Revelation 3 - ASII LAKDAP Bible (BSI)

Sardis Phungtuti Ma Atiiwan Lak

¹ “Sardis na phungtu sitlaq kra liiti rase ma ara waiq laq: “Ara tsütsa arka Shiikeawe winji miishi kiimaq raiqsaiqpo miishi rümti we raq atiiwan. Ngi raq namshiq jaqsham ka asapha. Namshiq ka wenyi na amaa sitlan. Shatmaq, atra sitiikai nguta tiitsaki tlan!

² Arkha maq, namshiq ma tsii chongkuq tiipha ara tai rong laq. Lanta, namshiq ka wenyi na akon wa, sam wan tlo ronglaq. Namshiq mongjii na wenyi wa ka ham wanto she. Kra mimatki shaq na, tiinyai chaq tlo rong laq. Namshiq raq Phungmaiqse jaqsham lan ka i Shiikeawe makki na riikhaqli thuktsom mak.

³ Arningkhan, man na namshiq Phung na shang wan pha ji na achongkuq, tengteng bomtsi raü kra, tsan na samhea tiitsang shat thü rong laq. Lanta, lang wan ruq maq sirong laq. Lang tlan krai mren, ngarai ka baiq rong liishe. Namshiq ka akon wa sam wan man li sihan jiila, ngi ka ahuk saüki tlaq ikha, namshiq phana tiihanghiiq miili misaükiha. Namshiq riika ngi saükai akhing min sap man mirhan.

⁴ Shatmaq, namshiq Sardis na siti Phungmaiqsetiim liipan wa maiq wiijamti ka asii sitlan. Namshiq asii maq siwantibi ka, ngi rai adam na khealü miirii sam lanta misi wan dam han. Jamkhano ngukla, namshiq ka wenyi na awongsii maiqshaq sitlan.

⁵ Jurwa rekhat tang tlaq, kriiti ma ara khealü miirii ara mitiitsam kuq. Kiimaq ngi raq tsangshiq mang ka atrati mang lakdap wa lambaiq mang mirha. I we man na kiimaq apaiq rasetiim man na, ngi raq kholam kholiiq tsangshiq ka i sengi lü nguta rairai riirii she mirairii wan ha.

⁶ “Arkha maq chongtiikang, nam ni asi jiila, Asii Wenyi raq phungtuti ma tsii chongkuq tlaq ara tiitsang tai rong laq!

Philadalphia Phungtuti Ma Atiiwan Lak

⁷ “Philadalphia na phungtu sitlaq kra liiti rase ma ara waiq laq: “Ara tsütsa arka Asii kiimaq tingting sitiwe raq atiiwan. Apaiq jaq na Dawit sapitu ka asi. Krai mren ümtiikiiwa apaiq raq kilü ashi ka ditlaq, kriika jurmin shaqlot mak she, kiimaq ümtiikiiwa apaiq raq kra ashaq riitlaq, kriika jurmin dilot mak she.

⁸ Namshiq raq jaqsham tlan kriika ngi raq asapha. Namshiq ningkun ka akhiise kriimin asapha. Ningkun akhiiseli jiimin, namshiq raq i bomchong ka tsapkapkap maq lang tlan. Kiimaq ngi rai tiinap shatmaq sitlan. Krai mren, ngi raq namshiq ma kilü ashi dije thü tiikang. Kriika jurmin shaq lot mak she.

⁹ Tai rong laq! Kiijaq siti Thawe sengi arot kong raq, tsangshiq ka Jehudinok nguta tiichong tlo. Shatmaq, arot. Ngi raq tsangshiq ka namshiq jichong na mitiibum ha. Raütiq tiina, tsangshiq raq, namshiq ka ngi raq lungwii tiikang dea nguta misap.

¹⁰ Riita, namshiq raq chamchao ranaiq min, ngi raq achongkuq wan aming ka nungpaq man maq lang wan lan, krai mren, ngi riimin namshiq ka, ara mangjong maiqse ma maitai chamchao jonghea saüho tlaq kiiwa, khup wong kuqshat maq mirüm ha.

