DUNGWVNC 22 - ASII LAKDAP Bible (BSI)

Thiitham Ke Thungtri

¹ “Maiq weshi ra raq, minsaü kaü lo, riimakla sku kaü lo huk raüla, kra ataa riiphaqtlaq riimakla angam ka asha riiphaq raüla, apaiq raq minsaü kaü shi kra tham ka minsaü kaü biingi maq thamke ratlo. Kiimaq sku kaüshi kra tham ka sku kaüblai maq thamke ratlo.

^2-4 Apaiq raq jamlai wa huktaq kriika apaiq raq thamke raa dongdii. Kiimaq apaiq jaq na thiitham ke chang jam min ahü she raüla, apaiq ka di ma sha raüta apaiq raq huktaq kha kra thamke chang she miraq. Kiimahali apaiq raq ahuk ho minsaü kaü lo, riimakla kumtoq kaü lo, riimakla sku kaü lo ka ajaq na atra asi hum raüla, apaiq raq kaüshi huktaq kriika kaünai maq thamke chang she. “Kiimaq ahukwe ka rawa na maiqjam na ahuk jawa awa kiiwa lapho raüta tsatbaiq raüla, kra ahukwe tseatiwe kriika matwe riimak. Shatmaq kra ahuk ja ka ranaiq na adong wiila tsat raüla, apaiq ka matwe ma mija.

⁵ “Kiimaq maiq weshi ra raq, anyamse kong ka rum na nyiimjaq tiiphaqkai tiikitlaq, riimakla spiqro na tiihaitlaq kriiwa kiho raüta, maiq wak wa tü atsam chamrü na kiho raüta phaqki raüla, apaiq raq atsam maq riimakla spiqtsi maq thamke ratlo.

⁶ “Kiimaq maiq weshi ra raq, awak na wa ka chaq raüta, kiimaq kra wa ka sang rü mong maq nyai wan raüta maiq ahinti wak niishe riilü wan raüla, raüta kra wak wa bunwong rü kra khiimbaiq raüla, riimakla bunwong ka ahan raüta khaolüm aphong kra tiikhiim baiq raüla, jurwa wa ka niq phataq kriiraq kra sumtaq kra thamke ratlo.

⁷ “Kiimaq maiq weshi ra raq, nanok ahinti weshi ra kampho riimakla apaiq ma araa ariq phan hupsam phanshi ra ka apaiq jaq na atiithü kra, apaiq jamwa maiq raq hukho raüla, kiimaq ahukwe kra lap raüla, ahukwe raq thep tliip raüta kra thamke ratlo.

⁸ Shatmaq ahuk kra lap mak dea raüla, kra hupsam araa ariq phan thütiwe kriika noqku jam na sheaho chang. Raüta kiijaq apaiq raq arewe hupsam ka apaiq raq huk mak dea nguta atiitum ratlo.

⁹ “Phanrap hupsam mokai kha she dongtaq miiphat, kriika nyamse minsaü chhechhi kha, kumtoq kong kha, sku kong kha, khu akhea kha, riimakla, laihin hupsam amo arki kha dong haüla, kra hupsam miitu kha riinyantlaq wenai ka noqku jam na shea wan chang. Tsangnai wenai kiiwa Shiikeawe raq ümriitiwa ajiqwe nguta phokuqtlaq, kriiwe raq arewe ma thep tliip raüta thamke ratlo.

¹⁰ “Kiimaq maiq weshi ra raq, maiq weshi hupsam kumtoq kaü, minsaü kaü, sku kaü, riimakla laihin jam nyamse kra miriim kuqha nguta bom ri haüla, kriiwa nyamse ka atsai riiki raüla, riimakla asho riiki raüla, riimakla rehuk raq tsuq wan raüla, kiimaq kra chhiti maiq saqse ahü riiki raüla,

¹¹ Kra kha nyantlaq we ka noqku jam na wa ratlo. Raüta kiijaq arewe nyamse ka apaiq raq huk-ho mak dea nguta atiitum ratlo. Kiimaq kra nyamse ka huk-ho mak dea jiika, kra mokitaq kriika atatiwe sumli she miraq. Krai mren arewe raq apaiq ma athamke ka raamak.

¹² Shatmaq kra nyamse ka maiq riila huk-ho raüla, nyamse tatiwe miika kriiwe raq athamke ratlo.

