ISAIA 3 - ASII LAKDAP Bible (BSI)

Jerusalem Na Mungbraktlo

¹ Riita ümchaü sanha Tati, Ajong Pinthum Tati raq, Jerusalem wa nai Juda mung wa maiqse jaq na jamlai phan wa riimtlaq kra kiimaq jamlai phan mo maiq loweatek raq tlamtlaq thun ka wiitashe milam wan. Apaiq tsangshiq tü atsam nai kham anyang chang thun kra milam wan.

² Tsangshiq srea nolabi thun nai phenlabi thun, tsangshiqnok phowebi thun nai shammibi thun, tsangshiq ma jaq liiketi thun, kiimaq tsangshiq shunsheati mungtu shiilangbi thun,

³ tsang phenlabi thun kiimaq mung welabi thun, kiimaq tsangshiq mung peng wanti aki miikiimbi thun, kiimaq maiq mintin loqle klo raüta mrong mra pintlaq kra shiikhing wantibi thun kra hutjok mitsuq wan.

⁴ Tati raq mungmaiqse ka nosere jamsap mak kriiti ma mitiipeng wan.

⁵ Maiq loweatek raq loweatek jaq wa lapphaq lusiq lam kriili she miklo wan. Jerobi raq nyungwere ka shreng mak miraq. Kiimaq pantlat na haiseati bang bang kong raq tsangshiq thaq na maiqlare sitlaq kra shrengmak miraq.

⁶ Akhing ashi misaü wan, maiq aweraü ashiti thun raq tsangta wa maiq weshi kra tsea raüta, apaiq ma akha mingu, “Ümdü niika ümkhum pang chang khu akhea siika asi kata. Arningkhan ümniika ara chamchao akhing na naishiq khuthaq na wela jalaq.”

⁷ Shatmaq apaiq raq mitre, “Ngi ka riimak! Ngi raq namshiq ka khrum kuqlot mang. Ijaq na aphaq asea chang jam min ahü. Kiimaq khu akhea min ahü. Ngi ka namshiq khuthaq na wela ma naq shong rongkiq!”

⁸ Tengto. Jerusalem ka miqto she! Juda mung ka alang pit wan miiqmiiq she! Tsangshiq nübok maq bomtlaq kra nai tsangshiq jaq maq jamlai wa klotlaq kra wiita Tati makki na abi siisaq klotlo. Tsangshiq raq linham linhok raüta Shiikeawe apaiq ka shummiitlo.

⁹ Phowebi raq maiqse ka athea phi na lii raüta kha phokuq wan tlaq kra, kha ka tsangshiq khuthaq na minyan wan. Tsangshiq raq raweahü maq Sodom chelati raq ngarai klotaq ikha klotlo. Tsangshiq ka miqto she. Kiimaq tsangshiq raq kra maiqmii jaq miili tsang mea wan chang lam kra tan wanto.

¹⁰ Kechu maiqse thun ka chochikhiq miraq. Kiimaq tsangshiq miitu ka phanrap lam na ahea miraq. Tsangshiq ka tsangshiq jaq maq jamlai min wa shiiq wantaq kra tsingo ka chochikhiq maq miphaq siq wan.

¹¹ Shatmaq abi klotibi thun ka miqto she. Tsangshiq raq nanok ma jamlai ashut wa klotaq kriithun ka tsangshiq miishe mijang kuq wan.

¹² Kampho tiinamketibi raq isenginok nyatshatshat tiichamchao wanto. Kiimaq tsangshiq ma kampho tiinamketibi raq tsangshiq ka laolii wanto. Isenginok lei, nam welabi raq namshiq ka lamjiq na shunsheatlo. Kra ningkhan namshiq riika ümnii lam na wachang wa kra sap man.

Tati Raq Asenginok Kha Photlo

¹³ Tati ka apaiq kha ka phoho ma khekham she. Apaiq ka asenginok kha phoke ma tiijeje she.