¹¹ Ngi ka jaqloli misaüho kang. Namshiq wenyi rilung ka awongsii thü rong laq. Kiikha sihan jiitiq, namshiq srea poksi ka jurmin nyeaho lot mak miraq.

¹² Rekhat tangti, srea jati we ka ngi raq, i Shiikeawe shomjam na khamlawe ma mitiija ha. Kiimaq apaiq ka kiiwa, ahin na kimak she miraq. Ngi raq apaiq khum na i Shiikeawe mang kiimaq i Shiikeawe raq ramungtan anye wa Jerusalem anye tiisat wan tlaq kra chela mang ka miwaiq kuq ha. Kiimaq apaiq khum na, i mang anye kriimin miwaiq kuq ha.

¹³ “Arkha maq chongtiikang, nam ni asi jiila, Asii wenyi raq phungtuti ma tsii chongkuq tlaq ara tiitsang tairong laq!

Laodesia Phungtuti Ma Atiiwan Lak

¹⁴ “Laodesia na phungtu sitlaq kra liiti rase ma ara waiq laq: “Ara tsütsa arka Amen, tsapkapkap kiimaq riikhaqli hakhi keti we raq atiiwan. Apaiq ka Shiikeawe raq phanrap phansang wantaq kiima arang chong.

¹⁵ Namshiq raq jamlai wa sham lan kriika ngi raq asapha. Namshiq ka wenyi na atra min riiman, amaa min riiman. Kili jiipli tsaijang jam sirai tlan! Tiikotea, ashi ngusaq amaa jiila maa tlii kiimaq atra jiila atra kamto sihan jiika ahea riichang!

¹⁶ Shatmaq, namshiq ka jam pu suk chang min riimak, amaa min riiman, atra min riiman, tsaijang jam kha maq, ngi raq namshiq ka i nü mong wa tho thobaiq tiikai ikha aphai lishe mirbaiq!

¹⁷ Namshiq ka, ‘Ngi ka chiithe kiimaq rongboq; ngi ka winta sitiikang,’ nguta tiishom ra rai tlan. Shatmaq, namshiq raq, maiqmii ka thümse sang, kiimaq tiinan miishan sitiikai nguta heman! Namshiq ka miitsan, makchuk, kiimaq kheahü sitlan.

¹⁸ Arningkhan, ngi raq namshiq ma tsii chongkuq tiikang ara. Tairong laq. Namshiq raq i jaq wa awongsii wenyi tsiiq, chiisan tsiiq ara rirong laq. Kra riihan jiitiq, riikhaqli chiithe ma mija han. Lanta, i jaq wa khealü miirii ka ri lanta sam rong laq. Lanta, namkhum kheahü ma, jeasi miari sitlan kra, pang rong laq. Lanta, namshiq mak na jut chang tsiq min rilanta, jut rong laq. Kra riihan jiila, nam mak ka mipiiq. Raüta, michhi han.

¹⁹ Ngi raq lungwii tiikangti ka atiitsii ma, ason atsea riitiikang. Arkha maq chong tiipha. Ümchaü min, namshiq ka ngarai lam wa jang wan tlo ronglaq.

²⁰ Tai ronglaq! Ngi ka kilam da na chaplata kilü na buk tiikang. Ashi ra raq tai raüta, ngi ma kilü ka dikuq kihaü jiila, ngi ka apaiq jam mong na miwaha, lata apaiq rai adam miphaqsiq ha, kiimaq apaiq riimin ngi rai adam miphaqsiq.

²¹ Jurwa rekhat tangtlaq, kriiti ka ngi hokham ngacho tho na nga dam miitu ngi raq arang mikuqha, ngi raq rekhat tang lata, srea ma jawankang krai mren, ümchaü i We hokham ngacho tiinap na nga tiikang. Kiikhiisii kriiti kiimin ngi tiinap na i hokham ngacho na mitiinga ha.

²² “Arkha maq chongtiikang, nam ni asi jiila, Asii Wenyi raq phungtuti ma tsii chongkuq tlaq ara tiitsang tairong laq!”