¹³ Kiimaq kra nyamse ka asea riila kaq raüla, nyamse riimtiwe raq achho kra lam wan raüta saqse tiichhike ratlo. Kra ngu raüla, asea raq kaqtaq kha na, apaiq raq athamke ka raamak.

¹⁴ “Kiimaq maiq weshi ra raq, nanok maiq weshi ra jaq wa, jam nyamse ka anam arki rümtlaq, kriiwa nyamse ka atiibuktiiq raüta asho riiki raüla, riimakla atatiwe ka tamiishon atsai riiki raüla, anamtiwe raq athamke ratlo.

¹⁵ Shatmaq kra bikitlaq akhing na atatiwe ka asi raüla, anamkaitiwe riika athamke raamak. Kra nyamse ka ningchang na anamki jiila, jaq kra sumtaq kra tham ka jaqsham maq laptlaq kli she miraq.

Thung Alai Kiimaq Miikam Miisham Tri

¹⁶ “Maiq weshi ra raq, junsang se maiq raq miwai shaqli kra sunho raüla, apaiq raq jechak se ri athü ka kunli keraatlo. Raüta apaiq ka lam ratlo.

¹⁷ Shatmaq awe raq ase ka kriiwe ma tiiwa mak riiho raüla, apaiq raq awe ma kampho ka junsang se maiq ma tiiwa raüjaq apaiq tri ümchu ke chang wa kra kunli maq dok ratlo.

¹⁸ “Jechak re nyungshi ra raq mintin klo raüla, apaiq ka atsea baiq ratlo.

¹⁹ “Maiqwe re weshi ra raq, nyamse rai hainga raüla, apaiq ka atsea baiq ratlo.

²⁰ “Jurwa Ngi Tatiwe ara tlea raüta laihin phra ma honglu takuqtlaq apaiq ka atsea baiq ratlo.

²¹ “Pong mungti wanshawe ka naq haihiikiq. Riimakla ji maq nishishi naq raq riikiq. Tsan na tiitsanglaq, ümniika ka Ejip mung na wanshawe jalaü.

²² Manti nyung lo riimakla jechi se ka naq haihiikiq.

²³ Ümniiraq haihü haüla, Ngi, Tatiwe raq tsangshiq raq khrum jaü hoqtlaq kra mitreha.

²⁴ Kiimaq Ngi ka itsan mikhiq. Lata ümniika re na mitiitsaiha. Namnyungtiim ka manti nyungre miishe mijaki. Kiimaq namsetiim ka jechise kong miishe mijaki.

²⁵ “Ümniiraq isenginok miitsan maiqse ashi ra ma kampho tiinam kuq raüla, kampho tiinamti laopanwe ikha naq jakiq. Kiimaq apaiq jaq wa amet naq jaükiq.

²⁶ Kiimaq ümniiraq maiq weshi ra jaq wa kongphiq kha apaiq samtong jong kra thüho haüla, rashe minyap shaq niili kra apaiq ma jangke ratlo.

²⁷ Jamkhano ngukla rawa na samchang khea ka apaiq jaq na kriili. Kra ahü miika rawa na jamlai wa misam? Apaiq ka jamlai sam raüto mikon. Ümtiikiiwa apaiq ka ijaq wa khrum jaü mihoq, raüla Ngi raq apaiq achu jaü ka mitreha. Jamkhano ngukla Ngi ka mangchan hea we.

²⁸ “Shiikeawe ma abi naq bomkiq. Kiimaq ümnok ümta rümti welawe ma man naq sonkiq.

²⁹ “Ngi ma honglu thun ka üm bunwong wa, üm spiqtai wa, kiimaq oliptsi tai wa ake chang akhing riikhaqli na kuqlaq. “Ngi ma üm se chhikhuwe ka kuqlaq.

³⁰ “Ngi ma ümnyamse chhikhu anyung minsaü se kra kiimaq sku se kra kuqlaq. Nyamse chhikhu saü pong se nyung tlaq kra akaü rai ramiishi tiihai damlaq. Laüta ratiichat ranaiq angu na kra Ngi ma honglu na takuqlaq.

³¹ “Namshiq ka isenginok. Kra ningkhan nyamse asea raq akaq wa binriim ka phaq maimak. Kriika kuku kong miili kuq ronglaq.