Adlezenn 7 - Bibl Koad 21: Ar Bibl e Brezhoneg evit ar Vretoned

Pennad 7 Distrujañ an idoloù hag o azeulerien

¹ P'en devo da lakaet an AOTROU da Zoue da vont er vro ma'z ez e-barzh d'he ferc'hennañ, ha p'en devo kaset kuit kalz a vroadoù azirazout, an Hitited, ar C'hirgazianed, an Amoreaned, ar Gananeiz, ar Ferezianed, an Hevianed, ar Jebuziz, seizh broad brasoc'h ha kreñvoc'h egedout,

² p'en devo o roet dit an AOTROU da Zoue, hag ez po o filet, e lakai anezho da verz, ne ri ket a emglev ganto, ne'z po ket truez outo,

³ n'en em unani ket dezho dre zimeziñ, ne roi ket da verc'h d'e vab ha ne gemeri ket e verc'h evit da vab,

⁴ rak distreiñ a rafent da vab diwar va lerc'h evit servijañ doueoù all, hag en em danfe a-enep deoc'h fulor an AOTROU, a zistrujfe ac'hanout buan.

⁵ Evel-se e reot: neuze e tiskarot o aoterioù, e torrot o delwennoù, e troc'hot o asheraoù, e tevot en tan o skeudennoù kizellet.

⁶ Rak ur bobl santel ez out evit an AOTROU da Zoue. An AOTROU da Zoue en deus da zibabet evit ma vi dezhañ ur bobl ispisial, a-douez an holl bobloù a zo war-c'horre an douar.

⁷ N'eo ket abalamour ma'z oc'h niverusoc'h eget ar pobloù all eo en em staget an AOTROU ouzhoc'h hag en deus ho tibabet, rak ez oc'h an hini bihanañ eus an holl bobloù.

⁸ Met dre ma kar an AOTROU ac'hanoc'h ha dre ma vir al le en deus graet d'ho tadoù, en deus tennet an AOTROU ac'hanoc'h gant un dorn kreñv hag en deus dasprenet ac'hanoc'h eus an ti sklavelezh, eus dorn Faraon roue an Ejipt.

⁹ Gouez eta penaos eo Doue an AOTROU da Zoue, un Doue feal a vir e emglev hag e drugarez betek ar milvet rumm d'ar re a gar anezhañ hag a vir e c'hourc'hemennoù,

¹⁰ met rentañ a ra an hevelep tra war o dremmoù d'ar re a gasa anezhañ, evit o lakaat da vervel. Ne zale ket gant an hini a gasa anezhañ hag e rent an hevelep tra war e zremm.

¹¹ Mirout a ri ar gourc'hemennoù, ar reolennoù hag ar barnedigezhioù a gemennan dit hiziv, hag e ri diouto.

¹² Mar selaouit ar barnedigezhioù-se, ma virit anezho ha ma grit diouto, an AOTROU da Zoue a viro dit an emglev hag an drugarez en deus touet da'z tadoù.

¹³ Da garout a raio, da vennigañ ha da greskiñ, bennigañ a raio frouezh da gof ha frouezh da zouar, da winizh, da win ha da eoul, klodadoù da saout ha da zeñved, war an douar en deus touet da'z tadoù reiñ dit.

¹⁴ Benniget e vi muioc'h eget an holl bobloù, ne vo ez kreiz na den na gwreg difrouezh, na gaonac’h e-touez al loened.

¹⁵ An AOTROU a lamo ar c'hleñved eus da greiz, hag an holl c'houlioù drouk ac'h eus anavezet en Ejipt, ne lakaio ket warnout, met o lakaat a raio war ar re holl a gasa ac'hanout.

¹⁶ Distrujañ a ri an holl bobloù a roio dit an AOTROU da Zoue, da lagad a vo didruez ha ne serviji ket o doueoù, rak ur stign e vefe evidout.

¹⁷ Mar lavarez ez kalon: Ar pobloù-se a zo niverusoc'h egedon, penaos e c'hellin o kas kuit?

¹⁸ Na'z pez ket aon razo, az pez soñj eus ar pezh en deus graet an AOTROU da Zoue da Faraon ha d'an Ejipt a-bezh,

¹⁹ eus an amprouennoù bras en deus gwelet da zaoulagad, ar sinoù hag ar burzhudoù, an dorn kreñv hag ar vrec'h astennet, p'en deus da lakaet da vont kuit an AOTROU da Zoue; evel-se e raio an AOTROU da Zoue d'an holl bobloù ac'h eus aon razo.

²⁰ An AOTROU da Zoue a gaso gwesped zoken a-enep dezho, betek ma varvo dirazout ar re a vano hag ar re en em guzho azirazout.

²¹ Na vez ket spontet abalamour dezho, rak an AOTROU da Zoue a zo ez kreiz, un Doue bras ha spontus.

²² An AOTROU da Zoue a gaso kuit ar broadoù-se dirazout tamm-ha-tamm; ne c'helli ket dont a-benn anezho re vuan, gant aon na zeufe al loened gouez d'en em greskiñ a-enep dit.

²³ An AOTROU da Zoue o roio dit, hag e tistrujo anezho eus un diskar bras betek ma vint aet da get.

²⁴ Hag e lakaio e rouaned etre da zaouarn, hag e tilami o anv a-zindan an neñvoù, den ne zalc'ho dirazout betek ma vint aet da get.

²⁵ Deviñ a reot en tan skeudennoù kizellet o doueoù. Ne c'hoantai ket ha ne gemeri ket evidout an arc'hant hag an aour a vo warno, gant aon na vefe kement-se ur stign, rak ez int un euzhusted d'an AOTROU da Zoue.

²⁶ Ne zegasi ket traoù euzhus da'z ti, evit na vi ket lakaet da verz evelto; heug az po outañ, euzh az po outañ, rak lakaet da verz ez int.