Adlezenn 32 - Bibl Koad 21: Ar Bibl e Brezhoneg evit ar Vretoned

Pennad 32 Kantik Moizez

¹ Neñvoù, roit ho skouarn, hag e komzin! Douar, selaou gerioù va genoù!

² Va c'helennadurezh a redo evel ar glav, va ger a gouezho evel ar glizh, evel al litenn war ar c'hlasvez, evel barradoù war ar geot!

³ Rak ec'h embannin anv an AOTROU. Meulit braster hon Doue!

⁴ Eñ eo ar roc'h, e oberoù a zo peurvat, e holl hentoù a zo ur varnedigezh, un Doue leal eo, hep direizhder, gwirion hag eeun.

⁵ Int a zo en em vreinet, ur vezh eo! E vibien a zo ur rummad diroll ha fall.

⁶ Hag evel-se eo e trugarekait an AOTROU, pobl diskiant hag hep furnez? Ha n'eo ket da dad, an hini en deus da brenet, an hini en deus da c'hraet ha da startaet?

⁷ Az pez soñj eus da zeizioù gwechall, evesha er bloavezhioù a rummadoù da rummadoù, goulenn digant da dad hag e tesko dit, digant da dud kozh hag e lavarint dit.

⁸ Pa lodennas an Uhel-Meurbet o hêrezh d'ar broadoù, pa zispartias mibien Adam, e lakaas bonnoù ar pobloù hervez niver mibien Israel,

⁹ rak lodenn an AOTROU eo e bobl, Jakob eo lodenn e hêrezh.

¹⁰ E gavet en deus en ur vro distro, en ul lec'h digenvez ha dilezet d'ar yudadegoù. E c'hronnet en deus, eveshaet en deus outañ, diwallet en deus anezhañ evel e ibil-lagad,

¹¹ evel an erer o tihuniñ e neizhiad hag o nijellañ a-us d'e re vihan, a astenn e zivaskell, o c'hemer hag o doug war e bluñv,

¹² an AOTROU e-unan en deus renet anezhañ, ha n'eus ket bet doue estren gantañ.

¹³ E lakaet en deus da varc'hekaat war lec'hioù uhel an douar ha da zebriñ frouezh ar parkeier, da chugal mel ar roc'h hag eoul ar reier kalet,

¹⁴ amann ar saout ha laezh an deñved, lard an oaned, an tourzed eus Basan hag ar bouc'hed, flour kuñv ar gwinizh; evet ec'h eus gwad nerzhus ar rezin.

¹⁵ Jeshurun a zo deuet da vezañ lart hag en deus rebarbet. Deuet out da vezañ lart, tev ha kuilh! Dilezet en deus an Doue en deus graet anezhañ, disprizet en deus roc'h e silvidigezh.

¹⁶ Heget o deus e warizi dre zoueoù estren, hegaset o deus anezhañ dre draoù euzhus:

¹⁷ Aberzhet o deus da ziaouled ha n'int ket Doue, da zoueoù n'anavezent ket, nevez deuet abaoe nebeut ha ne oant ket bet doujet gant o zadoù.

¹⁸ Dilezet ec'h eus ar roc'h en eus da c'hanet, ankounac'haet ec'h eus an Doue en deus da stummet.

¹⁹ An AOTROU a welas kement-se, hag e voe hegaset, imoret dre e vibien hag e verc'hed.

²⁰ Lavaret en deus: Kuzhat a rin va dremm outo, hag e welin penaos e vo o diwezh, rak ur rummad fall ez int, mibien diskredik.

²¹ Lakaet o deus ac'hanon da vezañ gwarizius dre ar pezh n'eo ket Doue, lakaet o deus droug da sevel ennon dre o zraoù aner, me o lakaio da vezañ gwarizius dre ar pezh n'eo ket ur bobl, lakaat a rin droug da sevel enno dre ur vroad diskiant,

²² rak un tan a zo bet enaouet em c'hounnar, hag e tevo betek foñs lec'h ar marv, hag e losko an douar hag e frouezh, hag ec'h entano diazezoù ar menezioù.

²³ Dastum a rin warno poanioù, tennañ a rin a-enep dezho va holl biroù.

²⁴ Kuzumet e vint gant an naon, debret gant an derzhienn ha gant ur walenn spontus, kas a rin a-enep dezho dant al loened gouez, ha binim ar stlejviled a ruz er poultr.

²⁵ Ar c'hleze a zistrujo er-maez, hag ar spouron e-barzh, o skeiñ an den yaouank hag ar werc'hez, ar poupig had an den gant blev gwenn.

