Genesisy 10 - Baiboly Katolika

Firenena taranak’i Nôe mameno ny tany

¹ Izao no taranak’i Sema sy i Kama ary i Jafeta, zanak’i Nôe. Nitera-dahy izy ireo taorian’ny safodrano.

² Zanak’i Jafeta: i Gômera, i MaGoga, i Maday, i Javàna, i Tobala, i Mosòka, ary i Tirasa.

³ Zanak’i Gômera: i Aseneza, i Rifata, ary i Togorma.

⁴ Zanak’i Javàna: i Elisà sy i Tarsisa ary i Setima sy i Dôdanima.

⁵ Avy tamin’ireo no iavian’ny vahoaka miely amin’ny nosim-pirenena any amin’ny taniny avy, samy araka ny fiteniny sy araka ny fianakaviany, araka ny fireneny avy.

⁶ Zanak’i Kama: i Kosy, i Mesraima, i Fota, ary i Kanaana.

⁷ Zanak’i Kosy: i Saba, i Hevilà, i Sabata, i Regma ary i Sabatakà. Zanak’i Regma: i Saba.

⁸ I Kosy niteraka an’i Nemrôda, izay voalohan’olona manam-pahefana tamin’ny tany.

⁹ Mpihaza mahery teo anatrehan’i Iaveh izy, ka izany no anaovan’ny olona hoe: Tahaka an’i Nemrôda mpihaza mahery eo anatrehan’i Iaveh.

¹⁰ Ny niandohan’ny fanjakany dia i Babela, i Aràka, i Akada, ary i Kalane any amin’ny tany Senaara.

¹¹ Avy ao amin’io tany io izy dia nankany Asora, ka nanorina an’i Niniva, i Rekôbôta-Ira, i Kale,

¹² ary i Resena anelanelan’i Niniva sy i Kale; io no ilay tanàna lehibe.

¹³ I Mesraima niteraka ny Lodima, ny Anamima, ny Laabima, ny Neftoima,

¹⁴ ny Fetrôsima, ny Kasloima, izay iavian’ny Filistinina ary ny Kaftorima.

¹⁵ I Kanaana niteraka an’i Sidona lahimatoany, sy i Heta;

¹⁶ ary koa ny Jeboseanina, ny Amôreana, ny Jerijeseanina,

¹⁷ ny Heveanina, ny Araseanina, ny Sineanina,

¹⁸ ny Aradianina, ny Semareanina, ary ny Amateanina. Ary nony tatỳ aoriana niely ny fokon’ny Kananeanina.

¹⁹ Ka ny faritanin’ny Kananeanina tafapaka hatrany Sidona amin’ny tandrifin’ny Jerara ka hatrany Gazà, ary hatramin’ny tandrifin’i Sôdôma, i Gômôra, i Adama ary i Sebôima, dia hatrany Lesà.

²⁰ Ireo no taranak’i Kama, araka ny fianakaviany sy araka ny fiteniny avy, any amin’ny taniny sy any amin’ny fireneny avy.

²¹ Dia nitera-dahy koa i Sema, rain’ny zanak’i Ebera rehetra, sy zokin’i Jafeta.

²² Zanak’i Sema: i Elama, i Asora, i Arfaksada, i Loda, ary i Arama.

²³ Zanak’i Arama: i Osa, i Hola, i Getera, ary i Mesa.

²⁴ I Arfaksada niteraka an’i Sale, ary i Sale niteraka an’i Ebera.

²⁵ Roa lahy no zanak’i Ebera, ka Falega no anaran’ny anankiray, fa tamin’ny androny dia voazara ny tany, ary Jektàna no anaran’ny rahalahiny.

²⁶ I Jektàna niteraka an’i Elmôdada, i Salefa, i Asarmota, i Jare,

²⁷ i Adôrama, i Ozala, i Deklà,

²⁸ i Ebala, i Abimaela, i Sabà,

²⁹ i Ofira, i Hevilà, ary i Jôbaba.

³⁰ Izy rehetra ireo dia zanak’i Jektàna. Ny tany nonenan’izy ireo dia ny tendrombohitra atsinanana hatrany Mesà manitsy an’i Sefara.

³¹ Ireo no taranak’i Sema, araka ny fianakaviany sy araka ny fiteniny, any amin’ny taniny avy, araka ny fireneny avy.

³² Ireo no fianakavian’ny zanak’i Nôe, araka ny taranany, any amin’ny fireneny avy. Avy amin’ireo ny firenena niely teto ambonin’ny tany, taorian’ny safodrano.