Genesisy 21 - Baiboly Katolika

Ny nahaterahan’i Isaaka

¹ Namangy an’i Sarà i Iaveh araka ilay efa voalazany, notanterahin’i Iaveh tamin’i Sarà ny efa nampanantenainy.

² Nanana anaka i Sarà ka nitera-dahy tamin’i Abrahama, tamin’ny fahanterany, nony tonga ny fotoana nolazain’Andriamanitra azy.

³ Ary ny anaran’ilay zaza teraka taminy, naterak’i Sarà taminy, dia nataon’i Abrahama hoe Isaaka.

⁴ Nony teraka havaloana izy dia noforàn’i Abrahama, araka ny efa nandidian’Andriamanitra azy.

⁵ Efa zato taona i Abrahama tamin’ny nahaterahan’i Isaaka zanany.

⁶ Ary hoy i Sarà: «Efa nomen’Andriamanitra ahy izay hampihomehy ahy, ka na iza na iza handre izany dia hihomehy noho ny amiko.» Hoy koa izy:

⁷ «Iza moa no nanan-kevitra ny hilaza amin’i Abrahama hoe: Hampinono zaza i Sarà? Kanjo antitra izy ity vao tera-dahy taminy aho.»

Ny nandroahana an’i Agara sy i Ismaely

⁸ Nihalehibe ny zaza dia notazana. Ary nanao fanasana lehibe i Abrahama tamin’ny andro nanotazana an’i Isaaka.

⁹ Ilay zanak’i Agara Ejiptianina naterany tamin’i Abrahama kosa, hitan’i Sarà fa nihomehy,

¹⁰ ka hoy izy tamin’i Abrahama: «Roahy io andevovavy io sy ny zanany; fa ny zanak’io andevovavy io dia tsy mahazo miray lova amin’ny zanako, amin’i Isaaka.»

¹¹ Nampalahelo mafy an’i Abrahama izany teny izany, noho ny amin’ny zanany.

¹² Fa hoy Andriamanitra tamin’i Abrahama: «Aza atao mampalahelo anao ny amin’ny zaza sy ny andevovavinao, fa na inona na inona angatahin’i Sarà ekeo avokoa, satria avy amin’i Isaaka no hiavian’ny taranaka hitondra ny anaranao.

¹³ Kanefa hotongaviko firenena ihany koa ny zanaky ny andevovavinao, satria terakao izy.»

¹⁴ Dia nifoha maraina koa i Abrahama, ka naka mofo sy rano eran’ny siny hoditra anankiray; nomeny an’i Agara sy nataony teo an-tsorony ireo ary ny zaza koa, dia nalefany izy. Nandeha ravehivavy ka nirenireny tany an’efitr’i Bersabea tany.

¹⁵ Nony lany ny rano tamin’ilay siny hoditra, dia nariany teo am-poto- kazo kely anankiray ny zaza;

¹⁶ ary lasa izy nipetraka lavidavitra tandrifiny sahabo ho tra-tsipîka fa hoy izy: «Tsy tiako ny hahita ny hahafatesan’ny zaza.» Koa nipetraka tandrifiny izy, dia nanandra-peo ary nitomany.

¹⁷ Andriamanitra nandre ny feon’ny zaza, ka ny Anjelin’Andriamanitra tany an-danitra dia niantso an’i Agara nanao hoe: «Fa maninona izato ianao, ry Agara? Aza matahotra fa efa henon’Andriamanitra ny feon’ny zaza, ao amin’ny toerana misy azy.

¹⁸ Mitsangàna ianao, areno ny zaza, ka tantano izy; fa hataoko firenena lehibe izy.»

¹⁹ Dia nampahiratin’Andriamanitra ny mason’i Agara, nahita lavaka fantsakana izy, ary nofenoiny rano tao ny siny hoditra, dia nampisotroiny ny zaza.

²⁰ Nomban’Andriamanitra ny zaza, ka nihalehibe; ary nonina tany an’efitra izy, sy tonga mpandefa tsipìka.

²¹ Nonina tany amin’ny efitra Faràna izy; ary nangalan-dreniny vady avy amin’ny tany Ejipta.

I Abrahama sy i Abimeleka tany Bersabea

²² Tamin’izany andro izany, i Abimeleka narahin’i Fikôla, filohan’ny tafiny, niteny tamin’i Abrahama hoe: «Omban’Andriamanitra ianao amin’izay rehetra ataonao.

²³ Koa mianiàna amiko eto, amin’ny anaran’Andriamanitra fa tsy hamitaka ahy, na ny zanako, na ny zafikeliko ianao, fa ho araka ny soa nataoko taminao no mba hataonao amiko sy amin’ity tany onenanao ity koa.»

²⁴ Hoy i Abrahama: «Hianiànako izany.»

²⁵ Nanome tsiny an’i Abimeleka anefa i Abrahama, fa nisy lavaka fantsakana anankiray nanaovan’ny mpanompony an-keriny.

²⁶ Hoy ny navalin’i Abimeleka: «Tsy mahalala izay nanao izany aho; fa ianao tsy mampandre ahy, izaho tsy nandre izany raha tsy vao izao.»

²⁷ Dia naka ondry aman’omby i Abrahama, natolony an’i Abimeleka ka nifanao fanekem-pihavanana izy roa lahy.

²⁸ Ary nanavaka ondrivavy kely fito tamin’ny biby fiompiny i Abrahama.

²⁹ Ka hoy i Abimeleka taminy: «Inona ireo ondrivavy kely fito navahanao ireo?»

³⁰ Hoy ny navaliny: «Horaisinao avy amin’ny tanako ireo ondrivavy kely fito ireo mba ho vavolombelona ho ahy fa izaho no nihady io lavaka fantsakana io.»

³¹ Izany no nanaovana io toerana io hoe Bersabea, satria teo izy roa lahy no samy nianiana.

³² Nanao fanekem-pihavanana tao Bersabea izy ireo. Rehefa vita izany dia niainga i Abimeleka sy i Fikôla, filohan’ny tafiny, ka niverina ho any amin’ny tanin’ny Filistinina.

³³ Namboly tamarisa tao Bersabea i Abrahama, ary niantso ny anaran’i Iaveh Andriamanitra mandrakizay teo izy.

³⁴ Naharitra ela no nitoerany tany amin’ny Filistinina.