¹⁴ Tati raq asenginok nyungwere thun nai mungtubi thun ka rung na khapho miishe tiichap wantlo. Apaiq raq tsangshiq ma kha ka ara nyantlo: “Namshiq raq spiqro thun ka wiita hukphaqsiq wan lan. Lantea namshiq jam thun ka miitsan maiqse jaq wa nyea wan lan tsiiq anyam raq amashe sitlo.

¹⁵ Namshiq raq isenginok ka ji maq nishishi tseabaiq ka thekmak arang ahü. Lantea miitsan maiqse thun ka nanshan shan haihü ka maimak. Ngi, Ajong Pinthum Tati raq toqtan tiikang.”

Jerusalemti Jechakre Ma Homlan Tsii Chongtlo

¹⁶ Tati raq nguto, “Liironglaq, Jerusalem nyungre ka kai shiikonghea pinthum! Tsangshiq ka chii heawea lam na khum lam maq tsangkhü ka ra na tiinga raqraq maq khumtlo. Tsangshiq ka wranaiqshe tiibaimiinge raütli sitlo. Tsangshiq ka chaosususe miili khumtlo. Raüla tsangshiq jidang na patlaq tükom thun kriika kang rang kong ra trangtlo.

¹⁷ Shatmaq Ngi raq tsangshiq ma mo she mitiihoha. Ngi raq tsangshiq khupo ka loktam misibaiqha. Lata kealoklok she mithüha.”

¹⁸ Ranaiqshi akhing she misaü wan. Kra saüwan raüla, Tati raq Jerusalem nyungre raq pinthum rariqtlaq hup nai sam thun kra wiita milam wan. Tsangshiq jidang na patlaq tü nai laihin hokpaq thun kra, tsangshiq khu na kiimaq dangkong na patlaq thun kra.

¹⁹ Kiimaq tsangshiq jaq dang na patlaq thun kra minyea wan. Apaiq raq tsangshiq khupo pangchang bannin khea phu thun kra minyea wan.

²⁰ Kiimaq tsangshiq khuphok thun kra; tsangshiq jaq na nai tsangshiq chhüpii na mintin kiimut chang rai raü thun patlaq kra minyea wan.

²¹ Tsangshiq jaqshi thun na jaqtop patlaq thun kra, kiimaq tsangshiq khü na khütop thun patlaq kra minyea wan.

²² Tsangshiq raq samchang pinthum araa ariq phan samtong jong kaütiim thun kra, kiimaq khum hamtlii jidang na saüli sam chang samtong jong kaütiim kra, kiimaq kheapii samtlaq ikha samchang kheathum thun kra, kiimaq kampho khiiq thun kra.

²³ Kiimaq tsangshiq dü na samchang bannin kheasetiim akhum tiichhi rashra samtlaq khea kra, kiimaq tsangshiq müsaisai raihi-nairai phaqchet thun kra, kiimaq tsangshiq khu pangchang phaqchet thun kra kiimaq tsangshiq khupo pang chang bannin khea thun kra minyea wan.

²⁴ Homseng ka tsangkhum na nyat rii na, tsangshiq khum ka tsangbi namtoktok she miraq. Tsangchhü na tsomhea nintata shinket parii na, thoila raütam ikha ala atsa klishe shinket ma mipa. Tsangshiq khu ka tsomhea sirii na, tsangkhupo ka kealoklok loktam she miraq. Miirii atsomwiq samrii na, wunthaü riinaü khea sam raütiishe misi. Tsangshiq shamhea kriika jeasi khatamshi horaütli she misi wan!

²⁵ Tengteng, kra chelati maiqwere thun ka, pinthum nolajongbi thun kiimin re jaq na mitsai.

²⁶ Chela kilamchong thun ka maaho manyi she miraq. Kiimaq chela apaiq kra dongdii min, jechak nyung naiqhü ma, hiq na ngaraü ikha miraq.