²⁶ Me a lavarfe: O stlabezañ a rin, hag e tiverkin o eñvor a-douez an dud!

²⁷ Met aon am eus rak goapaerezh an enebour, hag e c'hellfe en em douellañ o gwaskerien, hag e c'hellfent lavarout: Hon dorn a zo bet savet, ha n'eo ket an AOTROU en deus graet kement-se.

²⁸ Ur bobl dibourvez a varnedigezh eo, n'eus skiant ebet enno.

²⁹ Ma vijent fur, e komprenjent kement-mañ, hag e soñjjent er pezh a c'hoarvezo ganto d'an diwezh.

³⁰ Penaos en defe gallet unan redek war-lerc'h mil, ha daou redek war-lerc'h dek mil, nemet en defe o roc'h o gwerzhet, hag an AOTROU o deroet?

³¹ Rak n'eo ket o roc'h evel hor roc'h, hon enebourien a c'hell barn.

³² Met o gwinienn a zeu eus gwiniegi Sodom, hag eus douaroù Gomora, o rezin a zo rezin ampoezonet, o blokad a zo c'hwerv,

³³ o gwin a zo binim an erevent, poezon garv an naered-gwiber.

³⁴ Kement-se, ha n'eo ket kuzhet em c'hichen? Ha n'eo ket siellet em zeñzorioù?

³⁵ Din-me eo ar veñjañs ha me a rento, pa vrañsello o zroad! Rak deiz o foanioù a zo tost, hag hastañ a ra an traoù a dle c'hoarvezout.

³⁶ An AOTROU a varno e bobl, met ouzh e servijerien en devo truez, pa welo ez eo aet o nerzh, ha n'eus den ken, na re zalc'het na re zieubet.

³⁷ Lavarout a raio: Pelec'h emañ o doueoù, ar roc'h ma fizient ennañ,

³⁸ a zebre lard o aberzhoù, hag a eve gwin o evadkinnigoù? Ra savo! Ra o sikouro! Ra vo warno o gwarez!

³⁹ Gwelit bremañ penaos eo me va-unan eo me, ha penaos n'eus doue all ebet nemedon. Me a ra mervel ha bevañ, me a c'hloaz hag a yac'ha, ha n'eus den hag a c'hell dieubiñ eus va dorn.

⁴⁰ Rak va dorn a savan war-zu an neñv, hag e lavaran: Me a zo bev da viken!

⁴¹ Mar lemman luc'hedenn va c'hleze, ha mar krog va dorn er varnedigezh, e tennin veñjañs eus va enebourien, hag e kastizin ar re a gasa ac'hanon,

⁴² mezviañ a rin va biroù gant o gwad, va c'hleze a zebro o c'hig, diwar gwad ar re c'hloazet hag ar re zalc'het, diwar penn mestroù an enebour.

⁴³ Broadoù, laouenait gant e bobl! Rak e veñjo gwad e servijerien, e tenno veñjañs eus e enebourien, hag e raio dic'haou evit e zouar hag evit e bobl.

⁴⁴ Moizez a zeuas hag a zisklêrias holl gomzoù ar c'hantik-mañ e divskouarn ar bobl, ha Jozue mab Nun a oa gantañ.

⁴⁵ P'en doe Moizez echuet da zisklêriañ an holl gomzoù-mañ dirak holl Israel,

⁴⁶ e lavaras dezho: Lakait ho kalonoù da virout an holl gomzoù a bedan ac'hanoc'h hiziv da gemenn d'ho mibien, evit ma virint holl gomzoù al lezenn-mañ ha ma raint diouto.

⁴⁷ Rak n'int ket komzoù didalvez evidoc'h, met ho puhez eo; dre ar c'homzoù-mañ ec'h hiraiot ho teizioù er vro ma'z eot da berc'hennañ, o tremen ar Jordan.

⁴⁸ D'an hevelep deiz e komzas an AOTROU da Voizez o lavarout:

⁴⁹ Pign war venez Abarim, war venez Nebo, a zo e bro Voab, a-dal da Jeriko, ha sell ouzh bro Ganaan a roan da hêrezh da vibien Israel.

⁵⁰ Mervel a ri war ar menez a vi pignet warnañ; hag e vi dastumet gant da bobl, evel ma varvas Aaron da vreur war venez Hor, hag e voe dastumet gant e bobl,

⁵¹ rak pec'het hoc'h eus a-enep din e-touez mibien Israel da zoureier Meriba, e Kadesh, e gouelec'h Zin, ha n'hoc'h eus ket santelaet ac'hanon e-touez mibien Israel.

⁵² Gwelout a ri ar vro dirazout, met ned i ket er vro a roan da vibien Israel.