DUNGWVNC 16 - ASII LAKDAP Bible (BSI)

Manna Nai Wupe Kong

¹ Israilnok mung tlotli ka Elim hiq maq tiido wanto. Raüta tsangshiq ka Ejip mung maq laü wan li maq jipi lünai she angu na kra lü wa ra roqshi ri rabiingi ranaiq niishe tsangshiq ka Sin kumtsaiphii binjü niishe saühoto. Kra wang ka Elim hiq nai Simai hiq liipan na riito.

² Kiijaq kra kumtsaiphii wang maq tsangshiq tarü raq Mosheq nai Aron ma bot tsaü trangto.

³ Kiimaq tsangshiq raq akha nguto, “Naishiq arka Tatiwe raq Ejip mung niili tsat baiq raüjaq ahea riichang wa. Kiijaq naishiq raq wok raq atang tang tolonglong nga laita ngam ka wok phetaktak phaqsiqkai kiimaq laihin phaq nai sea kiimin maiqmii raq aroro phetak phaqsiq tiikai arwa. Shatmaq ümchaütiq nya ümniiraq naishiq ka ara kumtsaiphii rumnyangkhi mung na tsuq wan laüta naishiq tarü ka ram ma tiihaü tlaü.”

⁴ Kiijiishe Tatiwe raq Mosheq nguto, “Ümchaü Ngi raq namshiq tarü kunli miitu tsam ka ra wiishe rajun ikha mitiisaüha. Mungmaiqse raq wranaiqtek tsangshiq ka rum na kiraüta kra ranaiq phaq sea chang dung kra mirchom kilaq. Akha dung lata Ngi raq tsangshiq tsantsii ka ibom chong ara phan phan sha sitla sha ibom chong ka tai romak wa kra misapha.

⁵ Ratrok ranaiq angu niika tsangshiq raq rahin jaq na riichom wantlaq kra nam ma thep liip raüta riichom wanlili riichang. Raüta phaqsea ka tiije wan lili riichang.”

⁶ Krai mren Mosheq nai Aron raq Israilnok tlotli ma akha chongto, “Athi raji namshiq ka Ejip mungwa ana shea wanti ka Tatiwe dea nguta misap han.

⁷ Ranap na Tatiwe asi makse chat-hit chhai-nyii kra michhi han. Namshiq raq apaiq ngeng bot nyan lan kriika apaiq raq taito she. Tengto, namshiq raq apaiq ngeng bot-nyan lan. Jamkhano ngukla nainai raq jaqsham tiikai kriika apaiq raq achong chong kli shamtiikai.”

⁸ Kiijiishe Mosheq raq nguto, “Tatiwe raq namshiq ma raji ko phaq chang ka ngam mikuq kiimaq ranap ko na phaqsea chang ka winsii, namshiq raq alot lot kra mikuq. Jamkhano ngukla namshiq raq apaiq ngeng ma ümtinkhan wa bot nyan lan kra apaiq raq taito she. Namshiq raq nai nai ngeng bom ümchuwa bom lan kriika Tatiwe ngeng bom riito.”

⁹ Kiimaq Mosheq raq Aron ma nguto, “Mungmaiqse kunli ma chonglaq, tsangshiq ka waraüta Tatiwe khaki na michaplaq. Jamkhano ngukla apaiq raq tsangshiq bot nyan trang ka taito she.”

¹⁰ Aron raq mungmaiqse kunli ma bom chong kuqtaq krai mren, tsangshiq raq kumtsaiphii rumnyangkhi wang nü kiina liito. Kiimaq tiihanghiiq miili Tatiwe chhainyii makse chat-hit kra phumda dashi mong na chhai wanto.

¹¹ Kiimaq Tatiwe raq Mosheq ma nguto,

¹² “Israilnok bot-nyantrang ka Ngi raq taikang she. Tsangshiq ma chonglaq raji raban raprap na tsangshiq raq ngam aphaq chang milap. Kiimaq ranap na tsangshiq raq aphaq asea lot mak winsii ka milap. Kiijiishetiq tsangshiq raq Ngi, Tatiwe ardea tsangshiq Shiikeawe ngutiishe misap wan.”

¹³ Kiimaq rajiko niishe wupe kong pahea lang lang alu maq abi wan kra saü wanto. Raüta piitiip kra hamli na thüm wanto. Kiimaq ranap ko niika piitiip tro tam na bang kham tong long rokto.

¹⁴ Kiimaq ümtiikiiwa bang kham ka rashe kii riishe süwan kiita, kumtsaiphii ram na piriirii setiim kiimaq phintsiip tsiip setiim ka kumtsaiphii hiq na tiiphong raq raq she chhito. Kriika nintata nyiiriitsi setiim ikha.

¹⁵ Israilnok raq kra chhi raüta, tsangshiq raq kriika jamlai wa sapmak riito. Kiimaq tsangshiq liipan na, “Arka jamlai wiinya?” nguta riiwaito. Kiimaq Mosheq raq tsangshiq ma chongkuqto, “Ahata Tatiwe raq namshiq ma akuq aphaq sea chang dung.

¹⁶ Tatiwe raq namshiq ma maiq loweatek raq maiqmii ma ümchuwa ratlaq kra riichom ronglaq, ajamti maiq loweatek miitu toknai nai riichom ronglaq nguta aming kuqto.”

¹⁷ Israilnok raq kra kloto. Wiijamti riika apa riichomto. Kiimaq wiijamti riika atsapli riichomto.

