany vavy, ho vadiny.

¹⁸ Nony nankany amin’i Otoniela ravehivavy, dia namporisika azy hangataka saha amin-drainy; nidina niala tamin’ny ampondrany izy, ka hoy rainy taminy: «Inona no ilainao?»

¹⁹ Ary izao no navaliny: «Mba omeo fanomezana aho, tany tsy misy rano no namponenanao ahy; ka mba omeo loharano koa aho.» Dia nomeny ny loharano ambony sy ny loharano ambany izy.

²⁰ Izany no lovan’ny fokon-taranak’i Jodà, araka ny fianakaviany.

Anaran’ireo toerana nisy ny fokon’i Jodà

²¹ Ny tanàna izay ao amin’ny fara sisin’ny fokon-taranak’i Jodà, manolotra ny faritanin’i Edôma, ny tao amin’i Negeba, dia i Kabseela, i Edera, i Jagora,

²² i Kinà, i Dimônà, i Adadà,

²³ i Kadesa, i Asora, sy i Jetnama,

²⁴ i Zifa, i Telema, i Balôta,

²⁵ i Asora vaovao sy i Kariota-Hesrona, dia i Asora izany,

²⁶ i Amama, i Samà, i Moladà,

²⁷ i Asergadà, i Hasemôna, i Betfeleta,

²⁸ i Hasersoala, i Bersabe, sy i Baziotià,

²⁹ i Baalà, i Jima, i Esema,

³⁰ i Eltolôda, i Kasila, i Harmà,

³¹ i Sikelega, i Medemenà, i Sensenà,

³² i Lebaôta, i Selima, i Aena, ary i Remôna: totaliny, tanàna 29 ary ny zana-bohiny.

³³ Ny tao amin’ny Seeflà dia: i Estaôla, i Sarea, i Asenà,

³⁴ i Zanôe, i Aen-Ganima, i Tafoaha, i Enaima,

³⁵ i Jerimota, i Odolama, i Sôfoaha, i Enaima,

³⁶ i Saraima, i Aditaïma, i Gederà ary i Gederôtaima: tanàna 14 ary ny zana-bohiny.

³⁷ I Sanana, i Hadasà, i Magdala-Gada,

³⁸ i Deleana, i Masefa, i Jektela,

³⁹ i Lakisa, i Baskata, i Eglôna,

⁴⁰ i Kebôna, i Lehemàna, i Ketsila,

⁴¹ i Giderôta, i Bet-Dagôna, i Naamà, ary i Makedà: 16 ary ny zana-bohiny;

⁴² i Labàna, i Etera, i Asana,

⁴³ i Jeftà, i Esnà, i Nesiba,

⁴⁴ i Keilà, i Aleziba, ary i Maresà, tanàna sivy ary ny zana-bohiny,

⁴⁵ i Akarôna, sy ny tanàna momba azy, ary ny zana-bohiny.

⁴⁶ Hatreo Akarôna no ho miankandrefana, dia ny tanàna rehetra akaikin’i Azota, mbamin’ny zana-bohiny,

⁴⁷ i Azota sy ny tanàna momba azy ary ny zana-bohiny; i Gazà sy ny tanàna momba azy, mbamin’ny zana-bohiny, hatramin’ny ranon-driakan’i Ejipta, sy hatramin’ny Ranomasina Lehibe izay fariny.

⁴⁸ Ny tao amin’ny tendrombohitra dia: i Samira, i Jetera, i Sokôta.

⁴⁹ I Danà, i Kariata-Senà, dia i Dabira izany,

⁵⁰ I Anaba, i Isremao, i Anima,

⁵¹ i Gôsena, i Olôna ary i Gilô: tanàna 11 ary ny zana-bohiny.

⁵² I Araba, i Domà, i Esaàna,

⁵³ i Janoma, i Bety-Tafoà, i Afekà,

⁵⁴ i Atmatà, i Kariat-Arbe, dia i Hebrôna izany, ary i Siôra: tanàna sivy, ary ny zana-bohiny.

⁵⁵ I Maona, i Karmela, i Zifa, i Jotà,

⁵⁶ i Jezraela, i Jôkadama, i Zanôe,

⁵⁷ i Akaïna, i Gabaà, i Tamnà: tanàna folo sy ny zana-bohiny;

⁵⁸ i Halola, i Bety-Sora, i Gedôra,

⁵⁹ i Mareta, i Bety-Anôta sy i Eltekôna, tanàna enina sy ny zana-bohiny.

⁶⁰ I Kariat-Baala, dia i Kariat-Jearima izany ary i Arebà: tanàna roa sy ny zana-bohiny.

⁶¹ Ny tao amin’ny efitra: I Bet-Aralà, i Medina, i Sakakà,

⁶² i Nebsana, i Ir-Hamelàka ary i En-Gadi: tanàna enina sy ny zana-bohiny.

⁶³ Tsy naharoaka ny Jeboseanina izay monina ao Jerosalema ny taranak’i Jodà, ka niara-nitoetra tamin’ny taranak’i Jodà ao Jerosalema ny Jeboseanina mandraka androany.