Levitikosy 19 - Baiboly Katolika Baiboly Katolika
Levitikosy 19

¹ Ary i Iaveh niteny tamin’i Môizy nanao hoe:

² Mitenena amin’ny fiangonan’ny zanak’i Israely rehetra, lazao aminy hoe: Aoka ho masina ianareo satria masina Aho, Iaveh Andriamanitrareo.

³ Samia matahotra ny reninareo sy ny rainareo, ary tandremo ny sabatako. Izaho no Iaveh Andriamanitrareo.

⁴ Aza mitodi-doha amin’ny sampy; ary aza manao andriamanitra anidina ho anareo. Izaho no Iaveh Andriamanitrareo.

⁵ Raha manatitra sorom-pihavanana amin’i Iaveh ianareo, ataovy araka izay hahazoanareo sitraka aminy, izany.

⁶ Izay andro hamonoana ny sorona, na ampitson’izay, no hihinanana azy; izay sisa tratry ny andro fahatelo dia hodorana amin’ny afo.

⁷ Raha sendra misy mihinana amin’izany, dia fahavetavetana izany, ka tsy hankasitrahina ny sorona.

⁸ Ary izay mihinana azy amin’izany, dia hilonjy ny helony, fa mametaveta ny zava-boahasina ho an’i Iaveh, ka hofongorana amin’ny fireneny izany olona izany.

⁹ Raha mijinja ny vokatry ny taninareo ianareo, aza mijinja ny sahanao hatrany am-paran’ny sisiny indrindra, ary aza fakoinao izay mbola hotsimponin’ny hafa amin’ny varinao.

¹⁰ Aza mioty ny salohiny tavela amin’ny voalobokao; ary aza mitsimpona ny voankazo latsaka amin’ny sahanao; fa avelao izany ho an’ny mahantra sy ny vahiny. Izaho no Iaveh Andriamanitrao.

¹¹ Aza mangalatra, aza mifamitaka na mifandainga ianareo.

¹² Aza mianian-tsy tò amin’ny Anarako, fa fanamavoana ny Anaran’Andriamanitrao izany. Izaho no Iaveh.

¹³ Aza mampahory ny namanao, na manendaka azy. Aza tananao miloaka alina ny karaman’ny mpikarama.

¹⁴ Aza manozona ny marenina, na mametraka eo alohan’ny jamba izay zavatra mety hamotraka azy, fa matahora ny Andriamanitrao. Izaho no Iaveh.

¹⁵ Aza manao ny tsy rariny amin’ny fitsarana: ny mahantra aza ananana tombom-pitia, ny manan-karena aza ananana fankasitrahana, fa ny rariny ihany no hitsaranao ny namanao.

¹⁶ Aza manely fanaratsiana eo amin’ny firenenao. Ary aza mitsangan-ko vavolombelona handatsaka ny ran’ny namanao. Izaho no Iaveh.

¹⁷ Aza mankahala ny rahalahinao ao am-ponao, fa mananara ny namanao, mba tsy hahazoanao heloka noho ny aminy.

¹⁸ Aza mamaly ratsy, na manao an-dolompo amin’ny zanaky ny firenenao. Fa tiavo ny namanao tahaka ny tenanao. Izaho no Iaveh.

¹⁹ Tandremo ny didiko. Aza mampivady biby samy hafa karazana; aza mamafy voan-javatra roa karazana amin’ny tanimbolinao, ary aza mitafy fitafiana voatenona tamin’ny kofehy roa karazany.

²⁰ Raha misy lehilahy mandry sy miray amim-behivavy andevon’olona ka efa voafofon-dehilahy hafa, nefa mbola tsy voaavotra na afaka, dia hofaizina izy roaroa, nefa tsy hoheloin-ko faty, satria tsy olona afaka ravehivavy.

²¹ Ary ho sazin’ny fahotana dia hoentin-dralehilahy amin’i Iaveh ny ondralahy iray eo anoloan’ny trano lay fihaonana hatao sorona fanonerana.

²² Ny mpisorona dia hanao fanonerana ho azy, eo anatrehan’i Iaveh amin’ny ondralahy fisoronam-panonerana, noho ny fahotana nataony, ka dia havela ny fahotana nataony.

²³ Raha afaka izay hahatafidiranareo any amin’ny tany, ka efa namboly hazo mamoa isan-karazany ianareo, dia ataovy ho toy ny tsy voafora ny voany; mandritra ny telo taona dia ho tsy voafora ho anareo izany, ka aza ihinanana.

²⁴ Ary amin’ny taona fahefatra, atokàny ho fiderana an’i Iaveh ny voany rehetra.

²⁵ Fa amin’ny taona fahadimy vao hihinana ny voany ianareo, ka hitohy ny fahavokaran’ny hazo ho anareo. Izaho no Iaveh Andriamanitrareo.

²⁶ Aza mihinan-javatra miharo ra. Aza manao sikidy na fankatoavana.

²⁷ Aza hetezana hatao vorivory ny sisim-bolon-dohanareo, ary aza haratana ny sisim-bolom-bavanareo.

²⁸ Aza mitetika ny tenanareo raha misy maty, na manao sary tombo-kavatsa amin’ny tenanareo. Izaho no Iaveh.

²⁹ Aza mandoto ny zanaka vavinao amin’ny fampijangajangana azy, fandrao mivarilavo amin’ny fijangajangana ny tany, ka feno heloka.

³⁰ Tandremo ny sabatako ary hajao ny fitoerako masina. Izaho no Iaveh.

³¹ Aza manatona an’izay mpamoha angatra na mpisikidy, aza maka hevitra aminy, mba tsy ho voalotony ianareo. Izaho no Iaveh Andriamanitrareo.

³² Mitsangàna raha manoloana ny fotsy volo, hajao ny olona efa tratra antitra; ary matahora an’Andriamanitra. Izaho no Iaveh.

³³ Raha misy vahiny tonga miara-monina aminareo, eo amin’ny taninareo, aza mampahory azy.

³⁴ Fa ataovy toy ny tompon-tany ihany no fitondra ny vahiny mitoetra eo afovoanareo, tiavo toy ny tenanareo izy; fa efa mba vahiny tany amin’ny tany Ejipta koa ianareo. Izaho no Iaveh Andriamanitrareo.

³⁵ Aza manao ny tsy marina na amin’ny fitsarana na amin’ny fandrefesana, na amin’ny fandanjàna, na amin’ny famarana.

³⁶ Fa mizàna marina, vato-mizàna marina, efah marina, ary hina marina no tano. Izaho no Iaveh Andriamanitrareo, Izay namoaka anareo tany amin’ny tany Ejipta.

³⁷ Tandremo avokoa ny lalàna amam-pitsipiko rehetra, ka araho izany. Izaho no Iaveh.