¹⁸ Kiimaq ümtiikiiwa tsangshiq raq tok maq shin raüta liikiita, jurwa apa riichomtaq kriiti riimin pahea ka riimak, kiimaq jurwa atsap lin li riichomtaq kriiti riimin tsaphease ka riimak hali. Maiq loweatek ma maiqmii rii ümchuwa ratlaq kiichu riikhaqli li riito.

¹⁹ Mosheq raq tsangshiq ma nguto, “Jurmin arwa phanshi ra ka anap miitu nguta thü maimak.”

²⁰ Shatmaq maiq wiijamti raq Mosheq bom ka taimak tleato. Raüta kiiwa wiijam abung tiichong raüta thüto. Kra anap ranap niishe liikiita ajong phong li she kiimaq anam tsang li she riito. Kiimaq Mosheq ka tsangshiq ma kai khiqto.

²¹ Wranaptek maiq loweatek raq apaiq rii ümchuwa ratlaq kra riichom wan lili riitlo. Kiimaq rashe she kii wan raüla, hiqraikhü na abung tiichongtlaq kriika ajam she riikitlo.

²² Ratrok ranaiq na tsangshiq raq phaqsea ka rahin jaq thaq na thepliip raüta riichomtlo, maiq loweatek miitu tokblai lai chhaq riichomtlo. Mungmaiqse welabi thun ka tlotli Mosheq phana kiraüta kra bom ka chongto.

²³ Kiimaq apaiq raq tsangshiq ma nguto, “Tatiwe raq aming kuqto, anap ranaiq ka apii ranaiq, niitiitsak ahai chang. Arka apaiq ma akiinong kuq wan ranaiq. Namshiq winsii ako chang sitlaq ka ko ronglaq, kiimaq namshiq raq kham maq alum chang ka lum ronglaq. Jamlai wa chantlaq kriika anap ranaiq miitu pong na rai lanta thübaiq ronglaq.”

²⁴ Mosheq raq tsangshiq ma aming kuqtaq kra phan phan, jamlai wa abung tiichongtlaq kriika anap ranaiq miitu she pong na raithü baiqto. Kriika anam min nammak kiimaq ajong min ahü ahea taqtaq sito.

²⁵ Mosheq raq nguto, “Arka ümchaü ranaiq phaqsiq ronglaq. Jamkhano ngukla ümchaü ranaiq ka Asii Niitiitsak Ranaiq. Arka niitiitsak ranaiq. Tatiwe ma akiinong kuq ranaiq. Kiimaq namshiq raq piitiip phai na aphaq sea chang ka ahü hum man mirhan.

²⁶ Namshiq raq dung ka ratrok na saüli riichom ratlo. Shatmaq ramiishi ranaiq ka, niitiitsak ranaiq. Kra ranaiq dung ka rum na ahü humki man mirhan.”

²⁷ Ramiishi ngo ranaiq na maiq wiijamti ka rum na phaqsea chang riichomkai nguta kito. Shatmaq tsangshiq raq ahü humki mak riito.

²⁸ Kra ningkhan na Tatiwe raq Mosheq ma nguto, “Namshiq raq Ngi aming thun ka ümtincho na saüli wa lang man mijin han?

²⁹ Tsan na tiitsang ronglaq, Ngi, Tatiwe raq namshiq ma ranaiq shi ka niitiitsak ahai miitu kuqkang. Kra ningkhan tiina Ngi raq ratrok ranaiq angu na namshiq ma aphaq sea chang dung ka ranaiq nai miitu hongli chang jang wraptek kuq tiikang. Krai mren ramiishi angu niika maiq loweatek maiqmii ümbano sitlan kriijaq li siraatlo. Apaiq ka jam wa kinphai na dongkai maimak.”

³⁰ Krai mren mungmaiqse raq ramiishi ranaiq na jamlai phan jaq min sham mak haito.

³¹ Israilnok raq kra aphaq sea chang dung ka manna nguta ngutlo. Kriika petsi aranse phan among wa arai ka lüdiidii sitlaq ikha riito. Kiimaq aphaq ma sum ka ngiq ngu rai ashot biskut sum ikha riito.

³² Mosheq raq nguto, “Tatiwe raq nashiq ma aming kuqto, rawiichii pat na nasetiim ma tiichhike miitu manna wiijam ka aheawiq saiqsam ronglaq nguta aming tatto. Krai mren tsangshiq raq nashiq ka Tatiwe raq Ejip mung wa tsuq wantaq akhing na kumtsaiphii rumnyangkhi mung maq jamlai wa phaqsiq wan kai kra dung ka tsangshiq riimin michhi.”

³³ Mosheq raq Aron ma nguto, “Hamlii tsabum ashi lamlaq. Laüta litar nai rii manna ka kra mong na thiilaq. Laüta Tatiwe asi tombutiip na thülaq. Arka rawiichii nasaütiim pat na tiichhike miitu.”

³⁴ Tatiwe raq Mosheq ma aming kuqtaq kra phan phan, Aron raq kra tsabum chii manna thütaq kriika Tongshong Tek kaü khaki na tothüto. Raüta kiijaq aheawiq saiqsam thüto.

³⁵ Israilnok raq manna ka rawii roqblai na saüli, tsangshiq shong chang Kanan mung na misaü wan shaq wiiwii manna siq raüta siwanto.

³⁶ (Kra pat na mung raq langtlaq hupsam shinriiqriiq phan shin chang tok kriimaq shin raü ka arka litar roqnai rii riito.)